Skip to main content

பல கோடி ரூபாய் சுருட்டிய பா.ஜ.க. பிரமுகர்; குவியும் புகார்கள்! 

Published on 21/08/2022 | Edited on 21/08/2022

 

bjp leader money peoples police salem


 
 சேலத்தில், நிதி நிறுவனம் என்ற பெயரில் கவர்ச்சிகரமான அறிவிப்பை வெளியிட்டு பல கோடி ரூபாய் சுருட்டிய பா.ஜ.க. பிரமுகர் மீது மேலும் புகார்கள் குவிந்த வண்ணம் உள்ளன. விரைவில் அவரை காவலில் எடுத்து விசாரிக்கவும் காவல்துறையினர் முடிவு செய்துள்ளனர். 

 

சேலம் அழகாபுரம் ரெட்டியூரைச் சேர்ந்தவர் ஏ.பி.பாலசுப்ரமணியம். இவர், புதிய பேருந்து நிலையம் அருகே ஜஸ்ட் வின் ஐடி டெக்னாலஜீஸ் பிரைவேட் லிமிடெட் என்ற பெயரில் தனியார் நிதி நிறுவனத்தை தொடங்கி நடத்தி வந்தார். இந்நிறுவனத்தின் நிர்வாக இயக்குநராகவும் செயல்பட்டு வந்தார்.   

 

இவருடைய மனைவி தனலட்சுமி, மகன் வினோத், மருமகன் கதிர்வேல் ஆகியோரும் நிர்வாகம் செய்து வந்தனர். சேலத்தைத் தலைமை இடமாகக் கொண்டு திருவண்ணாமலை, காரைக்குடி, தலைவாசல், ஈரோடு, சென்னை, நீலகிரி ஆகிய இடங்களிலும் கிளைகளைத் தொடங்கியுள்ளனர்.  

 

இந்த நிறுவனத்தில் ஒரு லட்சம் ரூபாய் முதலீடு செய்தால், 12 மாதங்கள் கழித்து 1.60 லட்சம் ரூபாயாக திருப்பித் தரப்படும் என கவர்ச்சிகரமான விளம்பரம் செய்யப்பட்டது. இதை நம்பிய பலர், பல கோடி ரூபாய் முதலீடு செய்தனர். இதற்காக முகவர்களை நியமித்து, அவர்கள் மூலமும் கோடிக்கணக்கான ரூபாய்கள் முதலீடாகப் பெறப்பட்டது.  

 

ஆரம்பத்தில் சிலருக்கு உறுதி அளித்தபடி முதலீட்டுத் தொகையை கூடுதல் லாபத்துடன் கொடுத்து வந்த இந்நிறுவனம், அதன்பின் முதலீட்டுத் தொகையைக் கூட திருப்பித்தராமல் போக்கு காட்டி வந்தது.  ஏமாற்றம் அடைந்த பலர் சேலம் மத்தியக் குற்றப்பிரிவு காவல்துறையில் புகார் அளித்தனர். 

 

இந்நிலையில் சேலம் மாவட்டம் ஓமலூரை அடுத்த காடையாம்பட்டியைச் சேர்ந்த காவேரியப்பன் என்பவர் அளித்த புகாரின்பேரில், பாலசுப்ரமணியம், மனைவி தனலட்சுமி, மகன் வினோத், மருமகன் கதிர்வேல் ஆகியோர் 37 லட்சம் ரூபாய் மோசடி செய்து விட்டதாக அழகாபுரம் காவல்நிலைய காவல்துறையினர் வழக்குப்பதிவு செய்தனர்.  

 

இந்த வழக்கில் அவரைப் பிடிக்க தனிப்படை அமைத்து தேடி வந்தனர். ஆக. 19- ஆம் தேதி, சென்னையில் வைத்து பாலசுப்ரமணியம், அவருடைய மனைவி தனலட்சுமி ஆகிய இருவரையும் காவல்துறையினர் கைது செய்தனர். சேலம் நீதிமன்ற உத்தரவின்பேரில் இருவரும் சேலம் சிறையில் அடைக்கப்பட்டனர். வினோத், கதிர்வேல் ஆகிய இருவரையும் காவல்துறையினர் தேடி வருகின்றனர்.  

 

இது ஒருபுறம் இருக்க, இவர்கள் மீது மேலும் இரண்டு புதிய வழக்குகள் பதிவு செய்யப்பட்டு உள்ளன.  
 

சார்ந்த செய்திகள்

Next Story

சல்மான் கான் வீட்டின் முன் துப்பாக்கிச்சூடு; மும்பை போலீசார் அதிரடி!

Published on 16/04/2024 | Edited on 16/04/2024
incident front of Salman Khan house Mumbai police in action

பாலிவுட்டில் முன்னணி நடிகராக இருப்பவர் சல்மான்கான். இவர் மும்பை பாந்த்ரா நகரில் உள்ள வீட்டில் வசித்து வருகிறார். இந்த இத்தகைய சூழலில் நேற்று முன்தினம் (14.04.2024) இரு சக்கர வாகனத்தில் வந்த அடையாளம் தெரியாத இரண்டு நபர்கள் சல்மான்கான் வீட்டின் முன்பு துப்பாக்கிச்சூடு நடத்தினர். அதன் பின்னர் அவர்கள் அங்கிருந்து தப்பிச் சென்றனர். துப்பாக்கிச்சூடு நடந்த போது சல்மான் கான் வீட்டில் இருந்தது குறிப்பிடத்தக்கது.

இது குறித்து போலீசாருக்கு தகவல் கொடுக்கப்பட்டது. அதன்பேரில் சம்பவ இடத்திற்கு வந்த போலீசார், துப்பாக்கிச்சூடு நடத்தி விட்டுத் தப்பிச்சென்ற மர்ம நபர்களைத் தேடி வந்தனர். சல்மான் கானுக்கு ஒய் பிளஸ் பிரிவு பாதுகாப்பு அளிக்கப்பட்ட நிலையில், அவர் வீட்டின் முன்பு துப்பாக்கிச்சூடு நடந்துள்ளது பெரும் பரபரப்பை ஏற்படுத்தி இருந்தது. இந்த சம்பவம் தொடர்பாக வழக்குப்பதிவு செய்த போலீசார் துப்பாக்கிச்சூடு நடத்திவிட்டு தப்பிச் சென்ற மர்ம நபர்களை தீவிரமாகத் தேடி வந்தனர்.

இந்நிலையில், நடிகர் சல்மான்கான் வீட்டின் முன்பு துப்பாக்கிச்சூடு நடத்திய விவகாரத்தில் விக்கி குப்தா மற்றும் சாகர் பால் ஆகிய இருவர் கைது செய்யப்பட்டுள்ளனர். குஜராத் மாநிலத்தின் பூஜ் பகுதியில் தலைமறைவாக இருந்த குற்றவாளிகளை மும்பை குற்றப்பிரிவு போலீசார் கைது செய்தனர். இது குறித்து பூஜ் சார்பில் காவல்துறை வெளியிட்டுள்ள செய்திக்குறிப்பில், “ஏப்ரல் 14 ஆம் தேதி நடிகர் சல்மான் கானின் வீட்டுக்கு வெளியே துப்பாக்கிச் சூடு நடத்திய லாரன்ஸ் பிஷ்னாய் கும்பலில் குற்றம் சாட்டப்பட்ட இருவரை மேற்கு கச்சச் போலீஸார் கைது செய்தனர். குற்றம் சாட்டப்பட்ட இருவரும் பீகாரைச் சேர்ந்த விக்கி குப்தா (வயது 24), சாகர் பால் (வயது 21) என அடையாளம் காணப்பட்டுள்ளனர்” எனத் தெரிவிக்கப்பட்டுள்ளது. 

Next Story

ஆவடி கொள்ளை சம்பவம்; வெளியான புதிய தகவல்!

Published on 16/04/2024 | Edited on 16/04/2024
avadi jewelry incident New information released 

சென்னையை அடுத்துள்ள ஆவடி முத்தாபுதுப்பேட்டையில் பிரகாஷ் என்பவர் ‘கிருஷ்ணா ஜுவல்லரி’ என்ற பெயரில் நகைக்கடை நடத்தி வருகிறார். இந்த நகைக்கடைக்கு நேற்று (15.04.2024) நண்பகல் 12 மணியளவில் 5 மர்ம நபர்கள் தமிழக பதிவெண் கொண்ட மாருதி ஸ்விஃப்ட் காரில் வந்துள்ளனர். இவர்களில் 4 பேர் கடையின் உரிமையாளரான பிரகாஷின் கை மற்றும் கால்களை கட்டிப்போட்டுத் துப்பாக்கி முனையில் நகைக் கடையில் இருந்து ரூ.1.5 கோடி மதிப்பிலான பணம் மற்றும் நகைகளை கொள்ளையடித்துச் சென்றனர்.

இந்தச் சம்பவம் குறித்து முத்தாபுதுப்பேட்டை போலீசாருக்கு தகவல் கொடுக்கப்பட்டது. தகவலின் பேரில் சம்பவ இடத்திற்கு வந்த போலீசார் வழக்குப் பதிவு செய்து விசாரணை நடத்தி வருகின்றனர். மேலும், அந்தக் கடைக்குள் பொருத்தப்பட்டிருந்த சி.சி.டி.வி கேமராக்களின் பதியப்பட்ட காட்சிகளை வைத்து போலீசார் தீவிர விசாரணை நடத்தி வருகின்றனர். பட்டப்பகலில் துப்பாக்கி முனையில் நகைக்கடை உரிமையாளரின் கை, கால்களை கட்டிப்போட்டு நகைக்கடையில் இருந்து ரூ.1.5 கோடி மதிப்பிலான பணம், நகைகள் கொள்ளையடிக்கப்பட்ட சம்பவம் ஆவடியில் பெரும் பரபரப்பை ஏற்படுத்தியிருந்தது.

இதனையடுத்து நகைகளை கொள்ளையடித்த கொள்ளையர்களின் புகைப்படத்தை போலீசார் வெளியிட்டிருந்தனர். இது குறித்து கூடுதல் கமிஷனர் ராஜேந்திரன் செய்தியாளர்களைச் சந்தித்து பேசுகையில், ‘பட்டப்பகலில் நகைக்கடைக்குள் புகுந்து கொள்ளையடித்த கொள்ளையர்களைப் பிடிக்க 8 தனிப்படை அமைத்து தீவிரமாக தேடி வருகின்றோம். மேலும், கொள்ளையர்கள் வந்த காரின் எண் அடையாளம் கண்டறியப்பட்டுள்ளது. இந்த அடையாளங்களை வைத்து குற்றவாளிகளை தேடும் பணியை மேலும் தீவிரப்படுத்தி வருகிறோம்’ எனத் தெரிவித்திருந்தார். 

avadi jewelry incident New information released 

இந்நிலையில் இந்த நகைக்கடையில் கைவரிசை காட்டியது வட மாநிலத்தைச் சேர்ந்தவர்கள் என போலீசார் விசாரணையில் தெரிய வந்துள்ளது. 8 தனிப்படைகள் அமைத்து போலீசார் கொள்ளையர்களின் காரை பின் தொடர்ந்து சென்று தேடுதல் வேட்டையில் ஈடுபட்டுள்ளனர். அதே சமயம் கொள்ளையர்கள் காரை பயன்படுத்தாமல் ரயில் அல்லது விமானம் மூலம் தப்பிச் சென்றிருக்கலாம் எனவும், கொள்ளையர்கள் இன்று (16.04.2024) மாலைக்குள் கைது செய்யப்படுவார்கள் எனவும் போலீசார் தகவல் தெரிவித்துள்ளனர். சிசிடிவி கேமரா காட்சிகளை கொண்டு கொள்ளையர்கள் பயன்படுத்திய காரின் பதிவெண்ணை கண்டுபிடித்துள்ளது குறிப்பிடத்தக்கது.