Skip to main content

பா.ம.க. - தி.மு.க. - காங்கிரஸ்! - ஆரம்பமான தேர்தல் அரசியல்!  

Published on 05/01/2024 | Edited on 05/01/2024
PMK. - DMK - Congress! Early election politics!

இந்திய நாடாளுமன்றத் தேர்தல் இந்த ஆண்டு நடைபெறவுள்ளது. இதற்காக அரசியல் கட்சிகள் தீவிரமாகச் செயல்படத் துவங்கியுள்ளன. பா.ஜ.க.வை வீழ்த்த வேண்டும் எனப் பெரும்பான்மையான எதிர்க்கட்சிகள் ஒரு கூட்டணியைத் துவக்கி அதற்கு இ.ந்.தி.யா. எனப் பெயர் வைத்து அதில் தீவிரமாகச் செயல்பட்டு வருகின்றன. அதேபோல், மீண்டும் பிரதமர் மோடி தலைமையிலான பா.ஜ.க. ஆட்சியை அமைக்க வேண்டும் என பா.ஜ.க. உட்பட அதன் கூட்டணிக் கட்சிகள் செயல்பட்டு வருகின்றன. 

தமிழ்நாடு அரசு மற்றும் தமிழ்நாடு விளையாட்டு மேம்பாட்டு ஆணையம் இணைந்து 2024 ஆம் ஆண்டு ஜனவரி 19 ஆம் தேதி முதல் 31 ஆம் தேதி வரை சென்னை, கோவை, மதுரை மற்றும் திருச்சி ஆகிய 4 மாவட்டங்களில் கேலோ இந்தியா இளைஞர் விளையாட்டுப் போட்டிகள் நடத்தவுள்ளது. இந்தப் போட்டியின் துவக்க விழாவில் பிரதமர் மோடி கலந்துகொள்ளுமாறு தமிழ்நாடு விளையாட்டுத் துறை அமைச்சர் உதயநிதி ஸ்டாலின் நேற்று (4ம் தேதி) டெல்லியில் பிரதமர் மோடியை நேரில் சந்தித்து அழைப்பு விடுத்தார். அதனைத் தொடர்ந்து காங்கிரஸ் கட்சியின் முக்கிய தலைவரும், எம்.பி.யுமான ராகுல் காந்தியை அவரது இல்லத்தில் சந்தித்தார். 

PMK. - DMK - Congress! Early election politics!

இதில், அரசியல் பேச்சுகள் இருந்தன எனச் சொல்லப்பட்டாலும், ராகுல் காந்தியை சந்தித்துவிட்டுக் கிளம்பும்போது செய்தியாளர்களைச் சந்தித்த அமைச்சர் உதயநிதி ஸ்டாலின், “சகோதரர் ராகுல் காந்தியை மரியாதை நிமித்தமாக நலம் விசாரித்து விட்டுச் செல்கிறேன். அவருடைய பாதயாத்திரையை மணிப்பூரில் தொடங்க இருப்பதாகச் சொன்னார். மற்றபடி நலம் விசாரித்துக் கொண்டோம். அரசியல் ரீதியாக ஏதும் பேசவில்லை'' என்று தெரிவித்தார். 

PMK. - DMK - Congress! Early election politics!

ராகுல் காந்தி - உதயநிதி ஸ்டாலின் சந்திப்பு அரசியல் வட்டாரத்தில் பேசு பொருளாக மாறியுள்ள அதே சமயத்தில், கடந்த 29ம் தேதி பா.ம.க. நிறுவனர் ராமதாஸ் தமிழ்நாடு முதலமைச்சர் மு.க. ஸ்டாலினை சந்தித்ததும் அதிகளவில் பேசப்பட்டு வருகிறது. 

தி.மு.க. ஆட்சி அமைந்த பின்னர் முதன் முதலாக கடந்த 29 ஆம் தேதி தலைமைச் செயலகத்திற்கு ஜி.கே. மணியுடன் சென்று முதல்வரை சந்தித்தார் ராமதாஸ். பரஸ்பர நல விசாரிப்பிற்குப் பின், வன்னியர்களுக்கான உள் இட ஒதுக்கீடு சட்ட மசோதாவை நிறைவேற்ற வேண்டும் என்றும், தமிழகத்திலும் சாதிவாரிக் கணக்கெடுப்பை நடத்த வேண்டும் என்றும் வலியுறுத்திய ராமதாஸ், இவற்றைச் செய்வதன் மூலம் இந்த அரசு பெரியாரின் சுயமரியாதை அரசு என்கிற பாராட்டை வெகுவாகப் பெறலாம் என்றும் சொல்லியிருக்கிறார். 

PMK. - DMK - Congress! Early election politics!

ஸ்டாலினோ, இது குறித்து கவனிக்கிறேன் என்று சொன்னதோடு அமைதியாகிவிட்டார். இந்த சந்திப்பின் போது, அரசுத் தரப்பில் அமைச்சர்கள் துரைமுருகன், எம்.ஆர்.கே. பன்னீர் செல்வம், கே.என். நேரு, ராஜகண்ணப்பன், தங்கம் தென்னரசு மற்றும் அரசின் உயரதிகாரிகள் சிலரும் இருந்திருக்கிறார்கள். ராமதாஸின் சந்திப்புக்கு முதல்வரிடம் நேரம் வாங்கிக் கொடுத்தவர் அமைச்சர் துரைமுருகன்தான் என்கிறார்கள்.

இந்த சந்திப்பு, கூட்டணி மாற்றமாக மாற வாய்ப்பிருக்கிறதா எனும் பேச்சுகளும் எழத் துவங்கியுள்ளன. இது குறித்து விசாரித்தபோது, பா.ம.க.வை பொறுத்தவரை அன்புமணிக்கு தி.மு.க. கூட்டணியில் சேரலாம் என்கிற எண்ணமிருக்கிறது. அவரது மாமனாரான தமிழக காங்கிரஸ் முன்னாள் தலைவர் கிருஷ்ணசாமி மூலமாக தனக்கொரு எம்.பி. சீட்டை உறுதி செய்யலாம் என நினைக்கிறார். ஆனால், ராமதாஸை பொறுத்தவரை, தி.மு.க. கூட்டணியில் இருந்த பழைய அனுபவங்களால் இதற்குப் பெரிதாய் விருப்பமில்லை எனச் சொல்லப்படுகிறது. அதே நேரத்தில் தி.மு.க. கூட்டணிக் கட்சிகளைப் பொறுத்தவரை, ராமதாஸ் - முதல்வர் சந்திப்பு குறித்து ஒருவித சலசலப்பு ஏற்பட்டிருப்பதாகவும் சொல்லப்படுகிறது. 

சார்ந்த செய்திகள்

 

Next Story

“இந்தியாவில் கடந்த 10 ஆண்டுகளாக அறிவிக்கப்படாத எமர்ஜென்சி நடந்து வருகிறது” - செல்வப்பெருந்தகை

Published on 18/07/2024 | Edited on 18/07/2024
 Undeclared Emergency has been going on in India for last 10 years says Selvaperunthagai

திண்டுக்கல்லில் மாநகர மாவட்ட காங்கிரஸ் கமிட்டி நிர்வாகிகளின் ஆலோசனைக் கூட்டம் பேகம்பூரில் உள்ள தனியார் திருமண மண்டபத்தில் நடைபெற்றது. இக்கூட்டத்திற்கு மாவட்டத் தலைவர் துரை மணிகண்டன் தலைமை தாங்கினார். இக்கூட்டத்தில் சிறப்பு அழைப்பாளராக வருகை தந்த அகில இந்திய காங்கிரஸ் மாநிலத் தலைவர் செல்வப்பெருந்தகைக்கு நாகல் நகர் மேம்பாலம் அருகே மாநகர் மாவட்ட தலைவர் துரைமணிகண்டன் தலைமையில் ஆள் உயர மாலை அணிவித்து சிறப்பான வரவேற்பு கொடுக்கப்பட்டது. இதில் மாவட்ட பொதுச் செயலாளர் வேங்கைராஜா உட்பட கட்சி பொறுப்பாளர்கள் பெருந்திரளாக கலந்து கொண்டனர். 

அதன்பின் கட்சி நிர்வாகிகளுடன் ஆலோசனை கூட்டத்தில் கலந்து கொண்டு மாநகர நிர்வாகிகள் மற்றும் மாவட்ட நிர்வாகிகளுடன் கட்சி வளர்ச்சி குறித்து மாநிலத் தலைவர் பல கருத்துக்களை கேட்டார். அதற்குமுன் பத்திரிக்கையாளர்களிடம் செல்வப்பெருந்தகை பேசும்போது, “தமிழகம் முழுவதும் கட்சி நிர்வாகிகளின் ஆலோசனைக் கூட்டம் பாராளுமன்ற எதிர்க்கட்சி தலைவர் ராகுல்காந்தி உத்தரவின்பேரில் நடத்தப்பட்டு வருகிறது. அதன்படி மாவட்டம் தோறும் நிர்வாகிகளின் கருத்துக்களை கேட்டு ஏதேனும் மாற்றம் செய்ய இருந்தால் அதுகுறித்து தலைமைக்கு தெரிவிக்கப்படும். கிராமம், நகரம், ஒன்றியம் என எவ்வித பாரபட்சமின்றி அனைத்து நிர்வாகிகளின் கருத்துக்களையும் கேட்கப்படும். பகுஜன சமாஜ் மாநில தலைவர் ஆம்ஸ்ட்ராங் கொலை வழக்கில் புலன் விசாரணை சிறப்பாக நடைபெற்று வருகிறது. நேற்று கூட மேலும் மூன்று பேர் கைது செய்யப்பட்டனர். 

இந்த வழக்கில் யார் சம்மந்தப்பட்டு இருந்தாலும் அவர்கள் மீது கடும் நடவடிக்கை எடுக்க வேண்டும் வழக்கு விசாரணை தொடர்ந்து நடைபெற்று வருவதால் வேறு எதுவும் சொல்லக்கூடாது மகாத்மா காந்தியை சுட்டுக் கொன்ற போது கூட கோட்சே குறித்து காங்கிரஸ் எவ்வித தவறான கருத்துக்களையும் தெரிவிக்கவில்லை. இதேபோல சாவர்க்கர் குறித்தும் தவறான கருத்துக்களை தெரிவிக்கவில்லை. பா.ஜ.க தலைவர்கள், நிர்வாகிகள் இறந்த தலைவர்கள் குறித்து அவதூறாக பேசி வருகின்றனர். எமர்ஜென்சி என்பது இந்திராகாந்தி காலத்தில் அதிகாரிகள் நடவடிக்கையால் மேற்கொள்ளப்பட்டது. அது தவறான பாதையில் சென்றதால் அப்போதைய பிரதமர் இந்திராகாந்தி மக்களிடம் மன்னிப்பு கேட்டார். ஆனால் இந்தியாவில் கடந்த பத்தாண்டுகளாக அறிவிக்கப்படாத எமர்ஜென்சி ஆட்சி நடந்து வருகிறது. 

மின் கட்டண உயர்விற்கு உதய் மின்திட்டத்தில் கையெழுத்திட்டதே காரணமாகும். ஜெயலலிதா இருந்தவரை இந்த திட்டத்தில் அவர் சேரவில்லை. ஆனால் அவா மறைவுக்குப் பிறகு எடப்பாடி பழனிச்சாமி இந்த திட்டத்தில்  சேர்ந்தார். அதனால் தான் தற்போது மின்கட்டணம் உயர்த்தப்பட்டு உள்ளது. காவிரி பிரச்சினையில் மேலாண்மை வாரியம் உத்தரவிட்டும் அதனை கர்நாடகா அரசு மதிக்காமல் செயல்படுகிறது. 40 முறை பேச்சு வார்த்தை நடத்தப்பட்டுள்ளது. இதனைக் கண்காணிக்க வேண்டிய மத்திய அரசு மெத்தனமாக உள்ளது. கர்நாடகாவில் காங்கிரஸ் ஆட்சி உள்ளது என்பதற்காக தமிழக மக்களின் உரிமைகளை நாங்கள் விட்டுக் கொடுக்க மாட்டோம். தமிழக மக்களுக்காக காவிரி நீரை பெற்றுத்தர மத்திய அரசைக் கண்டித்தும், போராட்டம் நடத்த தயாராக இருக்கிறோம்” என்று கூறினார்.

Next Story

'சரண்டர் ஆன ஒருவர் ஏன் தப்பித்து ஓட வேண்டும்?' - அன்புமணி கேள்வி

Published on 17/07/2024 | Edited on 17/07/2024
 'Why should a surrendered man run away; CBI should investigate'-Anbumani interview

'சரண்டர் ஆனவர் ஏன் தப்பித்து ஓட வேண்டும். அதுவும் ஏன் காலை 5:30 மணிக்கு என்ன வேலை? கை விலங்கு இல்லை என்றால் என்ன காரணம்?' என ஆம்ஸ்ட்ராங் கொலை வழக்கில் சிபிஐ விசாரணை வேண்டும் என பாமகவின் அன்புமணி வலியுறுத்தியுள்ளார்.  

விக்கிரவாண்டியில் செய்தியாளர்களை சந்தித்த பாமக தலைவர் அன்புமணி ராமதாஸ் பேசுகையில், ''தேர்தல் வாக்குறுதி கொடுத்தது ஒன்று. ஆனால் அரசு செய்வது ஒன்று. காவிரி தண்ணீர் பிரச்சனையை சரியான முறையில் தமிழக அரசு கையாளவில்லை. பிரச்சனை வரும் நேரத்தில் அப்பொழுதுதான் ஒரு கூட்டம் நடத்துவார்கள். நேற்று அனைத்துக் கட்சிக் கூட்டத்தை நடத்தினார்கள். உச்சநீதிமன்றம் செல்வோம் என்று சொன்னார்கள். ஆனாலும் இயற்கை நமக்கு அங்கே கர்நாடகாவில் மழையை கொடுத்ததால் இன்று நாம் கேட்ட தண்ணீரை விட மூன்று மடங்கு அதிக தண்ணீர் காவிரியில் வந்து கொண்டிருக்கிறது. அடுத்த ஆறு மாதம் இதைப் பற்றி நாம் பேசப்போவது கிடையாது. அதற்கு பிறகு இந்த பிரச்சனை மீண்டும் வரும் பொழுது அனைத்து கட்சிக் கூட்டம் போடுவோம், உச்சநீதிமன்றம் போவோம். இதற்கு ஒரு நிரந்தர தீர்வுதான் என்ன?

அடுத்தது ஆன்லைன் சூதாட்ட தடை சட்டம். இந்த சட்டத்தை ரத்து செய்த பிறகு கிட்டத்தட்ட 30 பேர் தமிழகத்தில் தற்கொலை செய்துள்ளார்கள். அதை பற்றி திமுக அரசுக்கு கவலையே கிடையாது. உச்ச நீதிமன்றத்திற்கு சென்று சென்னை உயர்நீதிமன்ற தீர்ப்புக்கு தடை பெறுவதற்கு கூட திமுகவிற்கு மனசு கிடையாது. அவர்களுக்கு எல்லாமே வியாபாரம் வணிகம் தான். இதையெல்லாம் திமுக மக்களுக்கு செய்யும் துரோகங்கள். தமிழ்நாட்டினுடைய சட்ட ஒழுங்கு தினமும் ஒரு கொலை என்பதாக இருக்கிறது. மதுரையில் நாம் தமிழர் கட்சி நிர்வாகியை கொலை செய்துள்ளார்கள். பாமகவின் நிர்வாகி வெட்டி கொலை, அதற்கு முன்பு ஆம்ஸ்ட்ராங், அதற்கு முன்பு அதிமுக, அதற்கு முன்பு காங்கிரஸ் நிர்வாகி என ஒரு மாதத்தில் கிட்டத்தட்ட 100 பேருக்கு மேல் கொலை செய்யப்பட்டுள்ளனர். இவ்வளவு கொலை நடக்கிறது என்பதால் மக்கள் எல்லாம் அச்சத்தில் பயத்தில் வாழ்ந்து வருகிறார்கள்.

அது ஒரு பக்கம், அடுத்தப்பக்கம் கள்ளச்சாராயம் ஆறாக பெருகிக் கொண்டிருக்கிறது. கள்ளக்குறிச்சியில் நடந்த சம்பவத்திற்கு பிறகு விழுப்புரம் மாவட்டத்தில் 11 பேர் கள்ளச்சாராயம் குடித்து மருத்துவமனையில் அனுமதிக்கப்பட்டுள்ளார்கள். முதலமைச்சர் என்ன நடவடிக்கை எடுக்கிறார். மரக்காணம் சம்பவத்தின் போது இரும்புக் கரம் கொண்டு  வேரோடு அறுப்போம் என வசனம் பேசினார். கள்ளக்குறிச்சி சம்பவத்திற்கும் அதே வசனம் பேசினார். ஆம்ஸ்ட்ராங் கொலை வழக்கில் கைது செய்யப்பட்ட ஒருவரை என்கவுன்டரில் போட்டுள்ளார்கள். சரண்டர் ஆன பிறகு சரண்டர் ஆனவர் ஏன் தப்பித்து ஓட வேண்டும். அதுவும் ஏன் காலை 5:30 மணிக்கு என்ன வேலை? கை  விலங்கு இல்லை என்றால் என்ன காரணம். அதனால் தான் சிபிஐ விசாரணை வேண்டும் என கேட்கிறோம். சிபிஐ விசாரணை வந்தால் தான் முழு உண்மை வெளியே வரும். ஏன் என்கவுன்டர் செய்தார்கள்; இதில் யார் யார் சம்பந்தப்பட்டுள்ளார்கள் என்பது வெளிவரும்'' என்றார்.