'நமது அம்மா' நாளிதழின் ஆசிரியர் மருது அழகுராஜ் அப்பொறுப்பில் இருந்து விலகுவதாக அறிவித்துள்ளார். 

அ.தி.மு.க.வில் உட்கட்சிப் பூசல் தீவிரமடைந்துள்ள நிலையில், சென்னை உயர்நீதிமன்றம் டெல்லியில் உள்ள உச்சநீதிமன்றம் மற்றும் இந்திய தலைமை தேர்தல் ஆணையம் என எடப்பாடி பழனிசாமி மற்றும் ஓ.பன்னீர்செல்வம் ஆகியோர் தலைமை பதவிக்காக மாறி மாறி மனுத்தாக்கல் செய்துள்ளனர். மேலும், இரு தரப்பு ஆதரவாளர்களும் செய்தியாளர்களைச் சந்தித்து குற்றச்சாட்டுகளை முன்வைத்து வருகின்றனர். 

இந்த நிலையில், அ.தி.மு.க.வின் அதிகாரப்பூர்வ நாளேடான 'நமது அம்மா' நாளிதழின் நிறுவனர் பொறுப்பில் இருந்து ஓ.பன்னீர்செல்வம் சமீபத்தில் நீக்கப்பட்டது அவரது ஆதரவாளர்களை அதிர்ச்சி அடைய செய்தது. இந்நிலையில், 'நமது அம்மா' நாளிதழின் ஆசிரியர் மருது அழகுராஜ் தனது அதிகாரப்பூர்வ ட்விட்டர் பக்கத்தில், "நதிகாக்கும் இரு கரைகள்" என்னும் என் போன்றோரது நம்பிக்கை, சுயநலத்தால் தகர்ந்து விட்ட நிலையில் நமது அம்மா நாளிதழ் ஆசிரியர் பொறுப்பிலிருந்து விலகிக் கொள்கிறேன்" எனத் தெரிவித்துள்ளார். 

அ.தி.மு.க.வில் உட்கட்சி மோதல் தீவிரமடைந்துள்ள நிலையில், 'நமது அம்மா' நாளிதழ் பொறுப்பில் இருந்து ஓ.பன்னீர்செல்வம் நீக்கப்பட்டுள்ளார். 

அ.தி.மு.க.வின் அதிகாரப்பூர்வ நாளேடான 'நமது அம்மா' நாளிதழின் நேற்றைய பதிப்பில் நிறுவனர்கள் எடப்பாடி பழனிசாமி மற்றும் ஓ.பன்னீர்செல்வம் என பெயர் இருந்த நிலையில், இன்று (26/06/2022) வெளியான 'நமது அம்மா' நாளிதழில் நிறுவனர் பொறுப்பில் இருந்து அ.தி.மு.க.வின் ஒருங்கிணைப்பாளர் ஓ.பன்னீர்செல்வத்தின் பெயர் நீக்கப்பட்டுள்ளது. இன்று வெளியான அந்த நாளிதழில் 'நமது அம்மா' நாளிதழின் நிறுவனர் எடப்பாடி பழனிசாமி என்று மட்டுமே குறிப்பிடப்பட்டுள்ளது. இதில், ஓ.பன்னீர்செல்வத்தின் பெயர் இடம் பெறவில்லை. 

அ.தி.மு.க.வில் ஒற்றைத் தலைமை விவகாரம் உச்சக்கட்டத்தை எட்டியுள்ள நிலையில், எடப்பாடி பழனிசாமி தரப்பு இத்தகைய நடவடிக்கையை எடுத்துள்ளது. மேலும், மாவட்டங்களில் உள்ள அ.தி.மு.க. கட்சியின் அலுவலகங்களில் இருந்து ஓ.பன்னீர்செல்வத்தின் படம் அகற்றப்பட்டு வருவதாக தகவல் வெளியாகியுள்ளது. 

அ.தி.மு.க.வில் இருந்து என்னை யாராலும் நீக்க முடியாது என ஓ.பன்னீர்செல்வம் செய்தியாளர்களிடம் கூறியிருந்த நிலையில், நமது அம்மா நாளிதழ் பொறுப்பில் இருந்து ஓ.பன்னீர்செல்வம் நீக்கப்பட்டிருப்பது அவரது தரப்பு ஆதரவாளர்களை அதிர்ச்சியடையச் செய்துள்ளது.