கவின் கொலை வழக்கு; மீண்டும் ஆஜர்படுத்தப்பட்ட சுர்ஜித்

கடந்த ஜூலை 27 ஆம் தேதி தூத்துக்குடி மாவட்டம் ஆறுமுகமங்கலம் பகுதியைச் சேர்ந்த ஐடி ஊழியர் கவின் என்பவர் மாற்று சமூகத்தை சேர்ந்த பெண்ணை காதலித்து வந்ததால் ஆணவக் கொலை செய்யப்பட்ட சம்பவம் பரபரப்பை ஏற்படுத்தி இருந்தது. தன் சகோதரியை காதலித்து வந்த மாற்றுச் சமூக இளைஞரான கவினை கொலை செய்த சம்பவத்தில் பெண்ணின் சகோதரர் சுர்ஜித் கைது செய்யப்பட்டார். தொடர்ந்து இந்த சம்பவத்தில் சுர்ஜித்தின் தந்தைக்கும் தொடர்பு இருக்கும், எனவே அவரையும் கைது செய்து விசாரிக்க வேண்டும் என கவினின் குடும்பத்தார் போராட்டத்தில் ஈடுபட்டதைத் தொடர்ந்து காவல் உதவி ஆய்வாளராக பணியாற்றி வந்த சுர்ஜித்தின் தந்தை சரவணனும் கைது செய்யப்பட்டார்.

தமிழகத்தில் பரபரப்பை ஏற்படுத்திய இந்த வழக்கை சிபிசிஐடி போலீசார் விசாரித்து வருகின்றனர். நீதிமன்றத்தின் அனுமதியை பெற்று கொலை வழக்கில் கைது செய்யப்பட்டுள்ள சுர்ஜித் மற்றும் அவரது தந்தை சரவணனனை  கஸ்டடியில் எடுத்து சிபிசிஐடி விசாரணை நடத்தினர். பலத்த பாதுகாப்புடன் கொலை நடந்த இடத்திற்கு சுர்ஜித்தை அழைத்து வந்த சிபிசிஐடி போலீசார் கொலை எவ்வாறு திட்டமிட்டு நிகழ்த்தப்பட்டது என்பது தொடர்பாக விசாரித்தனர். சுர்ஜித் கொலை எவ்வாறு நிகழ்ந்தபட்டது என்பது தொடர்பாக  நடித்துக் காட்டினார். இதனை வீடியோவாக சிபிசிஐடி போலீசார் பதிவு செய்து கொண்டனர்.

தொடர்ந்து கவினை காதலித்து வந்த பெண் மற்றும் அவரது தாயாரிடம் சிபிசிஐடி போலீசார் நடத்திய விசாரணையின் அடிப்படையில் சுர்ஜித்தின் சித்தி மகன் ஜெயபாலன் என்ற நபரை ஆகஸ்ட் 13 ஆம் தேதி போலீசார் கைது செய்தனர். இக்கொலைக்கு உதவி புரிந்ததன் அடிப்படையில் கைது செய்யப்பட்ட நிலையில் இந்த கொலை வழக்கில் கைது எண்ணிக்கை மூன்றாக உயர்ந்தது. இந்நிலையில் இந்த கொலை வழக்கில் கைது செய்யப்பட்டவர்களின் நீதிமன்ற காவல் இன்றுடன் முடிவடைந்த நிலையில் சுர்ஜித், சரவணன் ஆகிய இருவரும் இன்று நெல்லை வன்கொடுமை தடுப்பு சிறப்பு நீதிமன்றத்தில் இன்று ஆஜர்படுத்தப்பட்டுள்ளனர். மீண்டும் இருவருக்கும் நீதிமன்ற காவல் நீட்டிக்கப்படுமா அல்லது போலீசார் காவலில் எடுத்து விசாரிக்க மீண்டும் வாய்ப்புள்ளதா என்பது விசாரணைக்கு பின்னரே தெரியவரும்.