மாடவீதியில் பக்தர்களுக்குத் தடை; கோபத்தில் ஆன்மீக பக்தர்கள் - தொடங்கியது காவல்துறையின் அராஜகம்

திருவண்ணாமலை அண்ணாமலையார் கோவில் கார்த்திகை தீபத்திருவிழாவின் 7வது நாளான இன்று, நவம்பர் 30ஆம் தேதி மகாரதம் என்கிற பெரியதேர் வீதியுலா நடைபெறவுள்ளது. இதற்காக பல்லாயிரக்கணக்கான பக்தர்கள் திருவண்ணாமலை நோக்கி வந்து குவிந்து சுவாமி தரிசனம் செய்துவிட்டு சென்றுக்கொண்டு இருக்கிறார்கள். இன்று மட்டும் குறைந்தது சுமார் 3 லட்சம் பக்தர்கள் மாடவீதிக்கு வந்து செல்வார்கள் என கணக்கிடப்பட்டுள்ளது. சில ஆயிரம் பேர் தேர் வடத்தை பிடித்து இழுக்க காத்துக்கொண்டு இருக்கிறார்கள்.

இன்று காலை விநாயர் தேர், முருகர் தேர் மாடவீதியை சுற்றி வந்தபின் மகாரதம் பக்தர்களால் இழுக்கப்படும். இந்த தேர் வீதியுலா வந்து முடிந்தபின் பெண்களால் மட்டுமே இழுக்கப்படும் அம்மன்தேர், இறுதியில் சண்டீகேஸ்வரர் தேர் வீதியுலா வரும். இந்த நாளில் பக்தர்கள் கரும்பு தொட்டில் கட்டி தங்களது குழந்தைகளை அதில் உட்காரவைத்து அண்ணாமலையார் கோவில் ராஜகோபுரம் முன் தொடங்கி மாடவீதியை வலம் வந்து அதே ராஜகோபுரம் முன்பு நேர்த்திக்கடன் செலுத்தி முடிப்பார்கள். நீண்டகாலம் குழந்தை இல்லாதவர்கள், குழந்தை நல்லபடியாக பிறக்கவேண்டும் என நினைப்பவர்கள் என குழந்தைக்காக நடக்கும் நேர்த்திக்கடன் இது. தமிழ்நாட்டின் பல பகுதிகளில் இருந்துவந்து பக்தர்கள் கரும்பு தொட்டில் நேர்த்திக்கடன் செய்வார்கள், இது பல்லாண்டு காலமாக நடப்பது. கடந்த இரண்டு ஆண்டுகளாக பாதுகாப்பு என்கிற பெயரில் காவல்துறை இதனை தடுத்து வருகிறது.

இந்த நிலையில், இந்தாண்டு இன்று கரும்பு தொட்டில் எடுத்துக்கொண்டு பக்தர்கள் மாடவீதியில் செல்லவே தடை விதிக்கிறார்கள் பாதுகாப்புக்கு நிற்கும் காவல்துறை அதிகாரிகள். திருவிழாவின் ஒரு அங்கமான பக்தர்களின் இந்த நிகழ்வை தடுத்ததால் பக்தர்கள் அதிர்ச்சியடைந்தனர். குளிரில் தங்களது குழந்தைகள், உறவினர்களோடு கரும்பு தொட்டிலோடு ராஜகோபுரம் முன்பு விடியற்காலை முதல் வந்த பக்தர்களிடம் இதெல்லாம் செய்யக்கூடாது என அங்கு பாதுகாப்புக்கு நின்றிருந்த டி.எஸ்.பி செந்தில்குமார் தலைமையிலான போலீசார் தடுத்தனர். இதனால் பக்தர்கள் அதிர்ச்சியடைந்தனர். போலீஸாரிடம் பக்தர்கள் கெஞ்சுவதும், வாக்குவாதம் செய்ததாலும் ராஜகோபுரம் முன்பு பரபரப்பானது. சிலர் மறைவான இடத்தில் வைத்து தொட்டில் கட்டி எடுத்து சென்றபோது மாடவீதியில் கல்லக்கடை மூலை பகுதியில் தடுத்து நிறுத்தி போலீசார் எச்சரித்து மிரட்டினர். இது பிரச்சனையாகி திருவண்ணாமலை மாவட்ட எஸ்.பி சுதாகருக்கு தகவல் சென்றபின், பக்தர்களை தடுக்காதீர்கள் எனச் சொன்ன பின்பும் நீண்டபோராட்டத்துக்கு பின்பே அனுமதி கிடைத்து பக்தர்கள் தங்களது நேர்த்திகடனை செலுத்தி வருகிறார்கள்.

மாடவீதி மட்டுமல்லாமல்அதனை சார்ந்துள்ள சின்னக்கடை தெரு, ஆனைக்கட்டி தெரு, தென் மற்றும் வட ஒத்தவாடைத்தெருவில் குடியிருப்பவர்களுக்கு பால் வழங்கும் பால் விற்பனையாளர்களையும் உள்ளே விடவில்லை என குற்றம் சாட்டப்படுகிறது. பெரியார் சிலை, காமராஜர் சிலை, சண்முகா பள்ளி, மத்திய பேருந்து நிலையம், திருவள்ளுவர் சிலை போன்ற பகுதிகளிலேயே வெளியூரிலிருந்து வரும் இருசக்கர வாகனங்களை காவல்துறை தடுத்து நிறுத்தியுள்ளது. இதன் உள்பகுதிகள் முழுவதும் குடியிருப்பு பகுதிகள். வெளியூர்காரர்கள் எப்படி உள்ளே வரமுடியாதபடி செய்துள்ளதோ அதேப்போல் காவல்துறையின் தடுப்புக்கு உள்ளிருக்கும் 50க்கும் மேற்பட்ட தெருக்களில் வசிக்கும் பொதுமக்களும் யாரும் வெளியே செல்லமுடியாத நிலையை காவல்துறை உருவாக்கியுள்ளது.

கடந்தாண்டு மகாதீபத்தன்று 14 கி.மீ மலையை சுற்றி வரமுடியாத வயதானவர்கள் மற்றும் உள்ளுர் பக்தர்கள் கோவிலை சுற்றியுள்ள மாடவீதியில் கிரிவலம் வருவார்கள். கடந்தாண்டு மாடவீதியில் கிரிவலம் வரக்கூடாது அதாவது நடக்கவேகூடாது என தடுத்தார்கள் பாதுகாப்புக்கு நின்றிருந்த காவல்துறையினர். இதற்காக மாடவீதியில் நான்கு இடங்களில் தடுப்பு அமைத்து பக்தர்களை தடுத்து துரத்தினர். உள்ளுர் பக்தர்கள் திரண்டு பிரச்சனை செய்த பின்பு மாடவீதியில் கிரிவலம் வர அனுமதித்தார்கள். இந்தாண்டு கொஞ்சம் முன்னேறி தேர் திருவிழாவின்போதே மாடவீதியில் பக்தர்கள் கிரிவலம் வரக்கூடாது, நேர்த்திக்கடன் செய்யக்கூடாது என தடுக்கின்றனர். இன்றே இப்படி என்றால் வரும் டிசம்பர் 3 ஆம் தேதி மகாதீபம், டிசம்பர் 4 ஆம் தேதி பௌர்ணமி. இதற்காக பல லட்சம் பக்தர்கள் வருவார்கள். அப்போது பாதுகாப்பு என்கிற பெயரில் உள்ளுர் மக்களையும், பக்தர்களையும் இன்னும் எப்படியெல்லாம் இம்சைப்படுத்த போகிறார்களோ, எதற்கெல்லாம் தடை விதிக்கப்போகிறார்களோ என்கிற பயம் உள்ளுர் மக்களிடமும் பக்தர்களிடம் எழுந்துள்ளது.

தீபத்திருவிழாவில் பாதுகாப்பு என்கிற பெயரில் காவல்துறையின் அராஜகம் ஒவ்வொரு ஆண்டும் அதிகரித்தபடியே உள்ளன. திருவிழா பாதுகாப்புக்காக காவல்துறையா? காவல்துறைக்காக திருவிழாவா என்கிற கேள்வி இந்தாண்டும் எழுந்துள்ளது. இதற்கு ஒரு முடிவே இல்லையா என்பதே பக்தர்கள் மற்றும் பொதுமக்களின் கேள்வியாக உள்ளது.