இலங்கை விமான நிலையத்தில் தமிழர்கள் சிக்கித் தவிப்பு!

இலங்கையில் கடந்த சில தினங்களாக அதி கனமழையானது பெய்து வருகிறது. அதிலும் குறிப்பாக இலங்கையின் தென்பகுதிகளில் நேற்று முன்தினம் (27.11.2025) பெய்த அதிக கனமழை காரணமாக பல்வேறு இடங்களில் நிலச்சரிவு மற்றும் வெள்ளப்பெருக்கு ஏற்பட்டது. இதனால் ஏராளமானோர் பரிதாபமாக உயிரிழந்தனர். மேலும் பலரை காணவில்லை என்ற தகவலும் வெளியாகியிருந்தது. அதோடு காயமடைந்த நூற்றுக்கணக்கானோர் மருத்துவமனையில் அனுமதிக்கப்பட்டு அவர்களுக்குச் சிகிச்சையானது அளிக்கப்பட்டு வருகிறது. 

தொடர்ச்சியாகக் கனமழை பெய்ததன் காரணமாக மக்களின் இயல்பு வாழ்க்கை பெரிதும் பாதிக்கப்பட்டுள்ளது. கடந்த நாட்களாக நாட்டின் பல பகுதிகளில் பெய்த தொடர் கனமழை காரணமாகத் தாழ்வான பகுதிகள் மழை நீர் தேங்கியுள்ளது. இதனால் பொதுமக்கள் மொட்டை மாடிகளில் தஞ்சம் புகுந்துள்ளனர். இதனையடுத்து பாதிக்கப்பட்டவர்களை ஹெலிகாப்டர் மூலமாக மீட்கும் பணியும் நடைபெற்று வருகிறது. இத்தகைய சூழலில் தான் டிட்வா புயலால் இலங்கையில் பெய்த கனமழை மற்றும் நிலச்சரிவில் சிக்கி உயிரிழந்தவர்களின் எண்ணிக்கை 85ஆக உயர்ந்துள்ளது. மேலும், 21 பேரைக் காணவில்லை எனவும் தகவல் வெளியாகியுள்ளது.

அதோடு 600க்கும் மேற்பட்ட வீடுகள் சேதமடைந்துள்ளன. சுமார் 44 ஆயிரத்திற்கும் மேற்பட்ட மக்கள் பாதிக்கப்பட்டுள்ளனர். இதனால், வெள்ளம் பாதித்த பகுதிகளில் மீட்புப் பணிகளுக்காக 20 ஆயிரத்து 500 ராணுவ வீரர்கள் களமிறக்கப்பட்டுள்ளனர் எனத் தகவல் வெளியாகியுள்ளது. முன்னதாக குவைத் நாட்டில் இருந்து சென்னைக்கு இலங்கை வழியாக விமானம் மூலம் 150க்கு மேற்பட்ட பயணிகள் இலங்கையின் மத்தலை என்ற விமான நிலையத்திற்கு நேற்று முன்தினம் (27.11.2025) வந்துள்ளனர். இத்தகைய சூழலில் தான் அங்குப் புயலின் காரணமாக விமானச் சேவைகள் நிறுத்தப்பட்டன. 

இதன் காரணமாக ஒரு நாள் முழுவதும் பயணிகள் பெரிதும் அவதிக்கு உள்ளாகினர். அதன் பின்னர் நேற்று  (28.11.2025) அவர்கள் அனைவரும் அங்கிருந்து கொழும்பு விமான நிலையம் அழைத்து வரப்பட்டனர். அங்கு 100க்கும் மேற்பட்ட தமிழர்கள் உள்ளிட்ட 150க்கும் மேற்பட்டோர் 2 நாட்களாகத் தவித்து வருகின்றனர். பயணிகளுக்குத் தேவையான உணவு உள்ளிட்ட அத்தியாவசிய பொருட்கள் கூட வழங்கப்படவில்லை என்ற குற்றம் சாட்டும் எழுந்துள்ளது. மேலும் குழந்தைகள், முதியவர்கள் மற்றும் நோயாளிகள் எனப் பலரும் பெரும் சிரமத்திற்கு உள்ளாகி உள்ளாகியுள்ளனர். 

எனவே உடனடியாக இந்தியத் தூதரகத்தின் மூலம் தங்களை மீட்டு சென்னைக்கு அழைத்து வர ஏற்பாடு செய்ய வேண்டும் எனக் கோரிக்கை விடுத்துள்ளனர். அதோடு குடிநீர், உணவு மற்றும் பால் உள்ளிட்ட அத்தியாவசிய தேவைகளை உடனடியாக பூர்த்தி செய்ய வேண்டும் எனவும்  கண்ணீர் மல்கக் கோரிகை விடுத்துள்ளனர். மற்றொருபுறம் விமான நிலைய அதிகாரிகளிடம் பயணிகள் கடும் வாக்குவாதத்தில் ஈடுபட்டதும் குறிப்பிடத்தக்கது.