'அ.தி.மு.க.- தி.மு.க. தேர்தல் அறிக்கையில் ஒரே வாக்குறுதிகள்'!

தமிழக சட்டமன்றத் தேர்தலுக்கான வாக்குப்பதிவு ஏப்ரல் 6- ஆம் தேதி நடைபெறுகிறது. இதற்கான வேட்பு மனுத்தாக்கல் கடந்த மார்ச் 12- ஆம் தேதி தொடங்கியது.

இந்த நிலையில் தமிழக சட்டமன்றத் தேர்தலுக்கான தி.மு.க.வின் தேர்தல் அறிக்கையை அக்கட்சியின் தலைவர் மு.க.ஸ்டாலின் நேற்று (13/03/2021) வெளியிட்டிருந்த நிலையில், அ.தி.மு.க.வின் தேர்தல் அறிக்கையை இன்று (14/03/2021) கட்சியின் இணை ஒருங்கிணைப்பாளரும், தமிழக முதல்வருமான எடப்பாடி பழனிசாமி மற்றும் கட்சியின் ஒருங்கிணைப்பாளரும், தமிழக துணை முதல்வருமான ஓ.பன்னீர்செல்வம் ஆகியோர் கூட்டாக வெளியிட்டனர்.

அ.தி.மு.க.- தி.மு.க. தேர்தல் அறிக்கையில் இடம் பெற்றுள்ள ஒரே வாக்குறுதிகள் என்னென்ன? என்பதைப் பார்ப்போம்!

அ.தி.மு.க.- நகரப் பேருந்துகளில் பயணிக்கும் மகளிருக்கு 50% கட்டணச் சலுகை வழங்கப்படும்.

தி.மு.க.- நகரப் பேருந்துகளில் பயணிக்கும் மகளிருக்கு முழுமையாக பேருந்து பயணச் சலுகை வழங்கப்படும்.

அ.தி.மு.க.- பெட்ரோல், டீசல் விலையைக் குறைக்க மத்திய அரசிடம் வலியுறுத்தப்படும்.

தி.மு.க.- பெட்ரோல், டீசல் விலையைக் குறைக்க மத்திய அரசிடம் வலியுறுத்தப்படும். பெட்ரோல் லிட்டருக்கு ரூபாய் 5, டீசல் லிட்டருக்கு ரூபாய் 4 குறைக்கப்படும்.

அ.தி.மு.க., தி.மு.க.- மாதந்தோறும் மின் பயனீட்டு கணக்கீடு செய்யப்படும்.

அ.தி.மு.க., தி.மு.க.- 100 நாள் வேலைத் திட்டத்தை 150 நாட்களாக உயர்த்தப்படும்.

அ.தி.மு.க.- 100 நாள் வேலைத் திட்டத்தில் ஊதிய உயர்வு பற்றி அறிவிக்கவில்லை.

தி.மு.க.- 100 நாள் வேலைத் திட்டத்தில் ஊதியம் ரூபாய் 300 வழங்கப்படும்.

அ.தி.மு.க., தி.மு.க.- பழுதடைந்த அனைத்து மத ஆலயங்களும் புனரமைக்கப்படும்.

அ.தி.மு.க., தி.மு.க.- அங்கன்வாடி, அனைத்து நிலை மாணவர்களுக்கும் பால் வழங்கப்படும்.

அ.தி.மு.க.- அரசுப் பள்ளி சுயநிதி மாணவர்களுக்கும் மடிக்கணினி வழங்கப்படும்.

தி.மு.க.- கையடக்க கணினி வழங்கப்படும்.

அ.தி.மு.க.- குடும்பத்தில் ஒருவருக்கு அரசுப்பணி வழங்கப்படும்.

தி.மு.க.- குடும்பத்தில் முதல் தலைமுறை பட்டம் பெற்ற ஒருவருக்கு அரசு வேலை வாய்ப்பில் முன்னுரிமை அளிக்கப்படும்.

படிப்படியாக மதுவிலக்கு என அ.தி.மு.க. அறிவித்துள்ள நிலையில் தி.மு.க. அதுபற்றி எதுவும் குறிப்பிடவில்லை என்பது குறிப்பிடத்தக்கது.