Skip to main content

ஆடுகளைத் திருடிய கல்லூரி மாணவர்கள்... கைது செய்த காவல்துறை!

Published on 10/12/2021 | Edited on 10/12/2021

 

College students arrested for stealing goats

 

தேவக்கோட்டை பகுதியில் ஆடுகளைத் திருடியதாக ஆறு கல்லூரி மாணவர்கள் கைது செய்யப்பட்டுள்ளனர். 

 

சிவகங்கை மாவட்டம், தேவக்கோட்டை பகுதியில் சமீப காலமாக ஆடுகள் காணாமல் போவதாக ஆடுகளின் உரிமையாளர்கள் காவல் நிலையங்களில் புகார் அளித்தனர். இது குறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வந்தனர். அந்த வகையில் வாகன தணிக்கையில் ஈடுபட்டுக் கொண்டிருந்தனர். அப்போது, கல்லூரி மாணவர்கள் ஆறு பேர் இரண்டு இருசக்கர வாகனங்களில் இரண்டு ஆடுகளைக் கொண்டு வந்தனர். 

 

அவர்களை காவல்துறையினர் பிடித்து விசாரணை நடத்தியதில், அவர்கள் ஆடு திருடியது தெரிய வந்தது. மேலும், விசாரணையில் இவர்கள் ஆறு பேரும் திருவாடானையில் உள்ள கல்லூரி ஒன்றில் படித்து வருவதும் தெரிய வந்தது. இதனையடுத்து, கல்லூரி மாணவர்களை காவல்துறையினர் கைது செய்தனர்.

 

கல்லூரி மாணவர்கள் ஆடு திருடிய சம்பவம், அப்பகுதி மக்களிடையே கடும் அதிர்ச்சியை ஏற்படுத்தியுள்ளது. 

 

சார்ந்த செய்திகள்

Next Story

போலி பாஸ்போர்ட் மூலம் வெளிநாட்டில் 18 ஆண்டுகள் வேலை செய்த பலே கில்லாடி கைது

Published on 16/11/2022 | Edited on 16/11/2022

 

 

Bale Gilladi, who worked abroad for 18 years with a fake passport, was arrested!



போலி கடவுச்சீட்டு மூலமாக சிங்கப்பூரில் 18 ஆண்டுகள் வேலை செய்து வந்த நபரை காவல்துறையினர் கைது செய்தனர். 

 

சேலம் மாவட்டம், ஆத்தூர் அருகே உள்ள வீரகனூர், வடக்கு ராமநாதபுரத்தைச் சேர்ந்தவர் வீரமுத்து (வயது 43). இவர் சிங்கப்பூர் நாட்டில் வேலை செய்து வருவதாகவும் அதற்கான கடவுச்சீட்டை (பாஸ்போர்ட்) புதுப்பித்து தரும்படியும் கடந்த ஆண்டு ஜூன் மாதம் தமிழக கடவுச்சீட்டு வழங்கல் அலுவலகத்திற்கு விண்ணப்பம் செய்திருந்தார். இந்த விண்ணப்பத்தின் மீது உரிய தணிக்கை நடத்தி அறிக்கை சமர்ப்பிக்கும்படி மாவட்ட எஸ்.பி. ஸ்ரீஅபிநவ், வீரகனூர் காவல்நிலைய போலீசாருக்கு உத்தரவிட்டார். 

 

அதன் பேரில் வீரகனூர் எஸ்.ஐ. தினேஷ்குமார் வீரமுத்துவின் வீட்டிற்குச் சென்று தணிக்கை செய்துள்ளார். அப்போது வீரமுத்து சிங்கப்பூரில் வேலை செய்யவில்லை என்பதும் அவர் அம்மம்பாளையத்தில் உள்ள ஆவின் பால் குளிரூட்டும் நிலையத்தில் மேற்பார்வையாளராக வேலை செய்து வருவதும் தெரிய வந்தது. வீரமுத்துவின் பெயரில் அவருடைய உறவினரான உள்ளூரைச் சேர்ந்த ராஜேஷ் (வயது 36) என்பவர் போலியாகக் கடவுச்சீட்டு எடுத்து சிங்கப்பூரில் வாகன ஓட்டுநராக வேலை செய்து வருவது தெரிய வந்தது. 

 

ஆள்மாறாட்டம் செய்து போலி கடவுச்சீட்டு மூலம் சிங்கப்பூர் சென்றுள்ள ராஜேஷ் மீது நடவடிக்கை எடுக்க மாவட்ட குற்றப்பிரிவு காவல்துறையில் எஸ்.ஐ. தினேஷ்குமார் புகார் அளித்தார். புகாரின் பேரில் குற்றப்பிரிவு டி.எஸ்.பி. இளமுருகன் போலி கடவுச்சீட்டு, போலி ஆவணம் தயாரித்தல், ஆள்மாறாட்டம் செய்தல் உள்ளிட்ட 6 பிரிவுகளின் கீழ் ராஜேஷ் மீது வழக்குப்பதிவு செய்தார். 

 

ராஜேஷ் எப்போது தமிழகம் திரும்பினாலும் அவரைக் கைது செய்ய காத்திருந்த காவல்துறையினர் சென்னை, திருச்சி உள்ளிட்ட அனைத்து விமான நிலையங்களுக்கும் தேடுதல் அறிவிக்கை (லுக் அவுட்) வழங்கி இருந்தனர். காவல்துறையினர் வலை விரித்துக் காத்திருப்பதை அறியாத ராஜேஷ், நவ. 13 ஆம் தேதி சிங்கப்பூரில் இருந்து திருச்சி விமான நிலையத்தில் வந்திறங்கினார். அவரை குடியுரிமைப் பிரிவு அதிகாரிகள் பிடித்து விசாரித்தனர். அவர்கள் அளித்த தகவலின் பேரில் சேலம் மாவட்ட குற்றப்பிரிவு டி.எஸ்.பி. தலைமையில் காவலர்கள் குழு திருச்சி சென்று ராஜேஷை கைது செய்தனர். அவரை சேலம் அழைத்து வந்து தீவிர விசாரணை நடத்தினர். 

 

கடந்த 2002 ஆம் ஆண்டு, வடக்கு ராமநாதபுரத்தில் நூலகராகப் பணியாற்றி வந்த உறவினரான வீரமுத்துவின் ரேஷன் கார்டு, பள்ளி மாற்றுச்சான்றிதழ் ஆகியவற்றை திருடிய ராஜேஷ் அதன்மூலமாக போலி கடவுச்சீட்டு பெற்றுள்ளார். அப்போது ராஜேஷுக்கு 18 வயது நிறைவடையாததால் வீரமுத்துவின் பெயரிலேயே போலியாக கடவுச்சீட்டு பெற்று சிங்கப்பூருக்கு பறந்துள்ளார். இதன்மூலம் அவர் 18 ஆண்டுகளாக சிங்கப்பூரில் வேலை செய்து வந்துள்ளார். இவருக்கு திருமணமாகி மனைவி மற்றும் ஒரு மகன், ஒரு மகள் இருக்கின்றனர். 

 

இந்த நிலையில், கடந்த ஆண்டு அவருடைய கடவுச்சீட்டின் ஆயுட்காலம் காலாவதி ஆகிவிட்டது. அதைப் புதுப்பிக்க முயன்ற போதுதான் காவல்துறையில் வசமாக சிக்கியிருப்பது விசாரணையில் தெரிய வந்தது. கைதான ராஜேஷை சேலம் மாவட்ட 6-வது குற்றவியல் நீதித்துறை நடுவர் மன்றத்தில் ஆஜர்படுத்தினர். நீதித்துறை நடுவரின் உத்தரவின்பேரில் ராஜேஷை சேலம் மத்தியச் சிறையில் அடைத்தனர்.

 

 

Next Story

வெள்ளி தொழிலாளி கொலை வழக்கு: நாட்டுத்துப்பாக்கி தயாரித்து கொடுத்தவர், இடைத்தரகர் கைது!

Published on 21/03/2021 | Edited on 21/03/2021

 

salem incident police arrested the two persons

 

சேலம் அருகே உள்ள சித்தனூரைச் சேர்ந்தவர் செல்வம் (வயது 40). வெள்ளிக் கொலுசு தயாரிப்பு தொழில் செய்துவந்தார். இவருடைய தாயார் பெரிய தாய் (வயது 70). இவர், தனது கடைசி மகன் சந்தோஷ் (வயது 35) என்பவருடன் கொண்டலாம்பட்டி அருகே உள்ள பெரிய புத்தூரில் வசித்து வருகிறார்.

 

இரு நாள்களுக்கு முன்பு செல்வம், தாயாரைப் பார்க்கச் சென்றிருந்தார். அப்போது சந்தோஷுக்கும், செல்வத்துக்கும் இடையே சொத்து பாகப்பிரிவினை தொடர்பாக தகராறு ஏற்பட்டுள்ளது. பூர்வீகச் சொத்தை எந்தக் காரணம் கொண்டும் விற்க முடியாது என்று முட்டுக்கட்டை போட்டுள்ளார் செல்வம். இதனால், ஆத்திரம் அடைந்த சந்தோஷ், தான் வீட்டில் மறைத்து வைத்திருந்த நாட்டுத்துப்பாக்கியை எடுத்துவந்து செல்வத்தை சுட்டுக்கொன்றார். இதுகுறித்து வழக்குப்பதிவு செய்த கொண்டலாம்பட்டி போலீசார் சந்தோஷை கைது செய்தனர். விசாரணையில், செல்வம் பயன்படுத்தியது உரிமம் பெறாத துப்பாக்கி என்பது தெரியவந்தது.

 

தேர்தல் நேரத்தில் உரிமம் பெற்ற துப்பாக்கிகள் அந்தந்த போலீஸ் நிலையங்களில் ஒப்படைக்கப்படும். இதையும் மீறி சந்தோஷ் நாட்டுத்துப்பாக்கி வைத்திருந்தது எப்படி என விசாரித்தபோதுதான் அவர், வாழப்பாடி அருகே உள்ள நீர்முள்ளிக்குட்டையைச் சேர்ந்த சின்ராஜ் (வயது 55) என்பவரிடம் சட்ட விரோதமாக நாட்டுத்துப்பாக்கி தயாரித்து வாங்கியிருப்பது தெரியவந்தது. 

 

பெரிய புத்தூரைச் சேர்ந்த இளையராமன் (வயது 51) என்பவர்தான் முயல் வேட்டைக்கு நாட்டுத் துப்பாக்கி தேவை என்று கூறி, சின்ராஜிடம் விலைக்கு வாங்கியிருக்கிறார். அவர் மூலமாக சந்தோஷுக்கு துப்பாக்கி கொடுக்கப்பட்டுள்ளது. சொத்து பாகப் பிரிவினைக்கு முட்டுக்கட்டையாக இருந்த செல்வத்தை தீர்த்துக்கட்ட வேண்டும் என சந்தோஷ் கடந்த ஓரிரு மாதத்திற்கு முன்பிருந்தே திட்டமிட்டு இருந்ததும், அத்திட்டப்படிதான் இளையராமன் மூலமாக சின்ராஜிடம் கள்ளத்துப்பாக்கியை தயாரித்து வாங்கியிருப்பதும் தெரிய வந்தது. இதையடுத்து சின்ராஜ், இளையராமன் ஆகிய இருவரையும் கொண்டலாம்பட்டி போலீசார் கைது செய்தனர்.