Skip to main content

இதை செய்யாத வரை, மக்களை மோடி அரசால் காப்பாற்ற முடியாது... கே.எஸ்.அழகிரி

Published on 25/05/2020 | Edited on 25/05/2020
ks alagiri - Congress




தமிழ்நாடு காங்கிரஸ் கமிட்டி தலைவர் கே.எஸ்.அழகிரி வெளியிட்டுள்ள அறிக்கையில், பிரதமர் மோடி அறிவித்த நிவாரணம் ரூபாய் 20 லட்சம் கோடி, உண்மையில் கணக்கிட்டால் ரூபாய் 1 லட்சத்து  86 ஆயிரத்து 650 கோடி தான். இது மொத்த ஜிடிபியில் 0.91 சதவிகிதமே தவிர 10 சதவிகிதம் அல்ல.


பிரதமரின் வேலை வாய்ப்பு உருவாக்கும் திட்டத்தின் கீழ், 2018-19 இல் 5.87 லட்சம் வேலைவாய்ப்புகள் உருவாக்கப்பட்டன. ஆனால், 2019-20 இல் 2.57 லட்சமாக அது குறைந்துள்ளது.

வறுமை ஒழிப்புத் திட்டமான தீனதயாள் அந்தியோதயா யோஜ்னா-தேசிய நகர்ப்புற வாழ்வாதார திட்டத்தின் கீழ், 2018-19 ஆம் ஆண்டு புதிய வேலைவாய்ப்புகள் 1.78 லட்சத்திலிருந்து 44 ஆயிரத்து 66 ஆக 2019-20 இல் குறைந்துள்ளன.

 
இந்தியாவின் எதிர்காலம் குறித்து எந்த செயல்திட்டமும் மத்திய அரசிடம் இல்லை. இதிலிருந்து இந்தியாவை மீட்டு, மீண்டும் தொழில் உற்பத்தியை பெருக்குவதற்கு மத்திய அரசு மேலும் அதிக நிதியை ஒதுக்கவேண்டும். வெறும் அறிவிப்புகளால் எந்தப் பலனும் ஏற்படாது. மக்களிடையே வாங்கும் சக்தியை அதிகரிப்பதற்கு நிதியை ஒதுக்க வேண்டும். இதை செய்யாதவரை பொருளாதார பேரழிவிலிருந்து மக்களை மோடி அரசால் காப்பாற்ற முடியாது.

 

 

Narendra Modi



 
மனித இனம் இதுவரை காணாத வகையில் கரோனா தொற்று காரணமாக அச்சம் பீதியால் மக்கள் வாழ்ந்து வருகிறார்கள். இன்னொரு பக்கம் வேலைவாய்ப்பு, வருமானத்தை இழந்து வாழ்வாதாரமே மிகப்பெரிய கேள்விக் குறியாகிவிட்டது. இந்நிலையில் பிரதமர் மோடி 136 கோடி மக்களுக்கு மொத்த உள்நாட்டு மதிப்பில் 10 சதவிகிதமான ரூபாய் 20 லட்சம் கோடி தொகுப்பு நிவாரண திட்டத்தை அறிவித்தார். அந்த திட்டத்தின் விவரங்களை நிதியமைச்சர் நிர்மலா சீதாராமன் நான்கு கட்டங்களாக வெளியிட்டார். அறிவிக்கப்பட்டது ரூ 20 லட்சம் கோடி நிவாரண திட்டமல்ல, அனைத்து அறிவிப்புகளையும் கணக்கிட்டால், ரூபாய் 1 லட்சத்து 86 ஆயிரத்து 650 கோடி தான் மத்திய அரசுக்கு நிதிச்சுமை ஏற்படும் என்று நிதியமைச்சரின் அறிவிப்பை ஆய்வு செய்த பொருளாதார வல்லுநர்கள் கூறியிருக்கிறார்கள். உண்மையில் மொத்த உள்நாட்டு உற்பத்தியில் இது 0.91 சதவிகிதமே தவிர 10 சதவிகிதம் அல்ல. இதனால் நாட்டு மக்களிடையே பெருத்த ஏமாற்றமும், எதிர்காலம் குறித்து கடும் அச்சமும் ஏற்பட்டுள்ளது.

 
நாட்டில் நிலவும் அசாதாரண சூழலின் காரணமாக 13 கோடி 50 லட்சம் பேர்கள் வேலையிழக்கும் நிலை ஏற்பட்டுள்ளது. நடப்பாண்டின் வளர்ச்சி விகிதம் 1 சதவிகிதத்திற்கு கீழே பூஜ்ஜியத்தை நோக்கி சென்று கொண்டிருக்கிறது. இதனால், நாட்டு மக்களில் எவரும் பாதிக்கப்படாதவர்களே இல்லை என்ற நிலை ஏற்படப் போகிறது.  இந்நிலையில் மத்திய அரசின் முக்கிய திட்டங்கள் எதிர்பார்த்த பலனை தராமல் மக்களை கடுமையாக பாதித்து வருகின்றன.


பிரதமரின் வேலை வாய்ப்பு உருவாக்கும் திட்டம், தீனதயாள் அந்தியோதயா யோஜ்னா-தேசிய நகர்ப்புற வாழ்வாதார திட்டம் போன்றவற்றில், முதன்மையான வேலை வாய்ப்பு உருவாக்கம் மற்றும் வேலை வாய்ப்புகள் இந்த நிதியாண்டில் கடுமையாக குறையும் என நாடாளுமன்றத்தில் மத்திய தொழிலாளர் மறறும் வேலைவாய்ப்பு அமைச்சகம் தாக்கல் செய்த தரவுகளில் தெரிவிக்கப்பட்டுள்ளது.

பிரதமரின் வேலை வாய்ப்பு உருவாக்கும் திட்டத்தின் கீழ், 2018-19 இல் 5.87 லட்சம் வேலை வாய்ப்புகள் உருவாக்கப்பட்டன. ஆனால், 2019-20 இல் 2.57 லட்சமாக குறைந்துள்ளது. 2014 ஆம் ஆண்டு பிரதமராக மோடி பொறுப்பேற்றபின், பல மாநிலங்களில் வேலை வாய்ப்புகள் குறைந்துள்ளன. 2019-20 இல் இதுவரை 45 ஆண்டுகளில் இல்லாத அளவுக்கு இத்திட்டத்தின் கீழ் வேலைவாய்ப்பு உருவாக்குதல் பெருமளவு குறைந்துள்ளது.

வறுமை ஒழிப்பு திட்டமான தீனதயாள் அந்தியோதயா யோஜ்னா-தேசிய நகர்ப்புற வாழ்வாதார திட்டத்தின் கீழ், 2018-19 ஆம் ஆண்டு புதிய வேலைவாய்ப்புகள் 1.78 லட்சத்திலிருந்து 44 ஆயிரத்து 66 ஆக 2019-20 இல் குறைந்துள்ளன. குஜராத், மத்திய பிரதேசம் போன்ற மாநிலங்களில் நடப்பு நிதியாண்டில் இதன் அளவு பெருமளவு குறைந்துள்ளது.

 

nakkheeran app




காங்கிரஸ் தலைமையிலான ஐக்கிய முற்போக்கு கூட்டணி அரசால் தொடங்கப்பட்ட மகாத்மா காந்தி தேசிய கிராமப்புற வேலைவாய்ப்பு உறுதித் திட்டத்திலும் வேலை வாய்ப்பு கடுமையாக குறைந்தது. 2018-19 இல் 26 ஆயிரத்து 796  மனித நாள்களிலிருந்து இருந்து 20 ஆயிரத்து 577 ஆக வேலைவாய்ப்பு குறைந்தது. இதனால் கிராமப்புற பொருளாதாரம் கடுமையாக பாதிக்கப்பட்டுள்ளது.

தீன் தயாள் உபாத்தியாய கிராமின் கவுசல்யா யோஜ்னாவின் கீழ், 2018-19 இல் பயிற்சி மற்றும் வேலைவாய்ப்பு பெற்றோரின் எண்ணிக்கை குறைந்ததுள்ளது. பயிற்சி பெறுவோரின் எண்ணிக்கை 2.4 லட்சத்திலிருந்து 1.74 லட்சமாகவும், வேலைவாய்ப்பு 1.35 லட்சத்திலிருந்து 1.10 லட்சமாகவும் குறைந்துள்ளது. இந்த மத்திய அரசின் திட்டங்களில் வேலை வாய்ப்புகள் கடுமையாக பாதிக்கப்பட்டுள்ளதை போல, மாநிலங்களிலும் இத்தகைய பாதிப்புகளிலிருந்து தப்பமுடியவில்லை.

இந்நிலையில் இந்தியாவின் எதிர்காலம் குறித்து எந்த செயல்திட்டமும் மத்திய அரசிடம் இல்லை. இதிலிருந்து இந்தியாவை மீட்டு, மீண்டும் தொழில் உற்பத்தியை பெருக்குவதற்கு மத்திய அரசு மேலும் அதிக நிதியை ஒதுக்கவேண்டும். வெறும் அறிவிப்புகளால் எந்தப் பலனும் ஏற்படாது. மக்களிடையே வாங்கும் சக்தியை அதிகரிப்பதற்கு நிதியை ஒதுக்க வேண்டும். இதை செய்யாதவரை பொருளாதார பேரழிவிலிருந்து மக்களை மோடி அரசால் காப்பாற்ற முடியாது. இவ்வாறு கூறியுள்ளார். 

 

 

சார்ந்த செய்திகள்

 

Next Story

“மணிப்பூர் இரண்டாகப் பிளவுபட்டுள்ளது” - ராகுல் காந்தி எம்.பி. உருக்கம்!

Published on 08/07/2024 | Edited on 08/07/2024
Manipur is divided into two Rahul Gandhi MP

கடந்த ஆண்டு மணிப்பூரில் மெய்தி - குக்கி சமூகங்களுக்கு இடையே ஏற்பட்ட மோதல், ஆளும் பாஜக அரசின் அலட்சியத்தால் கலவரமாக மாறியது. மெய்தி மக்களை, பழங்குடிப் பட்டியலில் சேர்க்கும் பரிந்துரையை மத்திய அரசுக்கு அனுப்ப ஆளும் பாஜக அரசுக்கு மணிப்பூர் உயர் நீதிமன்றம் உத்தரவிட்டது. ஆனால், அதனை எதிர்த்து குக்கி பழங்குடியின மக்கள் நடத்திய அமைதிப் பேரணியில் வன்முறை வெடிக்க, மாநிலமே கலவர பூமியாக மாறியது. வன்முறைக்கு இடையில் குக்கி பழங்குடியினத்தைச் சேர்ந்த இரண்டு பெண்கள் நிர்வாணமாக இழுத்துச் செல்லப்பட்ட வீடியோ வெளியாகி, இந்திய நாட்டையே உலுக்கியது. இந்தச் சம்பவம் நடைபெற்று ஒரு ஆண்டுக்கு மேல் ஆகியும், இன்றுவரை மணிப்பூரில் கலவரம் ஓய்ந்தபாடில்லை.

இந்நிலையில் மக்களவை எதிர்க்கட்சித் தலைவரும், காங்கிரஸ் கட்சியின் மூத்த தலைவருமான ராகுல் காந்தி எம்பி மணிப்பூர் ஆளுநர் அனுசுயா உய்கேயை இம்பாலில் உள்ள ராஜ்பவனில் இன்று (08.07.2024) சந்தித்துப் பேசினார். இதனையடுத்து மணிப்பூரில் உள்ள நிவாரண முகாம்களுக்கு ராகுல் காந்தி சென்று பாதிக்கப்பட்டவர்களிடம் தங்கள் பிரச்சனைகளைக் கேட்டறிந்தார். இது தொடர்பாக ராகுல் காந்தி செய்தியாளர்களைச் சந்தித்துப் பேசுகையில், “மணிப்பூருக்கு என்னால் முடிந்ததைச் செய்ய நான் தயாராக இருக்கிறேன். இங்கு அமைதி திரும்பக் காங்கிரஸ் கட்சி என்ன செய்ய முடியுமோ அதைச் செய்யத் தயாராக உள்ளது. நாங்கள் ஆளுநரைச் சந்தித்துப் பேசினோம். எங்களால் இயன்ற உதவிகளைச் செய்ய விரும்புகிறோம் என்று ஆளுநரிடம் நாங்கள் தெரிவித்தோம். ஆளுநரிடம் நாங்கள் எங்களின் அதிருப்தியை வெளிப்படுத்தினோம். 

Manipur is divided into two Rahul Gandhi MP

இங்கு வன்முறைக்குப் பிறகு இங்கு ஏற்பட்டுள்ள முன்னேற்றம் குறித்து நாங்கள் மகிழ்ச்சியடையவில்லை என்றும், மேலும் இந்த விவகாரத்தை அரசியலாக்குவதற்கு நான் விரும்பவில்லை என்று அது எனது நோக்கமல்ல எனத் தெரிவித்தேன். முழு மணிப்பூரும் வேதனையில் உள்ளது. துன்பத்தில் உள்ளது. இந்த துன்பத்திலிருந்து விரைவில் மீள வேண்டும் என்பதை இந்த பயணத்தின் மூலம் நான் புரிந்துகொள்கிறேன். அனைவரும் அமைதி மற்றும் சகோதரத்துவம் பற்றிச் சிந்திக்க வேண்டும். மாறாக வன்முறை மற்றும் வெறுப்பால் எந்த ஒரு தீர்வும் கிடைக்கப் போவதில்லை. எனவே நாம் அமைதியைப் பற்றிச் சிந்திக்க ஆரம்பித்தால் பாசத்தைப் பற்றிச் சிந்திக்கத் தொடங்கினால் நான் மகிழ்ச்சி அடைகிறேன். நீங்கள் சொல்வதைக் கேட்டு எதிர்க்கட்சித் தலைவராக உங்களுக்கு உதவ முயற்சிப்பதில் மகிழ்ச்சி அடைகிறேன். இந்திய அரசும், தேசபக்தர்களாகக் கருதும் ஒவ்வொருவரும் மணிப்பூர் மக்களை அணுகி அரவணைக்க வேண்டும். மணிப்பூருக்கு அமைதியைக் கொண்டு வாருங்கள்.

மணிப்பூரில் பிரச்சனை தொடங்கியதில் இருந்து நான் மூன்றாவது முறையாக இங்கு வந்துள்ளேன். இங்கு மிகப்பெரிய சோகத்தை ஏற்படுத்தியுள்ளது. இந்த சூழ்நிலையில் முன்னேற்றம் ஏற்படும் என எதிர்பார்த்தேன், ஆனால் ஏமாற்றம் அடைந்தேன். நிலைமை இன்னும் எங்கும் சரியாகவில்லை என்பதைப் பார்க்க முடிகிறது. நான் நிவாரண முகாம்களுக்குச் சென்று அங்குள்ள மக்களைக் கேட்டறிந்தேன். அவர்களின் வலியைக் கேட்டேன். அவர்கள் மீது நம்பிக்கையை வளர்க்க இங்கு வந்தேன். மாநிலம் இரண்டாகப் பிளவுபட்டுள்ளது. 

Manipur is divided into two Rahul Gandhi MP

நான் உங்கள் சகோதரனாக இங்கு வருகிறேன். மணிப்பூரில் அமைதியை மீட்டெடுக்க உங்களுடன் இணைந்து பணியாற்ற விரும்புகிறேன் அதற்கு உதவுங்கள். பிரதமர் இங்கு வருவதும், மணிப்பூர் மக்கள் சொல்வதைக் கேட்பதும், மணிப்பூரில் என்ன நடக்கிறது என்பதைப் புரிந்துகொள்வதும் முக்கியம் என்று நான் உணர்கிறேன். எல்லாவற்றிற்கும் மேலாக மணிப்பூர் இந்திய ஒன்றியத்தின் பெருமைக்குரிய மாநிலம். இந்த மாபெரும் சோகத்தில் பிரதமர் மணிப்பூருக்கு வந்திருக்க வேண்டும். மணிப்பூர் மக்களுக்கு இது ஆறுதல் அளிக்கும்” எனப் பேசினார். 

Next Story

“சரணடைந்த கொலையாளிகள் மீது நம்பிக்கை இல்லை; பின் புலத்தை ஆராய வேண்டும்”- செல்வப்பெருந்தகை

Published on 06/07/2024 | Edited on 07/07/2024
selvaperunthagai condemns Armstrong  incident

தமிழக பகுஜன் சமாஜ் கட்சியின் மாநில தலைவர் ஆம்ஸ்ட்ராங் நேற்று(5.7.2024) இரவு பெரம்பூரில் உள்ள அவரது வீட்டின் அருகே 6 பேர் கொண்ட மர்ம கும்பலால் வெட்டி படுகொலை செய்யப்பட்டார். இந்த சம்பவம் மாநிலம் முழுவதும் பெரும் பரபரப்பை ஏற்படுத்திய நிலையில், 10 தனிப்படைகள் அமைக்கப்பட்டு  போலீசார்  தீவிர விசாரணை நடத்தி வருகின்றனர்.

இதனிடையே, இந்தக் கொலை வழக்கில், நேற்று இரவே, பாலா, ராமு, திருமலை, செல்வராஜ், அருள் உள்ளிட்ட 8 பேர் தாங்கள்தான் ஆம்ஸ்ட்ராங்கை கொலை செய்தோம் என்று காவல் நிலையத்தில் சரண் அடைந்தனர். இதில் கடந்த ஆண்டு வெட்டி கொல்லப்பட்ட ஆற்காடு சுரேஷின் சகோதரர் பாலா என்பவர் தனது அண்ணன் கொலைக்கு பழிக்கு பழி வாங்கவே, கூட்டாளிகளை சேர்த்துக்கொண்டு ஆம்ஸ்ட்ராங்கை கொலை செய்ததாக  பரபரப்பு வாக்குமூலம் கொடுத்துள்ளார். தொடர்ந்து போலீசார் விசாரணை மேற்கொண்டு வருகின்றனர். 

இது தொடர்பாக செய்தியாளர்களை சந்தித்த தமிழக காங்கிரஸ் கமிட்டி தலைவர் செல்வப்பெருந்தகை, “ஆம்ஸ்ட்ராங் தனிமையில் இருக்கும் பொழுது கோழைகள் திட்டமிட்டு படுகொலை செய்துள்ளார்கள். காங்கிரஸ் பேரியக்கம் வன்மையாக கண்டிக்கிறது. ராகுல் காந்தி சோனியா காந்தி காலை தொடர்பு கொண்டு என்ன நடந்தது என்று விசாரித்தார்கள். பகுஜன் சமாஜ் கட்சி தேசிய தலைவர் மாயாவதி இடமும் பேசியுள்ளார்கள். உண்மையான குற்றவாளிகளை ஆராய வேண்டும்; கண்டுபிடிக்க வேண்டும். இதில் யார் ஈடுபட்டிருந்தாலும் சரி, ஏற்கெனவே சரண் அடைந்துள்ள கொலையாளிகள் மீது யாருக்கும் நம்பிக்கை இல்லை. பின் புலம் என்னவென்று ஆராய வேண்டும். எவ்வளவு பெரிய ஆளாக இருந்தாலும் சரி எவ்வளவு பெரிய அரசியல் பின்புலம் இருந்தாலும் சரி சட்டத்திற்கு முன் நிறுத்த வேண்டும் என்பது காங்கிரஸ் பேரியக்கத்தின் கோரிக்கை.

அவரின் உடலை அவருடைய வீட்டிற்கு கொண்டு செல்ல வேண்டும். பௌத்தராக தன்னை அர்ப்பணித்துள்ளார் என்ன பூஜை செய்ய வேண்டுமோ அதற்கு அனுமதிக்க வேண்டும், பிறகு அவரின் குடும்பத்தினர், கட்சி உறுப்பினர்கள் கேட்கும் இடத்தில் அடக்கம் செய்ய அனுமதிக்க வேண்டும். விஜயகாந்தை எப்படி அவரின் தலைமை அலுவலகத்தில் அடக்கம் செய்தார்களோ அதே போல் ஆம்ஸ்ட்ராங்கையும் அவர் கட்சி அலுவலகத்தில் அடக்கம் செய்ய வேண்டும். இது அந்தக் கட்சியினரின் கோரிக்கையும் கூட காங்கிரஸ் கட்சியினரின் கோரிக்கையும் கூட” எனத் தெரிவித்துள்ளார்.