“எந்நேரத்திலும் இந்தியா, இலங்கையுடன் தொடர்ந்து துணை நிற்கும்” - பிரதமர் மோடி ஆறுதல்!

இலங்கையில் கடந்த சில தினங்களாக அதி கனமழையானது பெய்து வருகிறது. அதிலும் குறிப்பாக இலங்கையின் தென்பகுதிகளில் நேற்று முன்தினம் (27.11.2025) பெய்த அதிக கனமழை காரணமாக பல்வேறு இடங்களில் நிலச்சரிவு மற்றும் வெள்ளப்பெருக்கு ஏற்பட்டது. இதனால் ஏராளமானோர் பரிதாபமாக உயிரிழந்தனர். மேலும் பலரை காணவில்லை என்ற தகவலும் வெளியாகியிருந்தது. அதோடு காயமடைந்த நூற்றுக்கணக்கானோர்  மருத்துவமனையில் அனுமதிக்கப்பட்டு அவர்களுக்குச் சிகிச்சையானது  அளிக்கப்பட்டு வருகிறது. 

தொடர்ச்சியாகக் கனமழை பெய்ததன் காரணமாக மக்களின் இயல்பு வாழ்க்கை பெரிதும் பாதிக்கப்பட்டுள்ளது. கடந்த இரண்டு நாட்களாக நாட்டின் பல பகுதிகளில் பெய்த தொடர் கனமழை காரணமாகத் தாழ்வான பகுதிகள் மழை நீர் தேங்கியுள்ளது. இதனால் பொதுமக்கள் மொட்டை மாடிகளில் தஞ்சம் புகுந்துள்ளனர். இதனையடுத்து பாதிக்கப்பட்டவர்களை ஹெலிகாப்டர் மூலமாக மீட்கும் பணியும் நடைபெற்று வருகிறது. இத்தகைய சூழலில் தான் டிட்வா புயலால் இலங்கையில் பெய்த கனமழை மற்றும் நிலச்சரிவில் சிக்கி உயிரிழந்தவர்களின் எண்ணிக்கை 85 ஆக உயர்ந்துள்ளது. மேலும், 21 பேரைக் காணவில்லை எனவும் தகவல் வெளியாகியுள்ளது.

அதோடு 600க்கும் மேற்பட்ட வீடுகள் சேதமடைந்துள்ளன. சுமார் 44 ஆயிரத்திற்கும் மேற்பட்ட மக்கள் பாதிக்கப்பட்டுள்ளனர். இதனால், வெள்ளம் பாதித்த பகுதிகளில் மீட்புப் பணிகளுக்காக 20 ஆயிரத்து 500 ராணுவ வீரர்கள் களமிறக்கப்பட்டுள்ளனர் எனத் தகவல் வெளியாகியுள்ளது. இந்நிலையில் இந்திய பிரதமர் நரேந்திர மோடி இது தொடர்பாக அவர் எக்ஸ் சமூக வலைத்தளத்தில் வெளியிட்டுள்ள பதிவில், “டிட்வா புயலில் தமது அன்புக்குரிய உறவுகளை இழந்த இலங்கை மக்களுக்கு எனது இதயபூர்வமான அனுதாபங்கள். பாதிக்கப்பட்ட குடும்பங்களின் பாதுகாப்பு, ஆறுதல் மற்றும் துரித மீட்சிக்காக நான் பிரார்த்திக்கின்றேன். 

கடல் மார்க்கமாக மிகவும் நெருங்கிய அயலுறவுடன் எமது கூட்டொருமைப்பாட்டினை காண்பிக்கும் முகமாக சாகர் பந்து நடவடிக்கையின் கீழ் முக்கிய மனிதாபிமான அடிப்படையில் (HADR - Humanitarian Assistance and Disaster Relief) உதவி மற்றும் நிவாரணப் பொருட்களை இந்தியா உடனடி அவசர உதவியாக அனுப்பி வைத்துள்ளது. எவ்வாறான சூழலிலும் தேவையான மேலதிக ஆதரவு மற்றும் உதவிகளை வழங்க நாம் தயாராக உள்ளோம். இந்தியாவின் அயலுறவுக்கு முதலிடம் கொள்கை மற்றும் மஹாசாகர் தொலைநோக்கு ஆகியவற்றின் வழிகாட்டலுடன், உதவிகள் தேவைப்படும் எந்நேரத்திலும் இந்தியா இலங்கையுடன் தொடர்ந்து துணைநிற்கும்” எனத் தெரிவித்துள்ளார்.