‘மது இறக்குமதியில் ஊழல் நடந்திருக்கிறது’ - சிஏஜி அறிக்கை

டாஸ்மாக் மது இறக்குமதி செய்ததில் ஊழல் நடந்திருப்பதாக சிஏஜி அறிக்கை வெளியிட்டுள்ளது.

சட்டப்பேரவையில் வைக்கப்பட்ட 2021-2022ஆம் ஆண்டு நிதியாண்டுக்கான அறிக்கை குறித்து சிஏஜி அறிக்கை வெளியிட்டுள்ளது. சிஏஜி அறிக்கை தொடர்பாக முதன்மை தலைமை கணக்காயர் ஜெய்சங்கர் செய்தியாளர்களைச் சந்தித்து பேசினார்.

அப்போது அவர், ‘ஒரே நபர் தொடர்ச்சியாக ஏலத்தில் தேர்வு செய்யப்பட்டதால் மதுபான இறக்குமதியில் ஊழல் நடந்திருக்கிறது. டாஸ்மாக் மதுபான விலை உயர்த்தப்பட்டாலும் அதற்கேற்ற வரி அரசுக்கு செலுத்தப்படவில்லை. அரசுக்கு வரி செலுத்தாததால் ரூ.30.50 கோடி வருவாய் இழப்பு ஏற்பட்டிருக்கிறது. மேலும், கொரோனா காலக்கட்டத்தில் தகுதி இல்லாதவர்களுக்கு ரூ.5.78 கோடி கோவிட் பண உதவி செய்யப்பட்டிருக்கிறது.

இதில் 27,943 தகுதி இல்லாதவர்களுக்கு கோவிட் பண உதவி கிடைத்திருக்கிறது என்று சிஏஜி அறிக்கையில் தகவல் வெளியாகியிருக்கிறது. வரித் தாக்கல் செய்யாதவர்கள் மீது அதிகாரிகள் எந்தவித நடவடிக்கையும் எடுக்கவில்லை. மேலும், தணிக்கை காலத்தில் வரித்தாக்கல் ஆய்வுக்கு உட்படுத்தப்படவில்லை’ எனத் தெரிவித்துள்ளார்.