Skip to main content

‘மங்காத்தா’ பட பாணியில் கொள்ளை; முன்னாள் போலீஸ் உட்பட 8 பேர் கைது

Published on 10/01/2023 | Edited on 10/01/2023

 

8 person including ex-policeman robbed house real estate magnate were arrested

 

திண்டுக்கல் மாவட்டத்தில் உள்ள  வேடசந்தூர் அருகே இருக்கும் சாலையூர் நால் ரோட்டைச் சேர்ந்த ரியல் எஸ்டேட் அதிபரான சீனிவாசன் தனது மனைவி கலையரசி, மகன் ராமச்சந்திரன், மகள் தனுஸ்ரீ ஆகியோருடன் அதே பகுதியில் உள்ள தனது வீட்டில் வசித்து வருகிறார்.

 

கடந்த மாதம் 26 ஆம் தேதி இரவு சீனிவாசன் வெளியில் சென்றிருந்த நிலையில், வீட்டுக்குள் புகுந்த முகமூடி அணிந்த 5 பேர் கொண்ட மர்ம கும்பல் வீட்டிலிருந்த தாய் கலையரசி முன்பு மகன் ரவிச்சந்திரன் மற்றும் மகள் தனுஸ்ரீ கழுத்தில் கத்தியை வைத்து மிரட்டி வீட்டில் வைத்திருந்த 5 பீரோக்களை உடைத்து அதிலிருந்த 43 பவுன் நகைகள் மற்றும் பணம் ரூபாய் 18 லட்சத்தை கொள்ளையடித்துச் சென்றனர். இது குறித்து போலீசார் வழக்குப்பதிவு செய்து வேடசந்தூர், திண்டுக்கல், ஒட்டன்சத்திரம் டி.எஸ்.பி-கள் துர்காதேவி, கோகுல கிருஷ்ணன், முருகேசன் தலைமையில் 3 தனிப் படைகள் அமைத்து  தீவிர தேடுதல் வேட்டை நடத்தி வந்தனர்.

 

இந்த நிலையில் திருச்சி மாவட்ட எல்லையான தங்கம்மாபட்டி சோதனைச் சாவடியில் கடந்த நான்கு தினங்களுக்கு முன்பு வேகமாக வந்த இன்னோவா காரை போலீசார் மடக்கிப் பிடித்தனர். அவர்களிடம் போலீசார் விசாரணை நடத்தியதில் அவர்கள் முன்னுக்குப் பின் முரணாகப் பதில் அளித்தனர். அதனைத் தொடர்ந்து அவர்களைப் பிடித்து போலீசார் தங்களுக்கே உரிய பாணியில் துருவித் துருவி விசாரணை நடத்தினர். அதில் அவர்கள் வேடசந்தூர் சாலையூர் நால்ரோடு பகுதியில் ரியல் எஸ்டேட் அதிபர் வீட்டில் கத்தி முனையில் நகை, பணத்தை கொள்ளையடித்ததும், அடுத்ததாக வாணியம்பாடி பகுதியில் 5 கோடி ரூபாய் ஹவாலா பணத்தைக் கொள்ளையடிக்கச் சென்று கொண்டிருந்ததும் தெரிய வந்தது. 

 

இதனைத் தொடர்ந்து அவர்களிடம் நடத்திய விசாரணையில் பல திடுக்கிடும் தகவல்கள் வெளியானது. சீனிவாசன் கடந்த சில நாட்களுக்கு முன்னர் புதிதாக இடம் வாங்குவதற்காக பூந்தமல்லியைச் சேர்ந்த ரியல் எஸ்டேட் புரோக்கர் தீனதயாளன் என்பவரிடம் 4 லட்சம் ரூபாய் முன்பணமாகக் கொடுத்துள்ளார். 

 

சீனிவாசன் வீட்டில் அதிகமான பணம் மற்றும் நகைகள் உள்ளது என்று தீனதயாளன் அவரது தோழி ஜோதிக்கு தகவல் கூறியுள்ளார் அதனைத் தொடர்ந்து ஜோதி தனது நண்பரான சென்னையில் போலீசாக வேலை பார்த்து பணி நீக்கம் செய்யப்பட்ட செல்வக்குமார் என்பவருடன் சேர்ந்து சேலம், நாமக்கல், ஓசூர் ஆகிய பகுதிகளைச் சேர்ந்த 16 பேர் அடங்கிய கூலிப்படையை அமைத்து சீனிவாசன் வீட்டிலிருந்து நகை மற்றும் பணத்தை கத்தி முனையில் கொள்ளையடித்துச் சென்றுள்ளனர்.

 

இந்தக் கொள்ளை சம்பவத்தில் ஈடுபட்ட செல்வகுமார், ஜோதி, தீனதயாளன், சிராஜுதீன், சதீஷ், சுரேஷ், ரகு, பாஸ்கர் உள்ளிட்ட 8 பேரை வேடசந்தூர் போலீசார் கைது செய்து சிறையில் அடைத்தனர். அவர்களிடமிருந்து ஒன்றரை லட்சம் ரூபாய் பணம் 21பவுன் தங்க நகைகள், ஒரு கார் மற்றும் ஆயுதங்கள் பறிமுதல் செய்யப்பட்டது. மேலும் ஜோதி என்பவர் போலி பத்திரிகையாளர் அட்டை மற்றும் மனித உரிமைகள் கழக அட்டையும் வைத்துள்ளது தெரிய வந்தது. அதேபோல் தீனதயாளனும் சர்வதேச மனித உரிமைக் கழகத்தில் இருப்பதாகச் சொல்லப்படுகிறது. இந்தக் கொள்ளை சம்பவத்தில் ஈடுபட்டு தலைமறைவாக உள்ள 8பேரை போலீசார் தீவிரமாகத் தேடி வருகின்றனர்.

 

 

சார்ந்த செய்திகள்

 

Next Story

கிணற்றில் மிதந்த இளைஞரின் சடலம்; போலீசார் விசாரணை

Published on 01/06/2024 | Edited on 01/06/2024
Body of young man floating in well; Police investigation

கோவில் திருவிழாவிற்கு சென்ற இளைஞர் கிணற்றில் சடலமாக மிதந்த சம்பவம் புதுக்கோட்டையில் பரபரப்பை ஏற்படுத்தியுள்ளது.

புதுக்கோட்டை மாவட்டம் கீரமங்கலம் அருகில் உள்ள கொத்தமங்கலம் தெற்கு பகுதியைச் சேர்ந்த குணசேகரன் என்பவரின் மகன் பிரசாந்த் (29). கடந்த புதன்கிழமை இரவு அந்த ஊரில் நடந்த கோவில் திருவிழா பார்க்கச் சென்றவர் வீடு திரும்பவில்லை. ஆனால் அவரது பைக் கோவிலில் நின்றது.

இதுகுறித்து அவரது தந்தை குணசேகரன் கொடுத்த புகாரின் பேரில் பிரசாந்தின் செல்போன் கால் பதிவுகள் பட்டியல் பெற்று போலீசார் விசாரணை செய்து வந்தனர். அவர் கடைசியாக பேசிய நபரிடம் விசாரணை செய்யப்பட்டது. ஆனால் காணாமல் போன இளைஞரை கண்டுபிடிக்க கோரி உறவினர்கள் சாலை மறியல் செய்தனர்.

இந்நிலையில், அப்பகுதியில் உள்ள புதர் பகுதிகள், கிணறுகளில் கீரமங்கலம் போலீசார் தலைமைக் காவலர் கணபதி தலைமையில் தேடிவந்தனர். வெள்ளிக்கிழமை இரவு கோவில் அருகில் உள்ள விவசாயக் கிணற்றில் ஒரு ஆண் சடலம் மற்றும் செருப்புகள் மிதப்பதை அறிந்து கீரமங்கலம் தீயணைப்பு வீரர்கள் உதவியுடன் சடலத்தை மீட்டனர். அது காணாமல் போன பிரசாந்த் உடல் தான் என்பது உறுதி செய்யப்பட்டது. உள்ளாடை மற்றும் சட்டையுடன் கிடந்த பிரசாந்த்தின் சடலம் பிரேதப் பரிசோதனைக்காக புதுக்கோட்டை மருத்துவக் கல்லூரிக்கு அனுப்பி வைக்கப்பட்டது.

புதன்கிழமை இரவு காணாமல் போன இளைஞர்கள் 2 நாட்களுக்கு பிறகு சடலமாக மீட்கப்பட்ட சம்பவம் பரபரப்பை ஏற்படுத்தியுள்ளது.

Next Story

முன்னாள் சிறப்பு டிஜிபி ராஜேஷ் தாஸ் கைது!

Published on 24/05/2024 | Edited on 24/05/2024
Former Special DGP Rajesh Das arrested

தமிழகத்தின் மூத்த ஐஏஎஸ் அதிகாரியான பீலா வெங்கடேசன் கேளம்பாக்கம் அடுத்த தையூர் பகுதியில் உள்ள தனது பண்ணை வீட்டில் வசித்து வருகிறார். இவரின் முன்னாள் கணவரான தமிழகத்தின் ஓய்வுபெற்ற முன்னாள் சிறப்பு டிஜிபி ராஜேஷ் தாஸ் கடந்த 21 ஆம் தேதி அவரின் நண்பர்களுடன் பீலா வெங்கடேசனின் பண்ணை வீட்டிற்கு சென்று தகராறில் ஈடுபட்டதாக கூறப்படுகிறது. இதையடுத்து கேளம்பாக்கம் காவல் நிலையத்தில் பீலா வெங்கடேசன் இது குறித்து புகார் அளித்தார். இந்தப் புகாரின் பேரில் போலீசார், ராஜேஷ் தாஸ் மீது கொலை மிரட்டல், சட்ட விரோதமாகக் கூடுதல், தாக்குதல் உள்ளிட்ட 5 பிரிவுகளில் வழக்குப் பதிவு செய்தனர்.

இதற்கிடையே ராஜேஷ் தாஸ் வசித்து வரும் வீட்டில் கடந்த 20 ஆம் தேதி மின் இணைப்பு துண்டிக்கப்பட்டதாகக் கூறப்படுகிறது. பீலா வெங்கடேசன் தமிழக அரசின் எரிசக்தித் துறையின் முதன்மை செயலாளராக இருப்பதால் அவரது அதிகாரத்தைப் பயன்படுத்தித்தான் வீட்டின் மின் இணைப்பு துண்டிக்கப்பட்டதாக ராஜேஷ் தாஸ் தரப்பில் இருந்து குற்றம் சாட்டப்பட்டிருந்தது. அதே சமயம் ராஜேஷ் தாஸ் வசித்து வரும் வீட்டின் மின் இணைப்பு பதிவு பீலா வெங்கடேசன் பெயரில் இருந்ததாகவும் கூறப்படுகிறது. இத்தகைய சூழலில் தற்போது அவர் மின் இணைப்பு வேண்டாம் எனக் கூறி அளித்த மனுவின் மீது நடவடிக்கை எடுக்கும் பொருட்டு மின் இணைப்பு துண்டிக்கப்பட்டுள்ளதாகவும் மின்வாரிய அதிகாரிகள் தரப்பில் தெரிவிக்கப்பட்டது. 

Former Special DGP Rajesh Das arrested

இந்நிலையில் வீட்டுக் காவலாளியைத் தாக்கிய வழக்கில் முன்னாள் சிறப்பு டிஜிபி ராஜேஷ்தாஸ் கேளம்பாக்கம் போலீசாரால் இன்று (24.05.2024) காலை கைது செய்யப்பட்டுள்ளார். அதன்பின்னர் அவரை கேளம்பாக்கம் காவல் நிலையம் அழைத்து வந்து போலீசார் விசாரணை நடத்தி வருகின்றனர்.

தமிழக காவல் துறையில் பணியாற்றும் பெண் காவல் கண்காணிப்பாளருக்குக் கடந்த 2021 ஆம் ஆண்டு பாலியல் தொந்தரவு கொடுத்ததாக அளிக்கப்பட்ட புகாரில் முன்னாள் சிறப்பு டிஜிபி ராஜேஷ் தாஸ் மீது வழக்குப் பதிவு செய்யப்பட்டது. அதில் அவருக்கு மூன்று ஆண்டுகள் சிறைத் தண்டனை விதித்து விழுப்புரம் குற்றவியல் நடுவர் நீதிமன்றம் தீர்ப்பளித்தது. இந்த தீர்ப்பை விழுப்புரம் முதன்மை அமர்வு நீதிமன்றம் உறுதி செய்தது. இதனையடுத்து ராஜேஷ் தாஸ் தனக்கு வழங்கப்பட்ட தண்டனையை நிறுத்தி வைக்க வேண்டும் என உச்ச நீதிமன்றத்தில் முறையீடு செய்தார். இந்த வழக்கில் உச்ச நீதிமன்றம் ராஜேஷ் தாஸை கைது செய்ய இடைக்காலத் தடை விதித்திருந்தது குறிப்பிடத்தக்கது.