மர்ம நபர்களால் ஆசிரியர் படுகொலை; நடைப்பயிற்சி சென்ற நேர்ந்த சோகம்!

தென்காசி மாவட்டம் பழங்கோட்டை அருகே நேற்று இரவு சாலையில் ஆசிரியர் ஒருவர், மர்ம நபர்களால் வெட்டி படுகொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது.

தூத்துக்குடி மாவட்டம் கழுகுமலை மாரியப்பன் கோவில் தெரு பின்புறம் சி.ஆர்.காலனி பகுதியைச் சேர்ந்த கணபதி என்பவரது மகன் சுதந்திரகுமார் (43). இவர் நேற்று மாலை 5.30 மணிக்கு வீட்டை விட்டு வெளியே சென்ற அவர் சி.ஆர்.காலனியில் இருந்து நடைப்பயிற்சி சென்றதாகவும் கூறப்படுகிறது. அப்போது, பழங்கோட்டை கிராமத்துக்கு செல்லும் வழியில் உள்ள காமாட்சிகுளம் செல்லும் மண் பாதையில் அருகே வைத்து மர்ம நபர்கள் சிலர், சுதந்திரகுமாரை சரமாரியாக வெட்டிக் கொலை செய்துவிட்டு தப்பி ஓடினர். இது பற்றி தகவல் கிடைத்ததும் குருவிகுளம் போலீசார், சுதந்திரகுமாரின் உடலை கைப்பற்றி பிரேதப் பரிசோதனைக்காக கோவில்பட்டி அரசு மருத்துவமனைக்கு அனுப்பி வைத்தனர்.

சுதந்திரகுமார் எதற்காக வெட்டி கொலை செய்யப்பட்டார்? என்பதை பற்றி குருவிகுளம் போலீசார் வழக்கு பதிவு செய்து விசாரணை நடத்தி வருகிறார்கள். முதற்கட்ட விசாரணையில்  சுதந்திரகுமார் தஞ்சாவூர் மாவட்டம் தொண்டைமான் புதுக்கோட்டையில் உள்ள ஒரு பெண்ணை திருமணம் செய்து சில நாட்களில் பிரிந்து விட்டதாகவும், பின்பு விவகாரத்து ஆகி ஏழு ஆண்டுகள் ஆனதும் தெரிய வந்துள்ளது. தற்போது அவர் திருப்பூர் தனியார் பள்ளி ஒன்றில் ஆசிரியராக பணிபுரிந்து வந்த நிலையில், கடந்த 4 மாதத்திற்கு முன்பு ஆசிரியர் தகுதித் தேர்வுக்கு தயாராகுவதற்காக வீட்டிற்கு வந்துள்ளார் என்பதும் முதற்கட்ட விசாரணையில் தெரியவந்துள்ளது.

மேலும், கொலை நடந்த இடத்தில் இருந்து சுமார் 100 மீட்டர் அளவில் ஒரு இருசக்கர வாகனம் நின்றுள்ளது. சம்பவ இடத்தில் மதுபாட்டில்கள் கிடந்தது கண்டுபிடிக்கப்பட்டுள்ளது. அந்த இருசக்கர வாகனம் யாருடையது? என்பது குறித்தும், கொலைக்கான காரணம் என்ன? என்பது குறித்தும் குருவிகுளம் காவல்துறையினர் தீவிர விசாரணை நடத்தி வருகின்றனர்.