Skip to main content

“ராகுலுக்கு உண்மை தெரியும்... அவர் கண் முன்னால் நடக்கும்” - அண்ணாமலை

Published on 15/05/2023 | Edited on 15/05/2023

 

"Rahul knows the truth...it happens before his eyes" - Annamalai

 

“2024 ல் 28 எம்.பி.களும் பாஜகவாக இருப்பார்கள். இது ராகுல் காந்தியின் கண் முன்னால் நடக்கும்” என தமிழக பாஜக தலைவர் அண்ணாமலை கூறியுள்ளார்.

 

தமிழ்நாடு பாஜக தலைவர் அண்ணாமலை இன்று திருப்பதி சென்று ஏழுமலையானை வழிபட்டார். இதன் பின் செய்தியாளர்களைச் சந்தித்த அவர், “தேர்தல்களை பொறுத்தவரை ஒரு கட்சி வெற்றி பெறும். ஒரு கட்சி தோல்வி அடையும். இந்திய ஜனநாயகத்தில் புதிது கிடையாது. கர்நாடக மாநிலத்தில் 1985க்கு பிறகு எந்த ஒரு கட்சியும் இதுவரை ஆட்சியை தக்கவைக்கவில்லை. 38 ஆண்டுகளாக நடைபெறாதது இந்த ஆண்டு நடக்கும் என முயற்சி செய்தோம். இம்முறையும் நடக்கவில்லை. இருந்தாலும் 2024 நாடாளுமன்ற தேர்தலில் பாஜக வெற்றி பெறும்.

 

நம்மூரில் தமிழில் ஒரு பழமொழி சொல்வோம். காக்கா வந்து பனை மரத்தின் மேல் உட்காரும் போது பனை காய் கீழே விழுந்தால் காக்கா வந்ததால் தான் காய் விழுந்ததாக சொல்வார்கள். கர்நாடகாவைப் பொறுத்தவரை ஆளும் கட்சியாக பாஜக மூன்றரை ஆண்டுகள் இருந்துள்ளது. அதன்பின் மக்களுக்கு மாற்றம் தேவைப்பட்டது. மாற்றத்தை கொடுத்துள்ளார்கள். ஆனால் ராகுல் மற்றும் பிரியங்கா காந்தியை பொறுத்தவரை அவர்கள் பிரச்சாரம் செய்ததால் தான் காங்கிரஸ் வெற்றி பெற்றதாக சொல்லிக்கொள்வதெல்லாம், ராகுல்காந்திக்கே தெரியும் அது உண்மையில்லை என்று. 

 

அடுத்ததாக தேர்தல் வரும் ராஜஸ்தான் சட்டிஸ்கர், மத்தியபிரதேசத்தில் கூட பாஜக ஆட்சியைப் பிடிக்கும். அதுமட்டுமல்ல. இதே கர்நாடகத்தில் 28 எம்.பி.க்களில் 25 பேர் பாஜகவாக உள்ளனர். 2024 ல் 28 எம்.பி.களும் பாஜகவாக இருப்பார்கள். இது ராகுல் காந்தியின் கண் முன்னால் நடக்கும். குறிப்பாக தென் இந்தியாவிலும் தமிழ்நாட்டிலும் 2024 ஆம் ஆண்டு பாஜக சரித்திரம் படைக்கும். பாதயாத்திரைக்கு இதுவரை 1 லட்சத்து 36 ஆயிரத்திற்கும் மேற்பட்டோர் பதிவு செய்துள்ளனர். ஜூலை 2 ஆவது வாரத்தில் அதற்கான ஆயத்தப்பணிகள் செய்யப்படும். பாதை யாத்திரை பாஜகவின் வளர்ச்சிக்கும் தமிழக அரசின் மாற்றத்திற்கும் வித்திடும் என்ற நம்பிக்கை உள்ளது” எனக் கூறினார்.

 

 

 

சார்ந்த செய்திகள்

 

Next Story

“தமிழகத்தில் சட்ட ஒழுங்கை சீர்குலைக்க பா.ஜ.க முயல்கிறது” - திருமாவளவன் குற்றச்சாட்டு

Published on 12/07/2024 | Edited on 12/07/2024
Thirumavalavan alleges BJP is trying to disrupt law and order in Tamil Nadu

தமிழக முதல்வர் மு.க.ஸ்டாலினை விடுதலை சிறுத்தைகள் கட்சித் தலைவர் தொல்.திருமாவளவன் இன்று நேரில் சந்தித்து பல்வேறு கோரிக்கை மனுக்களை வைத்திருந்தார். 

இது குறித்து திருமாவளவன் செய்தியாளர்களைச் சந்தித்து பேசியதாவது, “பகுஜன் சமாஜ் கட்சி மாநிலத் தலைவர் ஆம்ஸ்ட்ராங் கொலை வழக்கில் கைது செய்யப்பட்டவர்கள் மட்டுமின்றி, இதனை திட்டமிட்டவர்கள் இதனை நடைமுறைப்படுத்திய கூலிக்கும்பல் அனைவரையும் கைது செய்ய வேண்டும் என்று வலியுறுத்தியிருக்கிறோம். தமிழகத்தில் சட்ட ஒழுங்கை சீர்குலைத்து ஒரு பதற்றத்தை ஏற்படுத்த வேண்டும் என்று சில அரசியல் கட்சிகள் திட்டமிட்டு செயல்பட்டு வருகின்றன. 

குறிப்பாக, பா.ஜ.கவுக்கு இந்த செயல் திட்டம் இருப்பதை அறிய முடிகிறது. ஆகவே, ஆம்ஸ்ட்ராங் கொலை சம்பவத்தில் கூட ஒரு அரசியல் செயல் திட்டம் வாய்ப்பு இருப்பதாக வி.சி.க கருதுகிறது. ஆம்ஸ்ட்ராங் உயிரிழந்த சில நிமிடங்களில், பா.ஜ.கவை சேர்ந்த ஒருவர் சி.பி.ஐ விசாரணை வேண்டும் என்று கோரிக்கை வைத்திருந்தார். காவல்துறை நடவடிக்கையில் இறங்குவதற்கு முன்னதாகவே, பகுஜன் சமாஜ் கட்சி கோரிக்கை வைப்பதற்கு முன்னதாகவே, எடுத்த எடுப்பிலேயே தமிழக அரசு விசாரிக்கக் கூடாது, ஒன்றிய அரசின் கட்டுபாட்டில் இருக்கக்கூடிய சி.பி.ஐ விசாரிக்க வேண்டும் என்று பா.ஜ.கவின் குரலாக இருந்தது. ஆருத்ரா நிறுவனத்திற்கும், பா.ஜ.க.வைச் சேர்ந்த சிலருக்கும் இடையில் உள்ள உறவு குறித்து விவாதிக்கப்பட்டு வருவதை நாம் பார்க்கிறோம். சம்பந்தப்பட்டவர்கள் பா.ஜ.க கட்சியில் பொறுப்பில் இருக்கிறார்கள். 

ஆம்ஸ்ட்ராங் கொலையில், ஆருத்ரா விவகாரமும் பேசப்படுகிறது. பா.ஜ.க இதில் வலிந்து சி.பி.ஐ விசாரணை கோருகிறது. இது போன்ற விவகாரங்கள் புலனாய்வு விசாரணைக்கு உட்படுத்தக்கூடியவையாக உள்ளன. அவர்களின் செயல் திட்டம் என்பது திமுக அரசுக்கு எதிராக பதற்றத்தை ஏற்படுத்த வேண்டும், சட்ட ஒழுங்கை சீர் குலைக்க வேண்டும் என்பதாக தான் இருக்கிறது. முன்னாள் முதல்வர் கலைஞர் மீது கருத்தியல் விமர்சனங்களை வைக்கலாம். அரசியல் விமர்சனங்களை வைக்கலாம். ஆனால், அவரை கொச்சைப்படுத்துவதன் மூலம் மேலும் பதற்றத்தை உருவாக்க வேண்டும் என்று அவர்களின் நோக்கங்களை உணர முடிகிறது. ஆகவே, சட்ட ஒழுங்கை காப்பாற்றுவதற்கு அரசு நடவடிக்கை எடுக்க வேண்டும் என்று வலியுறுத்தியிருக்கிறோம். 

நீட் தேர்வு குறித்தும், திருமண சட்டங்கள் சீராய்வு தொடர்பாக மனு ஒன்றை அளித்திருக்கிறோம். நீட் விவகாரத்தில் தற்போது நாடு முழுவதும் விவாதம் நடந்துள்ளது. நாடாளுமன்றத்திலும் எதிரொலித்துள்ளது. நீட் தேர்வில் ஊழல் முறைகேடு நடந்துள்ளன. அதை மூடி மறைக்க பா.ஜ.க முயல்கிறது. நீட் எதிர்ப்பு நடவடிக்கையாக அனைத்துக் கட்சி கூட்டத்தை கூட்ட முதல்வரிடம் வலியுறுத்தினேன்” என்று கூறினார். 

Next Story

பாஜக பொருளாளர் எஸ்.ஆர்.சேகரிடம் சிபிசிஐடி போலீசார் விசாரணை!

Published on 11/07/2024 | Edited on 11/07/2024
BJP Treasurer SR Shekhar CBCID Police Interrogated 

சென்னை எழும்பூர் ரயில் நிலையத்தில் இருந்து திருநெல்வேலிக்கு செல்லும் ரயிலில் தாம்பரம் ரயில் நிலையத்தில் கடந்த 6 ஆம் தேதி (06.04.2024) இரவு உரிய ஆவணங்களின்றி கொண்டு செல்ல முயன்றதாக சுமார் ரூ.4 கோடி மதிப்பிலான ரொக்கம் பறக்கும் படையினரால் பறிமுதல் செய்யப்பட்டது. இந்தப் பணத்தை எடுத்து வந்த புரசைவாக்கம் தனியார் விடுதி மேலாளரும் பாஜக உறுப்பினருமான சதீஷ், அவரின் சகோதரர் நவீன் மற்றும் லாரி ஓட்டுநர் பெருமாள் ஆகிய 3 பேரும் கைது செய்யப்பட்டனர். அப்போது திருநெல்வேலி மக்களவைத் தொகுதி பாஜக வேட்பாளர் நயினார் நாகேந்திரனுக்கு, இந்தப் பணத்தைக் கொண்டு செல்ல முயன்றதாக மூவரும் வாக்குமூலம் கொடுத்ததாகத் தகவல் வெளியாகி இருந்தது.

இத்தகைய சூழலில் இந்த வழக்கை சிபிசிஐடி விசாரணைக்கு மாற்றி தமிழக போலீஸ் டிஜிபி சங்கர் ஜிவால் உத்தரவு ஒன்றை பிறப்பித்திருந்தார். அதனைத் தொடர்ந்து இந்த வழக்கு குறித்து சிபிசிஐடி போலீசார் வழக்குப்பதிவு செய்து விசாரணை நடத்தி வருகின்றனர். இதற்கிடையே தமிழக பாஜக பொருளாளர் எஸ்.ஆர். சேகர் சென்னை உயர் நீதிமன்றத்தில் மனு ஒன்றை தாக்கல் செய்திருந்தார். அந்த மனுவில் “ஏற்கனவே என்னிடம் சிபிசிஐடி போலீசார் விசாரணை நடத்தினார். இருப்பினும் சிபிசிஐடி போலீசார் தொடர்ந்து சம்மன் அனுப்பி வருகின்றார். எனவே இந்த விவகாரம் தொடர்பாக தன்னை துன்புறுத்தக் கூடாது என உத்தரவிட வேண்டும்” எனத் தெரிவித்திருந்தார். 

BJP Treasurer SR Shekhar CBCID Police Interrogated 

அப்போது நீதிபதி எஸ்.ஆர்.சேகரை சிபிசிஐடி விசாரணைக்கு நேரில் ஆஜராக உத்தரவிட்டார். மேலும் அவரது செல்போனை ஒப்படைக்கும்படி சிபிசிஐடி போலீசார் வலியுறுத்தக் கூடாது எனவும் தெரிவித்தார். இந்நிலையில் இந்த வழக்கு தொடர்பாக தமிழக பாஜக பொருளாளர் எஸ்.ஆர்.சேகர் சிபிசிஐடி விசாரணைக்கு சென்னை எழும்பூரில் உள்ள சிபிசிஐடி அலுவலகத்தில் இன்று (11.07.2024) காலை ஆஜரானார். காலை 10.30 மணிக்கு ஆஜரானவரிடம் மாலை 06.30 மணி வரை என அவரிடம் சிபிசிஐடி போலீசார் சுமார் ஏழரை மணி நேரம் விசாரணை நடத்தினர். இவரிடம் 190 கேள்விகளை சிபிசிஐடி போலீசார் எழுப்பியதாகவும் கூறப்படுகிறது. சில வாரங்களுக்கு முன்பு எஸ்.ஆர்.சேகர் வீட்டில் சிபிசிஐடி போலீசார் சோதனை நடத்தி இருந்தது குறிப்பிடத்தக்கது.