Skip to main content

"அதுக்குத்தான் ஆல் இன் ஆல் அழகுராஜா இருக்காரே..." -வாய் விட்டு சிரித்த செங்கோட்டையன்

Published on 24/01/2020 | Edited on 24/01/2020

 

"நீட்" தேர்வு விவகாரத்தில் எந்த குழப்பமும் இல்லை. நீட்டாக (அதாவது சரியாகவாம்) இருப்பதாக மீண்டும் குழப்பியுள்ளார் பள்ளி கல்வித்துறை அமைச்சரான கே.ஏ.செங்கோட்டையன். 
 

ஈரோடு மாவட்டத்தில் நடைபெற்றுவரும் வளர்ச்சி திட்டப்பணிகள் குறித்தான ஆய்வு கூட்டம் வணிக வரி மற்றும் பதிவுத்துறை முதன்மை செயலாளர் பாலச்சந்திரன் தலைமையில் இன்று மாவட்ட கலெக்டர் ஆபீஸில் நடந்தது. கூட்டத்தில் கலந்து கொண்ட அமைச்ங்ர் செங்கோட்டையன் பிறகு செய்தியாளர்களிடம் பேசினார்.

 

 sengottaiyan


 

"தமிழகத்தில் பல்வேறு திட்டங்களை  முன்னாள் முதல்வர் ஜெயலலிதா வழிகாட்டுதலின் படி முதல்வர் எடப்பாடி பழனிச்சாமி  நிறைவேற்றி வருகிறார். சென்ற மூன்று மாதங்களுக்கு முன் ஈரோடு மாவட்டத்தில் ஆய்வுப்பணிகள் நடந்தது. ஈரோடு மாவட்டத்தில் வளர்ச்சி பணிகள் 90 சதவீதம் முடியுற்றுள்ளது. மீதமுள்ள பணிகளை விரைவுபடுத்த நடவடிக்கை  எடுத்துள்ளோம். ஆய்வு கூட்டத்தில் என்னென்ன பணிகளை விரைவுபடுத்த வேண்டும் என எம்எல்ஏ.,க்கள் யோசனை தெரிவித்தனர்.


புதிய திட்டங்களை கொண்டு வருவது பற்றி பரிசீலித்துள்ளோம்" என்ற அவர், "ஒன்றாம் வகுப்பு முதல் 5 ம் வகுப்பு  ஆசிரியர்களுக்கு பயோமெட்ரிக் முறை அமலாவது தொடர்பாக பரிசீலனையில் உள்ளது.  6 ம் வகுப்பு முதல் மேல்நிலைப்பள்ளி வரையிலான ஆசிரியர்களுக்கு பயோமெட்ரிக் செயல்படுத்தப்பட்டுள்ளது. நிதி பற்றாக்குறையால் நிதித்துறை செயலாளருக்கு கோப்பு அனுப்பி உள்ளோம். நிதி கிடைத்தவுடன் செயல்படுத்தப்படும்.


ஆசிரியர்களுக்கு லேப்டாப் வழங்கும் திட்டத்தில் பத்தாம் வகுப்பு, பிளஸ் 1, பிளஸ் 2 ஆசிரியர்கள் என இல்லாமல் அனைத்து ஆசிரியர்களுக்கும் லேப் டாப் வழங்க திட்டமிடப்பட்டுள்ளது. 28 ஆயிரம் ஆசிரியர்களுக்கு இதுவரை வழங்கப்பட்டுள்ளது. மீதமுள்ள ஆசிரியர்களுக்கு  ஆண்டு தோறும் நிதிக்கு தகுந்தற்போல வழங்க நடவடிக்கை எடுக்கப்படும். நீட் தேர்வு பயிற்சி நீட்டாக நடக்கிறது." இவ்வாறு அவர் கூறினார். 
 

பிறகு செய்தியாளர்கள் "அ.தி.மு.க.விமர்சனத்திற்கு பதில் தராமல் கூட்டணி தர்மத்திற்காக அமைதியாக உள்ளதாக பா.ஜ.க. பொன் ராதாகிருஷ்ணன் கூறியுள்ளாரே.. என கேள்வி எழுப்ப கூட்டத்தில் இருந்த ர.ர. ஒருவர், "ஏப்பா ரிப்போட்டர் அண்ணன் அரசியல் பேச மாட்டாருனு தெரியுமல்ல, அப்புறம் எதுக்கு மைக்க வாயிகிட்டேயே நீட்றீங்க... இந்த வாயில இருந்து வேற எந்த வார்த்தையும் வராது லேப்டாப், ஜாமன்ட்ரி பாக்ஸ், இலவச சைக்கிள், கல்விப் புரட்சி இது மட்டும் தான் வரும் எல்லாத்தையும் பேசத்தான் ஆல் இன் ஆல் அழகுராஜா அண்ணன் ஜெயக்குமார் இருக்காரு அங்க போங்க..." என கிண்டலாக நையாண்டி செய்தார். இதை காதில் வாங்கி வாய் விட்டு சிரித்துக் கொண்டே நடையை கட்டினார் செங்கோட்டையன்.


 

சார்ந்த செய்திகள்

Next Story

“எடப்பாடி செய்த சதியை முறியடிக்கத் தயாராக இருக்கிறேன்” - ஓ.பி.எஸ்.ஸின் பிரத்யேக பேட்டி

Published on 28/03/2024 | Edited on 28/03/2024
ready to defeat tready to defeat the conspiracy of EPS says Exclusive interview with OPShe conspiracy of EPS says Exclusive interview with OPS

தேனி பாராளுமன்றத் தொகுதியில் பி.ஜே.பி. கூட்டணி சார்பில் அ.ம.மு.க. வேட்பாளராக டி.டி.வி. தினகரன் போட்டியிடுவதால் ஓ.பி.எஸ்.ஸின் முழு ஆதரவும் டிடிவிக்கு இருக்கிறது. அதோடு டிடிவியும் நான் போட்டி போடுகிறேன் என்று தெரிந்து தான் இத்தொகுதியை ஓ.பி.எஸ்.ஸும் அவரது மகன் ஓ.பி.ஆர்.ரும் எனக்காக விட்டுக் கொடுத்தும் இருக்கிறார்கள் என்று கூறியிருக்கிறார். அந்த அளவுக்கு ஓபிஎஸ்ஸும் டி.டி.வி.யும் தேர்தல் களத்தில் நெருக்கமாக இருந்து வருகிறார்கள்.

இந்த நிலையில் தான் வேட்புமனு தாக்கலின் இறுதி நாளான நேற்று 27 ஆம் தேதி வேட்புமனு தாக்கல் செய்ய டிடிவி தினகரன் மதியத்துக்கு மேல் தேனி ஆட்சியர் அலுவலகத்திற்கு வருவதாக இருந்தது. இந்த விஷயம் ஓபிஎஸ்-க்கு தெரியவே, மதியம் ஒன்னேகால் மணிக்கு எல்லாம் தேனி ஆட்சியர் அலுவலகத்திற்கு வந்தவர் அலுவலக வளாகத்தில் உள்ள மரத்தடியில் நின்று கொண்டு டிடிவியை வரவேற்க காத்துக் கிடந்தார். அவருடன் ஆதரவாளர்களான செல்லமுத்து மற்றும் சையதுகான் ஆகியோர் இருந்தனர்.

ad
ஓபிஎஸ் உடன் நமது நிருபர்

அப்போது நாம் முன்னாள் முதல்வரான ஓபிஎஸ்ஸிடம் சென்று நம்மை நக்கீரன் நிருபர் என்று அறிமுகப்படுத்திய உடனே ஆசிரியர் நல்லா இருக்காரா? என்று கேட்டார். அதைத் தொடர்ந்து நாமும் ஆசிரியர் நலமாக இருக்கிறார் என்று கூறியவாறே தொகுதியின் தேர்தல் பணி எந்த அளவுக்கு இருக்கிறது என்று கேட்டபோது, “நான் போட்டி போடும் அந்த தொகுதியில் பிரதமர் மோடி தான் போட்டிப் போடுவதாக இருந்ததால் அங்குள்ள கட்சியினர் தொகுதியை ஒரு கட்டுக்கோப்பாக பிரதமருக்காக தயார் செய்தும் வைத்திருந்தனர். ஆனால் பிரதமர் இங்கே போட்டி போடவில்லை என்பதால் என்னையத்தான் நிற்க சொன்னார். அதன்பேரில் தான் போட்டி போடுகிறேன்” என்றவரிடம் அத்தொகுதியில் முக்குலத்தோர் சமூக ஓட்டுக்கள் அதிகமாக இருக்கிறதா என்று கேட்டபோது, அத்தொகுதியில் மொத்தம் பதினாறு லட்சம் ஓட்டுகள் இருக்கிறது. இதில் சிறுபான்மை சமூக ஓட்டுகள் இரண்டு லட்சம் இருப்பதாக தெரிகிறது. அதுபோல் முக்குலத்தோர் சமூக ஓட்டுகள் ஆறு லட்சத்திற்கு மேல் இருப்பதாக தெரிகிறது. மீதி மற்ற சமூக மக்கள் இருக்கிறார்கள் என்றவரிடம், உங்களுடைய வெற்றி வாய்ப்பு எப்படி இருக்கிறது என்று கேட்டதற்கு என்னுடைய வெற்றி உறுதி இறைவன் இருக்கிறார்” என்றார்.

உங்களை பெயரிலேயே ஐந்து சுயேச்சைகள் வேட்புமனு தாக்கல் செய்து இருக்கிறார்கள். அது பற்றி என்ன நினைக்கிறீர்கள் என்று கேட்டதற்கு, “நான் வெற்றி பெறக் கூடாது என்பதற்காகவே எடப்பாடி செய்த சதி. அதையும் முறியடிக்க தயாராக இருக்கிறேன்” என்றார். தொடர்ந்து தேனி மாவட்டத்தில் உள்ள அ.தி.மு.க.வினர் கூட டிடிவிக்கு மறைமுகமாக சப்போர்ட் பண்ண இருப்பதாக ஒரு பேச்சு அடிபடுகிறதே என்று கேட்டதற்கு சிரித்துக் கொண்டே “அதுவும் நடக்கலாம் நான் சொன்னது போல் தமிழகம் முழுவதுமே அ.தி.மு.க. படுதோல்வி அடையும்” என்று சொல்லிக் கொண்டு இருந்தார்.

ready to defeat the conspiracy of EPS says Exclusive interview with OPS

அப்போது தேர்தல் பிரச்சார வாகனத்தில் ஆட்சியர் அலுவலகத்திற்குள் இரண்டேகால் மணிக்கு டிடிவி வந்தார். அவரை ஓபிஎஸ் சால்வை அணிவித்து வரவேற்றார். அதன்பின் ஓ.பி.எஸ். தனது ஆதரவாளர்களுடன் மீண்டும் மரத்தடியிலேயே நின்றார். அப்போது பயனாளிகளுக்காக போடப்பட்டிருந்த இரும்பு சேரில் ஓ.பி.எஸ் உடன் வந்த இருவரும் உட்கார்ந்து இருந்தனர். அதைத் தொடர்ந்து டிடிவி தினகரன் தனது வேட்புமனுவை தேர்தல் அதிகாரியான ஆட்சியரிடம் தாக்கல் செய்துவிட்டு வந்தார். வந்தவர் பத்திரிகையாளர்களை சந்தித்து பேட்டியும் கொடுத்தார். அதுவரை ஓபிஎஸ் டிடிவியுடனே நின்றுவிட்டு டிடிவியை பிரச்சார வேனில் திரும்ப வழியனுப்பி விட்டுத்தான் திரும்பினார்.

Next Story

கணேசமூர்த்தி உடலுக்கு வைகோ நேரில் அஞ்சலி (படங்கள்)

Published on 28/03/2024 | Edited on 28/03/2024

 

ம.தி.மு.க. எம்பி கணேசமூர்த்தி தனியார் மருத்துவமனையில் அனுமதிக்கப்பட்டிருந்த நிலையில் சிகிச்சை பலனின்றி உயிரிழந்துள்ளார்.

ஈரோடு பாராளுமன்றத் தொகுதி எம்பியான கணேசமூர்த்தி மதிமுகவின் பொருளாளராகப் பணியாற்றி வந்தார். சென்ற தேர்தலில் ஈரோடு தொகுதி மதிமுகவுக்கு ஒதுக்கப்பட்டது. அப்போது உதயசூரியன் சின்னத்தில் நிற்க வேண்டிய சூழல் மதிமுகவுக்கு ஏற்பட்டதால் கணேசமூர்த்தி உதயசூரியன் சின்னத்தில் நின்று பெருவாரியான வாக்குகள் வித்தியாசத்தில் வெற்றி பெற்றார். அதன் பிறகு கடந்த ஐந்து வருடமாக தனது பாராளுமன்ற உறுப்பினர் பதவியைத் தொடர்ந்து மக்களுக்குப் பணியாற்றி வந்தார்.

கடந்த ஞாயிற்றுக்கிழமை காலை திடீரென ஈரோட்டில் உள்ள தனியார் மருத்துவமனையில் அனுமதிக்கப்பட்டு கணேசமூர்த்தி தீவிர சிகிச்சை பெற்று வந்தார். வீட்டில் தற்கொலை முயற்சியில் ஈடுபட்ட கணேசமூர்த்தி, சல்பாஸ் மாத்திரை எனப்படுகிற உயிர்க்கொல்லி மாத்திரையை அவர் விழுங்கியது தெரியவந்தது.

கோவை அவிநாசி சாலையில் உள்ள தனியார் மருத்துவமனையில் மேல் சிகிச்சை பெற்று வந்த கணேசமூர்த்தி, சிகிச்சை பலனின்றி உயிரிழந்துள்ளதாக மருத்துவமனை தரப்பில் தெரிவிக்கப்பட்டுள்ளது. இன்று அதிகாலை 5.05 மணிக்கு திடீரென சிகிச்சையில் இருந்த அவருக்கு மாரடைப்பு ஏற்பட்ட நிலையில், சிகிச்சை பலனின்றி உயிரிழந்தார். அவரது மறைவுக்குப் பல்வேறு அரசியல் தலைவர்கள் இரங்கல் தெரிவித்துள்ளனர். இந்நிலையில் மதிமுக சார்பில் வைகோ நேரில் சென்று அவரது உடலுக்கு அஞ்சலி செலுத்தினார். தொடர்ந்து கணேசமூர்த்தியின் மகன் கபிலனுக்கு ஆறுதல் தெரிவித்தார்.