“தேசிய கீதம் எழுதப்பட்ட மொழிக்கு இது நேரடியாக அவமானம்” - முதல்வர் மு.க.ஸ்டாலின் கண்டனம்!

மத்திய அரசின் கட்டுப்பாடில் உள்ள டெல்லி காவல் துறை வங்க மொழியை வங்கதேச மொழி என்று கூறியதால் சர்ச்சை எழுந்திருக்கிறது. இந்த விவகாரத்தில் மேற்கு வங்க முதல்வர் மம்தா பானர்ஜியும், தமிழக முதல்வர் மு.க.ஸ்டாலினும் கண்டனம் தெரிவித்துள்ளனர்.

வங்கதேச நாட்டில் இருந்து சட்டவிரோதமாக இந்தியாவில் குடியேறிருக்கிறார்களா இல்லையா? என்பதற்கான நடவடிக்கைகளை மத்திய அரசின் கட்டுப்பாட்டில் உள்ள டெல்லி காவல் துறை தொடர்ந்து நடத்தி வருகிறார்கள். இந்த நடவடிக்கையின் ஒரு பகுதியாக வங்கதேசத்தில் இருந்து சட்டவிரோதமாக குடியேறியவர்கள் என்று சந்தேகிக்கப்படும் 8 நபர்களை டெல்லி காவல்துறை கைது செய்தது. அதனை தொடர்ந்து, கைது செய்யப்பட்டவர்களின் ஆவணங்களில் எழுதப்பட்ட வங்கதேச மொழியை மொழிபெயர்க்க உதவ வேண்டும் என மேற்கு வங்காள அரசின் இல்லமான பங்கா பவனுக்கு டெல்லி காவல்துறை கடிதம் எழுதியுள்ளது.

அதில், ‘செல்லுபடியாகும் பாஸ்போர்ட் அல்லது விசா இல்லாமல் இந்தியாவில் சட்டவிரோதமாக வசிக்கும் வங்கதேச நாட்டவர்கள் என கடுமையாக சந்தேகிக்கப்படும் 08 நபர்கள் கைது செய்யப்பட்டனர். விசாரணையில், இந்த சந்தேகத்திற்குரிய வங்கதேச நாட்டவர்களிடமிருந்து தேசிய அடையாள அட்டைகள், பிறப்புச் சான்றிதழ்கள், வங்கிக் கணக்கு விவரங்கள் போன்றவற்றின் நகல்கள் கண்டுபிடிக்கப்பட்டன. சந்தேகத்திற்குரிய வங்கதேச நாட்டவர்கள் கைது செய்யப்பட்டு, சம்பந்தப்பட்ட நீதிமன்றத்தின் உத்தரவின் பேரில் நீதிமன்றக் காவலில் வைக்கப்பட்டனர்.அடையாள ஆவணங்களில் வங்கதேச மொழியில் எழுதப்பட்ட உரைகள் உள்ளன. அவை இந்தி மற்றும் ஆங்கிலத்தில் மொழிபெயர்க்கப்பட வேண்டும். விசாரணையை மேலும் தொடர, மேற்கூறிய நோக்கத்திற்காக வங்கதேச தேசிய மொழியில் தேர்ச்சி பெற்ற ஒரு அதிகாரப்பூர்வ மொழிபெயர்ப்பாளரை வழங்குமாறு கேட்டுக் கொள்ளப்படுகிறது. விசாரணையை எதிர்கொள்ளும் சந்தேகத்திற்குரிய வங்கதேச நாட்டவர்கள் மீது வழக்குத் தொடர தேவையான அறிக்கை ஒரு முக்கிய ஆதாரமாக இருக்கும் என்பதில் வலியுறுத்தப்படுகிறது’ எனத் தெரிவிக்கப்பட்டுள்ளது.

மேற்கு வங்கத்தின் அலுவல் மொழியாக வங்காள மொழி இருக்கும் பட்சத்தில், வங்காள மொழி என குறிப்பிடாமல் வங்கதேச மொழி என டெல்லி போலீசார் குறிப்பிட்டிருந்தது தற்போது சர்ச்சையை ஏற்படுத்தியுள்ளது. இதற்கு கண்டனம் தெரிவித்த மேற்கு வங்க முதல்வர் மம்தா பானர்ஜி, “இந்திய அரசின் உள்துறை அமைச்சகத்தின் நேரடி கட்டுப்பாட்டின் கீழ் உள்ள டெல்லி காவல்துறை, வங்காள மொழியை வங்காளதேச மொழி என்று எப்படி விவரிக்கிறது என்பதைப் பாருங்கள். ரவீந்திரநாத் தாகூர் மற்றும் சுவாமி விவேகானந்தரின் தாய்மொழியான வங்காள மொழி, நமது தேசிய கீதம் மற்றும் தேசியப் பாடல் எழுதப்பட்ட மொழி, கோடிக்கணக்கான இந்தியர்கள் பேசும் மற்றும் எழுதும் மொழி, இந்திய அரசியலமைப்பால் புனிதப்படுத்தப்பட்ட மற்றும் அங்கீகரிக்கப்பட்ட மொழி, இப்போது வங்காள மொழி என்று விவரிக்கப்பட்டுள்ளது.

அவதூறான இந்த செயல் அவமதிக்கும், தேச விரோத மற்றும் அரசியலமைப்பிற்கு விரோதமானது. இது இந்தியாவின் அனைத்து வங்காள மொழி பேசும் மக்களையும் அவமதிக்கிறது. நம் அனைவரையும் இழிவுபடுத்துகிறது. இந்தியாவின் வங்காள மொழி பேசும் மக்களை அவமதிக்கவும் அவமானப்படுத்தவும் இதுபோன்ற அரசியலமைப்பு விரோத மொழியைப் பயன்படுத்தும் இந்திய வங்காள எதிர்ப்பு அரசுக்கு எதிராக அனைவரிடமிருந்தும் உடனடியாக வலுவான எதிர்ப்புகளை நாங்கள் வலியுறுத்துகிறோம்” எனத் தெரிவித்துள்ளார்.

மம்தா பானர்ஜியின் பதிவை சுட்டிக் காட்டி தமிழக முதல்வர் மு.க.ஸ்டாலின் தனது கண்டனத்தைப் பதிவு செய்துள்ளார். இது தொடர்பாக அவர் தனது எக்ஸ் பக்கத்தில் தெரிவித்துள்ளதாவது, “மத்திய உள்துறை அமைச்சகத்தின் கீழ் உள்ள டெல்லி காவல்துறை, வங்காள மொழியை வங்காள மொழி என்று குறிப்பிட்டுள்ளது. இது நமது தேசிய கீதம் எழுதப்பட்ட மொழிக்கே இழைக்கப்படும் நேரடி அவமானமாகும். டெல்லி காவல்துறையின் இந்த செயலை தற்செயலான பிழைகளோ அல்லது தவறுகளோ அல்ல. பன்முகத்தன்மையை தொடர்ந்து குறைத்து மதிப்பிடும்  மற்றும் அடையாளத்தை ஆயுதமாக்கும் ஒரு ஆட்சியின் இருண்ட மனநிலையை அவை அம்பலப்படுத்துகின்றன.இந்தி அல்லாத மொழிகள் மீதான இந்த தாக்குதலை எதிர்கொள்ளும் போது, மேற்கு வங்காள மொழிக்கும் மக்களுக்கும்  மேற்கு வங்க முதல்வர் மம்தா பானர்ஜி ஒரு கேடயமாக நிற்கிறார். தகுந்த பதிலடி இல்லாமல் இந்த தாக்குதலை அவர் கடந்து செல்ல விடமாட்டார்” எனத் தெரிவித்துள்ளார்.