டிட்வா புயல் தாக்கம்; சீற்றத்துடன் காணப்படும் கடல் அலை!

டிட்வா புயலையொட்டி கடலூர், பரங்கிப்பேட்டை உள்ளிட்ட கடற்கரை பகுதியில் வழக்கத்திற்கு மாறாக கடல் சீற்றத்துடன் காணப்படுகிறது.

வங்கக்கடலில் உருவாகியுள்ள, டிட்வா புயலையொட்டி கடலூர், சிதம்பரம், புவனகிரி, காட்டுமன்னார்கோவில் உள்ளிட்ட சுற்று வட்டார பகுதிகளில் நேற்று இரவு முதல் மிதமான தொடர் மழை பெய்து கொண்டே உள்ளது. இதில் இன்று (29-11-25) பகல் மற்றும் இரவு என லேசான காற்றுடன் மழை தொடர்ந்து பெய்து வருகிறது.

இந்நிலையில் கடற்கரைப் பகுதிகளில் காற்றின் சீற்றம் வழக்கத்தை விட அதிகமாக இருந்தது. இதில் கடலூரில் உள்ள வெள்ளிகடற்கரை, சிதம்பரம் அருகே பரங்கிப்பேட்டை சாமியார் பேட்டை எம்.ஜிஆர் திட்டு கொடியம்பாளையம் உள்ளிட்ட பகுதிகளில் உள்ள கடலில் அலையின் சீற்றம் வழக்கத்துக்கு மாறாக 2 மீட்டர் உயரத்திற்கு எழுந்து ஆக்ரோஷமாக காணப்பட்டது. இதனால் பொதுமக்கள் யாரும் கடற்கரைக்குச் செல்லக்கூடாது காவல் துறையினர் அறிவுறுத்தினர். இந்த புயலால் கடந்த 4 நாட்களாக மீனவர்கள் கடலுக்கு செல்லவில்லை. படகுகள் அனைத்தும் கடற்கரையோரமாக நிறுத்தி வைக்கப்பட்டுள்ளது.

தொடர்ந்து மழை பெய்து வருவதால் நகரத்தில் உள்ள பல கடைகள் வியபாரம் இல்லாமல் மூடப்பட்டுள்ளது. பொதுமக்கள் வெளியே செல்ல முடியாத சூழ்நிலை உள்ளது. தொடர் மழை மற்றும் காற்றால் பிச்சாவரம் சுற்றுலா மையம் இன்று இயங்காது என மாவட்ட நிர்வாகம் அறிவித்துள்ளது. அதேபோல் புயல் கரையைக் கடக்கும் வரை பிச்சாவரம் சுற்றுலா மையம் இயங்காது என மாவட்ட நிர்வாகம் அறிவித்துள்ளது. புயல் நாளை (30-11-25) மாலை அல்லது இரவு கடக்கும் என வானிலை ஆய்வு மையம் தெரிவித்துள்ளது. நாளை பகலில் புயல் கரையை கடக்க வில்லையென்றால் படகு போக்குவரத்து இருக்காது எனவும் தெரிவிக்கப்பட்டுள்ளது.