Skip to main content

“நியாயம் தர்மம் வெல்லும் வரை போராட்டம் தொடரும்” - மனோஜ் பாண்டியன்

Published on 19/03/2023 | Edited on 19/03/2023

 

OPS Team Manoj Pandiyan addressed press

 

அதிமுக பொதுச்செயலாளர் தேர்தல் தொடர்பாக ஓ.பி.எஸ். தரப்பில் தொடரப்பட்ட வழக்கு இன்று (19ம் தேதி) சென்னை உயர் நீதிமன்றத்தில் அவசர வழக்காக நீதிபதி குமரேஷ் பாபு முன்னிலையில் நடைபெற்றது. இதில் அனைத்து தரப்பு வாதங்களையும் கேட்டபின் நீதிபதி குமரேஷ் பாபு, “தீர்மானம் தொடர்பான வழக்கு ஒத்திவைக்கப்பட்டுள்ள நிலையில் பொதுச்செயலாளர் தேர்தல் நடத்த என்ன அவசியம்? பொதுச்செயலாளர் தேர்தலை நிறுத்த விரும்பவில்லை. அதிமுக பொதுச்செயலாளர் தொடர்பான வழக்கு மற்றும் பொதுக்குழு தொடர்பான வழக்கை வரும் 22ம் தேதி விசாரிக்கிறேன். அன்று தெலுங்கு வருடப் பிறப்பின் காரணமாக நீதிமன்றத்திற்கு விடுமுறை தான் என்றாலும், உயர் நீதிமன்ற பொறுப்பு தலைமை நீதிபதியிடம் அனுமதி வாங்கி அன்று முழுவதும் வழக்கை விசாரித்து 24ம் தேதி தீர்ப்பு வழங்குகிறேன். அதுவரை தேர்தல் நடைமுறையான வேட்பு மனுத் தாக்கல், பரிசீலனை உள்ளிட்டவற்றை தொடரலாம். ஆனால், முடிவுகளை வெளியிடக்கூடாது” என்று உத்தரவிட்டார். 

 

இதனைத் தொடர்ந்து நீதிமன்றத்தில் செய்தியாளர்களைச் சந்தித்த ஓ.பி.எஸ். அணியின் மனோஜ் பாண்டியன், “எங்கள் தரப்பில் கடந்த 17ம் தேதி அன்று வழக்கினை விசாரித்து அனைத்து தரப்பு வாதங்களுக்கும், பதில் மனுக்களுக்கும் 11.4.2023 அன்று விசாரணையை உயர் நீதிமன்றம் தள்ளிவைத்தது. இந்த நிலையில், அவசரமாக இந்தத் தேர்தல் ஏன் என்ற கேள்வி எங்களால் எழுப்பப்பட்டது. இதனை கேட்டுக்கொண்ட நீதிபதி இந்த வழக்கின் விசாரணையை இந்த மாதம் 22ம் தேதிக்கு தள்ளிவைத்துள்ளார். மேலும், இந்தத் தேர்தலின் முடிவினை வெளியிடக்கூடாது எனும் உத்தரவினை பிறப்பித்துள்ளார்” என்று தெரிவித்தார். 

 

தொடர்ந்து செய்தியாளர்கள், ‘முடிவுகளை அறிவிக்கக்கூடாது என்றாலும், இன்று பிற்பகல் மூன்று மணியோடு வேட்பு மனுத் தாக்கல் முடிகிறது. இதுவரை இ.பி.எஸ். மட்டுமே வேட்பு மனுத் தாக்கல் செய்துள்ளார். அப்போது அவர் வெற்றி பெற்றதாகக் கருதிவிடலாம் இல்லையா?’ என்று கேள்வி எழுப்பினர். 

 

இதற்கு பதில் அளித்த மனோஜ் பாண்டியன், “அந்த தீர்மானங்கள் அனைத்தும் உயர் நீதிமன்றத்தால் முழுமையாக விசாரிக்கப்பட்டு, அதன் தீர்ப்பினை தருவதாக நீதிபதி அறிவித்துள்ளார். ஆகவே அந்த தீர்மானங்கள் செல்லுமா என்பதை உயர் நீதிமன்றம் முழுமையாக ஆராயும். தீர்மானங்கள் மீதான விசாரணை 22ம் தேதி நடைபெறும் என நீதிபதி தெரிவித்துள்ளார்” என்றார். 

 

தொடர்ந்து பேசிய அவர், “சட்ட விரோதமாக 11.7.22ம் தேதி அன்று நிறைவேற்றப்பட்ட தீர்மானங்கள் செல்லாது என்று நாங்கள் குரல் கொடுத்து அதனை நீதிமன்றத்தின் முன் எழுப்பியிருக்கிறோம். அதற்கு நீதிமன்றம், அதனை ஆராயும் எனத் தெரிவித்திருக்கிறது. அதுவரை இந்தத் தேர்தலுக்கான முடிவை அறிவிக்கக்கூடாது எனத் தெரிவித்திருப்பதை எங்களுக்கு மிகப் பெரிய வெற்றியாக கருதுகிறோம்” என்று தெரிவித்தார். 

செய்தியாளர்கள், ‘அடிப்படை உறுப்பினர்கள் தான் தேர்ந்தெடுக்கப்போகிறார்கள் என்று இ.பி.எஸ். தரப்பில் வாதிடப்பட்டதே’ என கேட்டதற்கு பதில் அளித்த அவர், “இன்னும் உறுப்பினர் அடையாள அட்டையே தரப்படவில்லை. வெறும் 100 பேருக்கு மட்டும் கொடுத்துள்ளனர். ஆகையால், அதிமுகவின் ஒன்றரை கோடி தொண்டர்களுக்கும் தெரியும் இது தேர்தலா அல்லது எங்கள் ஒருங்கிணைப்பாளர் சொன்னாரே அதுபோல், ‘பிக்பாக்கெட்’-ஆ என்பதை அறிவார்கள்” என்றார்.  

 

நீதிமன்றமே தலையிட்டு தேர்தலை நடத்தினால் தேர்தலைச் சந்திக்க நீங்கள் தயார் என்ற கேள்விக்கு பதில் அளித்த அவர், “ஓ.பி.எஸ். உச்சநீதிமன்றத்திலேயே, ‘தேர்தல் வைத்தால் நானும் இ.பி.எஸ்.-சும் போட்டிபோடுவோம் வர தயாரா’ என்றார். இதுவரை அதற்கான பதில் இல்லை” என்றார். 

 

எத்தனை ஆண்டுகள் தான் இந்தச் சட்டப்போராட்டம் தொடரும் என எழுப்பிய கேள்விக்கு பதில் அளித்த அவர், “நியாயம் தர்மம் வெல்லும் வரை, நீதி கிடைக்கும் வரை இந்தப் போராட்டம் தொடரும்” என்றார். 

 

 

சார்ந்த செய்திகள்

 

Next Story

அதிமுக நிர்வாகி ஆலோசனைக் கூட்டம்; திமுக அரசைக் கண்டித்து தீர்மானம்

Published on 22/06/2024 | Edited on 22/06/2024
Resolution condemning DMK government in AIADMK executive meeting

திருச்சி மாநகர் மாவட்ட அதிமுக நிர்வாகிகள் ஆலோசனைக் கூட்டம் மாவட்டச் அலுவலகத்தில் மாவட்ட செயலாளர் ஜெ.சீனிவாசன் தலைமையில் நடந்தது. இக்கூட்டத்திற்கு அமைப்பு செயலாளர் ரத்தினவேல் முன்னிலை வகித்தார். 

கூட்டத்தில் மாநில ஜெயலலிதா பேரவை துணைச் செயலாளர் ஜோதிவாணன், முன்னாள் மாவட்டச் செயலாளர் கே.சி பரமசிவம், மாவட்ட இணை செயலாளர் ஜாக்குலின், மாவட்ட துணை செயலாளர்கள் வனிதா, பத்மநாதன், அணி நிர்வாகிகள் பாலாஜி, ஞானசேகர், கலிலுல் ரகுமான், ஜோசப் ஜெரால்டு, வக்கீல் ராஜேந்திரன்,வெங்கட் பிரபு,ஜான் எட்வர்ட்,சகாபுதீன், பகுதி செயலாளர்கள் அன்பழகன், என்.எஸ். பூபதி, சுரேஷ் குப்தா, ரோஜர், ராஜேந்திரன், ஏர்போர்ட் விஜி , எம்.ஆர்.ஆர்.முஸ்தபா உள்ளிட்ட பல நிர்வாகிகள் கலந்து கொண்டனர். 

கூட்டத்தில் கள்ளக்குறிச்சி மாவட்டத்தில் விஷச்சாராயம் குடித்து 52க்கும் மேற்பட்டோர் பலியான சம்பவத்தைக் கண்டித்தும், சட்டம் ஒழுங்கை பாதுகாக்கத் தவறிய திமுக அரசைக் கண்டித்தும் 24ஆம் தேதி கலெக்டர் அலுவலகம் முன்பு நடக்கும் கண்டன ஆர்ப்பாட்டத்தில் திருச்சி மாநகர் மாவட்ட அதிமுக சார்பில் திரளானோர் பங்கேற்பது எனத் தீர்மானிக்கப்பட்டது.

Next Story

‘சிபிஐ விசாரணை வேண்டும்’ - எடப்பாடி பழனிசாமி!

Published on 22/06/2024 | Edited on 22/06/2024
'CBI should investigate' - Edappadi Palaniswami

சென்னை தலைமைச் செயலகத்திலுள்ள சட்டமன்றப் பேரவை மண்டபத்தில் தமிழக சட்டசபை பேரவைக் கூட்டத்தின் மூன்றாம் நாள் அமர்வு இன்று (22.06.2024) காலை 10 மணிக்கு தொடங்கியது. அதன்படி மூன்றாம் நாளான இன்று (22.06.2024) பல்வேறு துறைகளின் மீதான மானியக் கோரிக்கைகளின் மீது விவாதமும், வாக்கெடுப்பும் நடைபெற உள்ளது. அதே சமயம் அதிமுக பொதுச் செயலாளரும், எதிர்க்கட்சித் தலைவருமான எடப்பாடி பழனிசாமி உள்ளிட்ட அதிமுக எம்.எல்.ஏ.க்கள் இரண்டாவது நாளாக இன்றும் கருப்பு சட்டை அணிந்து சட்டமன்றத்திற்கு வருகை தந்தனர். அதனைத் தொடர்ந்து கள்ளக்குறிச்சி விவகாரம் தொடர்பாக சட்டமன்றத்தில் 2 வது நாளாக இன்றும் அதிமுகவினர் அமளியில் ஈடுபட்டனர். அப்போது கேள்வி நேரத்தில் கள்ளக்குறிச்சி விவகாரம் தொடர்பாக விவாதிக்க வேண்டும் என அதிமுக உறுப்பினர்கள் அமளியில் ஈடுபட்டனர்.

இதனையடுத்து கள்ளக்குறிச்சி விவகாரத்தை விவாதிக்கக் கோரி கேள்வி நேரத்தில் தொடர்ந்து அமளியில் ஈடுபட்ட நிலையில் சபாநாயகர் அனுமதி அளிக்காததால் அதிமுக சட்டமன்ற உறுப்பினர்கள் பேரவையில் இருந்து வெளிநடப்பு செய்தனர். அப்போது ‘நீதி வேண்டும்’ என முழக்கமிட்டும், ‘தமிழ்நாட்டு முதலமைச்சர் ராஜினாமா செய்ய வேண்டும்’ என முழக்கமிட்டும் அதிமுகவினர் சட்டப்பேரவையில் இருந்து வெளிநடப்பு செய்தனர். 

'CBI should investigate' - Edappadi Palaniswami

அதனைத் தொடர்ந்து சட்டப்பேரவை வளாகத்தில் எடப்பாடி பழனிசாமி செய்தியாளர்களைச் சந்தித்து பேட்டி அளித்தார். அப்போது கள்ளக்குறிச்சி விவகாரம் குறித்து பேசுகையில், “மக்களுக்கு நீதி கிடைக்க வேண்டும். மக்களின் பிரச்சனைகள் குறித்து சட்டப்பேரவையில் விவாதிக்கப்பட வேண்டும் எனப் பல முறை குரல் கொடுத்தோம். கள்ளச் சாராயம் மக்களின் உயிருடன் தொடர்புடைய பிரச்சனை ஆகும். இதனால் தினந்தோறும் மக்கள் உயிரிழக்கிறார்கள்.

கள்ளக்குறிச்சி மக்களுக்கு நீதி கிடைக்க வேண்டும் என்ற அடிப்படையில் இன்று சட்டப்பேரவையில் பேச வேண்டும் என அனுமதி கேட்டும், கொடுக்கவில்லை. இந்த விவகாரத்தில் இதுவரை எத்தனை பேர் உயிரிழந்துள்ளார்கள், சிகிச்சை பெற்று வருபவர்களின் நிலை குறித்து கேள்வி எழுப்பினோம். கள்ளக்குறிச்சி விவகாரத்தில் தமிழ்நாடு அரசு மெத்தனப் போக்கில் செயல்படுகிறது. இந்த விவகாரத்தில் தினந்தோறும் மக்களின் உயிர் பறிபோகிறது, இதில் அரசின் செயல்பாடு என்ன?. 

'CBI should investigate' - Edappadi Palaniswami

கள்ளக்குறிச்சி விவகாரத்தில் 183 பேர் பாதிக்கப்பட்டுள்ளதாக தகவல்கள் வருகின்றன. மேலும் இந்த விவகாரத்தில் 118 பேர் சிகிச்சை பெற்று வருவதாக தகவல்கள் வருகின்றன. கள்ளச்சாராய விவகாரத்தில் மாவட்ட ஆட்சியரே தவறான தகவல் தருவதால் ஒரு நபர்  ஆணைய விசாரணை சரியாக இருக்காது. மாநில அரசு விசாரித்தால் மக்களுக்கு நீதி கிடைக்காது என்பதால் சிபிஐ விசாரணை வேண்டும் என கோருகிறோம். நீதியை நிலை நாட்ட, உண்மைக் குற்றவாளிகளை கண்டறிய சிபிஐ விசாரணை அவசியமாகிறது. ஒரு நபர் ஆணையத்தால் உண்மை வெளிவராது.

சாராய விஷ முறிவுக்கு செலுத்தும் மருந்தின் பெயரை மாற்றி அமைச்சர் மா. சுப்பிரமணியன் தெரிவித்தார். தடை செய்யப்பட்டுள்ள அந்த மருந்தை ஆபத்தான காலங்களில் பயன்படுத்தப்படலாம் என்று தெரிவிக்கப்பட்டுள்ளது. கள்ளச்சாராயம் அருந்தியவர்கள் காலதாமதமாக சிகிச்சை எடுத்துக் கொண்டதால் தான் உயிரிழப்பு ஏற்பட காரணம் என அமைச்சர் மா.சுப்பிரமணியன் தெரிவித்தார். ஆனால் முன்னாள் கள்ளக்குறிச்சி மாவட்ட ஆட்சியர் ஷ்ரவன் குமார் வெவ்வேறு காரணங்களுக்காக உயிரிழந்துவிட்டதாக அறிவித்தார். இந்த விவகாரத்தில் அமைச்சர் மா.சுப்பிரமணியன் திட்டமிட்டு பேசி உள்ளார். அரசு மெத்தன போக்கில் செயல்பட்டு வருகிறது; துரிதமாக செயல்பட்டு இருந்தால் மக்களை காப்பாற்றி இருக்கலாம்” எனத் தெரிவித்தார்.