“சனாதன தர்மத்தை காக்க தனி வாரியம்” - ஆந்திர துணை முதல்வர் பவன் கல்யாண்!

ஆந்திரப் பிரதேச மாநிலத்தில் கடந்த ஒய்.எஸ்.ஆர் காங்கிரஸ் தலைமையிலான ஜெகன்மோகன் ரெட்டியின் ஆட்சியின் போது, திருப்பதி ஏழுமலையான் கோவிலில் தயாரிக்கப்படும் லட்டில் விலங்குகளின் கொழுப்பு கலக்கப்பட்டதாக தற்போதைய முதல்வர் சந்திரபாபு நாயுடு குற்றச்சாட்டு வைத்திருந்தார்.

இந்த குற்றச்சாட்டு நாடு முழுவதும் பெரும் அதிர்ச்சியையும், அதிர்வலையையும் ஏற்படுத்திய நிலையில், இந்த விவகாரம் தொடர்பாக சிபிஐ விசாரணை நடத்தி வருகிறது. இந்த விவகாரம் குறித்து ஆந்திர துணை முதல்வரும், ஜன சேனா கட்சித் தலைவருமான பவன் கல்யாண் தொடர்ந்து விமர்சனம் செய்து வருகிறார்.

இந்த நிலையில், சனாதன தர்மத்தை காக்க தனி வாரியம் அமைக்க வேண்டும் என ஆந்திர துணை முதல்வர் பவன் கல்யாண் கோரிக்கை வைத்துள்ளார். இது குறித்து பவன் கல்யாண் கூறுகையில், “உலகெங்கிலும் உள்ள இந்துக்களுக்கு திருமலை திருப்பதி தேவஸ்தானம் மகத்தான ஆன்மீக மற்றும் உணர்ச்சி முக்கியத்துவத்தைக் கொண்டுள்ளது. உலகளாவிய இந்து சமூகத்திற்கு, திருமலை வெறும் புனித யாத்திரைத் தலமாக மட்டுமல்லாமல், ஒரு புனிதமான ஆன்மீகத் தலமாகவும் இருக்கிறது.

திருப்பதி லட்டு, வெறும் இனிப்பு மட்டுமல்ல, அது நம் குடும்பத்தினர், நண்பர்கள் மற்றும் அந்நியர்களுடன் கூட பகிர்ந்து கொள்ளும் ஒரு உணர்ச்சி. ஏனெனில் அது நமது கூட்டு நம்பிக்கையையும் ஆழ்ந்த நம்பிக்கையையும் உள்ளடக்கியுள்ளது. ஒவ்வொரு ஆண்டும் கிட்டத்தட்ட 2.5 கோடி பக்தர்கள் திருப்பதிக்கு வருகை தருகிறார்கள். சனாதனர்களின் உணர்வுகள் மற்றும் புனித நடைமுறைகள் கேலி செய்யப்படும்போது அல்லது குறைத்து மதிப்பிடும் போது ​​அது காயப்படுத்துவது மட்டுமல்லாமல், உலகம் முழுவதும் உள்ள மில்லியன் கணக்கான மக்களின் நம்பிக்கையையும் பக்தியையும் அசைக்கிறது.

மதச்சார்பின்மை என்பது இருவழிப் பாதையாக இருக்க வேண்டும். நமது நம்பிக்கைக்கான பாதுகாப்பு மற்றும் மரியாதையை பேரம் பேச முடியாது. சனாதன தர்மம் உலகின் பழமையான மற்றும் நீடித்த நாகரிகங்களில் ஒன்றாகும். அதைப் பாதுகாப்பதை நிறுவனமயமாக்க வேண்டிய நேரம் இது. அதனால், சனாதன தர்மத்தின் மதிப்புகளைப் பாதுகாக்க, அனைத்து பங்குதாரர்களின் ஒருமித்த கருத்துடன் ‘னாதன தர்ம பரிரக்ஷணா வாரியத்தை; நிறுவ வேண்டிய நேரம் இது. சனாதன தர்ம பரிரக்ஷணா வாரியம், சனாதன விழுமியங்களை தலைமுறை தலைமுறையாகப் பரப்புவதை ஊக்குவிப்பது, கோயில்கள் மற்றும் புனித நிறுவனங்களைப் பாதுகாப்பது மற்றும் இந்து மரபுகள் குறித்த உலகளாவிய விழிப்புணர்வை ஏற்படுத்துவதில் கவனம் செலுத்தும்” எனத் தெரிவித்துள்ளார்.