“சில முன்னாள் அமைச்சர்கள் தவெகவுக்கு வருவார்கள்” - ஆதரவாளர்கள் முன்னிலையில் செங்கோட்டையன் பேச்சு!

அதிமுகவில் இருந்து நீக்கப்பட்ட முன்னாள் அமைச்சர் செங்கோட்டையன், விஜய்யின் தமிழக வெற்றிக் கழகத்தில் நேற்று (27.11.2025) காலை இணைந்தார். சென்னையை அடுத்துள்ள பனையூரில் அமைந்துள்ள த.வெ.க. தலைமை அலுவலகத்தில் நடைபெற்ற புதிய உறுப்பினர்கள் இணையும் நிகழ்ச்சியில் அக்கட்சியின் தலைவர் விஜய் முன்னிலையில், செங்கோட்டையன் த.வெ.க.வில் இணைத்துக் கொண்டார். இதனையடுத்து தவெக கட்சியின் கழக உயர்மட்ட மாநில நிர்வாகக் குழுவின் தலைமை ஒருங்கிணைப்பாளராக (Chief Coordinator) செங்கோட்டையன் நியமிக்கப்பட்டார். மேலும் ஈரோடு, கோயம்புத்தூர், திருப்பூர், நீலகிரி ஆகிய மாவட்டங்களுக்கு அமைப்புச் செயலாளராகவும் நியமிக்கப்பட்டார்.

இந்த சூழலில், இன்று சென்னையில் இருந்து கோவை விமான நிலையத்துக்கு வந்த போது செங்கோட்டையனை, அங்கு காத்து கொண்டிருந்த ஏராளமான தவெக தொண்டர்கள் வரவேற்றனர்.   அதனை தொடர்ந்து, கோவையில் இருந்து தனது சொந்த தொகுதியான ஈரோடு மாவட்டம் கோபிசெட்டிபாளையத்துக்கு செங்கோட்டையன் சென்றார். அங்கும், சாலை நெடுக அவரை தவெக தொண்டர்கள் மற்றும் அவரது ஆதரவாளர்கள் பட்டாசு வெடித்து மிகுந்த கொண்டாட்டத்தோடு வரவேற்றனர்.    

அங்கு குழுமியிருந்த தவெக தொண்டர்கள் மற்றும் தனது ஆதரவாளர்கள் முன்னிலையில் காரில் இருந்த போது செங்கோட்டையன் உரையாற்றியதாவது, “முதல் முறையாக எம்.ஜி.ஆருடன் சென்று வெற்றி என்ற இலக்கை அடைந்தோம். இரண்டாம் முறை ஜெயலலிதாவோடு சென்று வெற்றி என்ற இலக்கை நாங்கள் ஏற்றினோம். மூன்றாவது தலைமுறையாக இருக்கிற இளவல் தமிழக வெற்றிக் கழகத் தலைவர், மக்கள் வெள்ளத்தில் மிதந்து கொண்டிருக்கிற அவர் 2026இல் மக்கள் சக்தியால் முதலமைச்சராக அமர போகிறார். 40 ஆண்டு காலம் அரசியல் வரலாற்றில் இவர் என்ன செய்தார்? என்று என்னை பார்த்து சொல்கிறார்கள்.  தனக்கும் தன் குடும்பத்திற்கும் யாருக்காவது எதையாவது செய்திருக்கிறாரா? மக்களுக்கு சேவை செய்திருக்கிறாரா? தொண்டர்களுக்கு செய்திருக்கிறரா? என்று ஒரு அறிவாளி (எடப்பாடி பழனிசாமி) பேசியிருக்கிறார். அவருடைய கட்சி (அதிமுக) எங்கே இருக்கிறது என்ற நிலை தான் இப்போது இருக்கிறது. ஒரு முறையாவது நீங்கள் வெற்றி பெற்றிருக்கிறீரா என்று மக்கள் கேட்டு கொண்டிருக்கிறார்கள். நீங்கள் ஆட்சிக்கு வந்ததற்கு பிறகு ஜெயலலிதாவுடைய துணையால் 2017இல் இருந்து ஆரம்பித்தீர்கள். அதற்கு பிறகு உங்கள் வெற்றி என்ற நிலை ஏதாவது ஒரு முறையாவது வந்திருக்கிறதா? என்பதை அவர் தான்  சொல்ல வேண்டும்.  நான் அவரை பற்றி சொல்ல விரும்பவில்லை. 

நாளை நம்முடைய எதிர்காலம் எப்படி  இருக்கிறது என்றால், பிரகாசமான எதிர்காலமாக மாற இருக்கிறது. என்னை வரவேற்க 5 மணி நேரம் காத்திருக்கிறீர்கள் என்றால் உங்களை வெல்வதற்கு எந்த சக்தியாலும் முடியாது. விஜய் முதல்வராவதை எந்த சக்தியாலும் தடுக்க முடியாது. உங்கள் தலைவரை சந்திக்க முடியுமா என்று எல்லோரும் சொன்னார்கள். எங்களோடு வந்த 100 பேரையும் ஒன்னே கால் மணி நேரத்தில் அவர்களுக்கு சால்வை அணிவித்து துண்டை போட்டு அரவணைத்து ஒரு வரலாறு படைத்த தலைவர் தான் நமது தலைவர் என்பதை மறந்துவிடாதீர்கள்.  நாளை எதிர்காலத்தை நோக்கி நாம் பயணம்  செய்ய போகிறோம். நாளை எதிர்காலம் மட்டுமல்ல,  வரலாற்றை படைக்க போகிறோம்.    ஆண்ட ஆட்சிகளை ஆள வேண்டுமா?  புதிய தலைவரை ஒருவர் உருவாக்க வேண்டாமா? வேண்டும். ஏறத்தாள ஆண்டிற்கு 500 கோடி ரூபாய் திரைப்படத்தில்  நடித்தால் கிடைக்கும்.  தேவையில்லை , மக்கள் பணியாற்றுவதற்கு நான் தயாராக  இருக்கிறேன் என்று இங்கு வந்திருக்கிறார்.  

தூய்மையான ஆட்சி, மக்கள் ஆட்சி  தமிழகம் அமைதி பூங்கா காண்வதற்கு பேரிஞர் அண்ணா  சொன்னதை போல, எம்.ஜி.ஆர் சொன்னதை போல, ஜெயலலிதா சொன்னதை போல ஆட்சி அமையும். இன்னும் ஜெயலலிதா படத்தை வைத்துக் கொண்டிருக்கிறீர்கள் என்று கேட்டார்கள். ஜனநாயகம் இங்கே  இருக்கிறது, யார் படத்தை  வேண்டுமானாலும் வைத்துக்கொள்ளலாம். அங்கே உங்கள் படத்தை வைத்தால் தான் சிரிப்பீர்கள் . ஆனால் எங்களை போன்றவர், எந்த படத்தை வைத்துக்  கொண்டாலும் அரவணைத்து செல்கிற தலைவராக  தலைவர் இருப்பார்.  50 ஆண்டு காலம் எம்.ஜி.ஆர், ஜெயலலிதாவுடைய படத்தை வைத்து கொண்டிருந்த  நான், ஒரே நாளில் இந்த படத்தை மாற்றி இருந்தால் துரோகி என்று எழுதி இருப்பீர்கள்.   துரோகம் இங்கே இந்த தமிழகத்தில்,  அதுவும் தமிழக வெற்றி கழகத்தில்  எந்த வரலாறும் இல்லை. எங்களை பொறுத்தவரையிலும்   எங்களிடத்தில் இருப்பது,  எங்களிடத்திலே கொடுக்கப்பட வேண்டியது  என்னென்றால்,  நாங்கள் இங்கே தர்மத்தை காக்கிறோம்.  

தர்மத்தை மட்டுமல்ல,  எல்லோரும் எல்லாம் பெற வேண்டும் என்ற  நோக்கத்தோடு ஜாதி மத பேதமற்ற சமுதாயத்தை தமிழகத்தில் அமைப்பதற்கு  ஊழலற்ற ஆட்சியை அகற்றுவதற்கு தமிழகத்தில் புனித  ஆட்சியை கொண்டு வருவதற்கு இங்கே  சுதந்திரமாக நீங்கள் பணி ஆற்றலாம்  என்று விஜய் என்னை அரவணைத்து சொன்னார் . இங்கு இருக்கும் இளைஞர்களை பார்க்கும் போது  உங்களோடு சேர்ந்து நானும் இந்த பணியில்  ஆற்றுகிற நல்ல வாய்ப்பு எனக்கு  கிடைத்திருக்கிறது. நீங்கள் கவலைப்பட தேவையில்லை.  விஜய் வருகிற போது நான் அவருக்கு வழிகாட்டியாக  இருப்பேன்.    இளைஞர்களாக இருக்கிற நீங்கள் இங்கே  வருகிற போது அத்தனை பேரையும் நான் பார்க்கிறேன். அத்தனையும் கருப்பு  முடிகளாகதான் தலை இருக்கிறது.  ஏனென்றால்,  நீங்கள் அசைந்தால் தமிழகம் அசையும்.  நீங்கள் நினைத்தால்,  தமிழக மக்களுக்கு பணியாற்ற முடியும்.

எனக்கு வந்த முதலமைச்சர் என்ற வாய்ப்பை அவருக்கு முன்மொழிந்தேன். ஆனால் அங்கே மனித நேயம் இல்லை, சமத்துவம்  அங்கே இல்லை. 50 ஆண்டு கால  அரசியல் வரலாற்றில்  நான் உழைத்த உழைப்பு எல்லோருக்கும்  தெரியும். ஆனால் , சாதாரண தொண்டனாக கூட இருக்கக்கூடாது என்று  உறுப்பினர் பதவியில் இருந்து என்னை எடுத்தார். என்னோடு  இருக்கின்றவர் அத்தனை பேரையும் எடுத்தார்.  அதோடு நிற்கவில்லை, காங்கேயத்தில் ஒரு கிளைச் செயலாளர் இறந்து விஷயம் கேட்டு அவருடைய மருமகனிடம் இரங்கல் தெரிவித்தேன். அதை பார்த்தவுடன் நீ ஏன் அவரை அனுமதித்தாய் எனவேம் உன்னை அடிப்படை உறுப்பினர் பதவியில் இருந்து நீக்குகிறேன் என்று அவரையும் நீக்கினார். இதைவிட வெட்கக்கேடான செயல் தமிழ்நாட்டில் எங்கும் நடைபெற்றிருக்காது.  துக்கத்தை விசாரிக்க சென்றதற்கே  உறுப்பினர் பதவியை எடுக்கிறார் என்றால், இவரெல்லாம் நாளைக்கு ஆட்சிக்கு  வந்தால் என்ன ஆகும் என்பதை நீங்கள் தான்  தீர்மானிக்க வேண்டும். நாம் ஆட்சிக்கு  வருவதும் யார் என்பதை நாம் முடிவு செய்ய வேண்டும்.

உங்களை பொறுத்தவரையிலும்,  உங்களுடைய தளபதிதான்.   நீங்கள் சொல்கிறீர்கள் அவரை தளபதி என்று...  நானும் சொல்கிறேன் அவர் ஆட்சி  தலைவர். அந்த  சக்தியை தமிழ்நாட்டில் எவராலும் அசைத்துவிட முடியாது. காலங்கள் கணிந்து கொண்டிருக்கிறது, நாட்கள் எண்ணப்பட்டு வருகிறது. டிசம்பர் மாதத்திற்குள் நம்மோடு  கூட்டணி வலுமையாக வரும்.  நம்மோடு இன்னும் பல அமைச்சர்களும், முன்னாள் அமைச்சர்களும் வருவார்கள் . நீங்கள் கவலைப்பட தேவையில்லை. உங்களுக்காக  நாங்கள் உறுதுனையாக இருப்போம்.  கரத்தை வலுப்படுத்துவோம். 30 ஆண்டு காலம் நீங்கள்  உழைத்திருக்கிறீர்கள். உங்கள் கண்ணீரை துடைப்பதற்கு உங்களோடு உறுதணையாக நாங்கள் நிற்போம். நீங்கள் கவலைப்பட தேவையில்லை.  நாங்கள் வந்துவிட்டோம், நீங்கள்  கவலைப்பட தேவையில்லை. உங்கள் சகோதரர்களாக இருந்து பணிகளை நாங்கள் ஆற்றுவோம். நீங்கள் கவலைப்பட தேவையில்லை.   இந்த நாட்டில்  நான் என்று ஒருவன் நினைத்தால், ஆண்டவன் தான் என்று காட்டி விடுவான். ஆகவே ஆண்டவன் வருவார் வெற்றியை சூடுவான்,  நாளை ஆட்சி வரப் போகிறது” என்று பேசினார்.