‘நயினார் நாகேந்திரன் திடீர் டெல்லி பயணம்?’ - வெளியான முக்கிய தகவல்!

தமிழ்நாட்டில் அடுத்த ஆண்டு (2026) சட்டமன்றத் தேர்தல் நடைபெறவுள்ளது. இந்த தேர்தலை எதிர்கொள்ளத் தமிழக அரசியல் கட்சித் தலைவர்கள் இந்த ஆண்டின் தொடக்கத்தில் இருந்தே ஆயத்தமாகி வருகின்றனர். அந்த வகையில் பல்வேறு அரசியல் கட்சிகளும் சுற்றுப்பயணம், தேர்தல் பரப்புரை எனத் தீவிரம் காட்டி வருகின்றனர். அதன்படி, திமுக தலைமையிலான கூட்டணியில் காங்கிரஸ், விடுதலைச் சிறுத்தைகள் கட்சி, மதிமுக, மார்க்சிஸ்ட் கம்யூனிஸ்ட், இந்திய கம்யூனிஸ்ட் உள்ளிட்ட கட்சிகள் மீண்டும் கூட்டணியாக இணைந்து சட்டமன்றத் தேர்தலைச் சந்திக்க உள்ளன. 

அதே போல், எதிர்க்கட்சியான அதிமுக, மீண்டும் பா.ஜ.க.வுடன் கூட்டணி அமைத்துப் போட்டியிட உள்ளது. இது தவிர மற்ற கட்சிகளான தே.மு.தி.க., பா.ம.க. உள்ளிட்ட கட்சிகள் யாருடன் கூட்டணி சேரலாம் என்பது குறித்து தீவிர ஆலோசனையில் ஈடுபட்டு வருகின்றனர். இத்தகைய சூழலில் தான் நடிகரும், தமிழக வெற்றிக் கழகத் தலைவருமான விஜய் புதிதாகக் கட்சி ஆரம்பித்து இந்தத் தேர்தலில் முதல் முறையாகக் களமிறங்க உள்ளார். இதனால், சட்டமன்றத் தேர்தலுக்கான களம் தற்போதே சூடுபிடிக்கத் தொடங்கியுள்ளது.  மற்றொருபுறம் சட்டப்பேரவைத் தேர்தலுக்குத் தேர்தல் ஆணையம் முழு வீச்சில் தயாராகி வருகிறது. அதற்கான பணிகளும் தொடங்கியுள்ளன. 

இந்நிலையில் பா.ஜ.க. சார்பில் கூட்டணி பேச்சுவார்த்தைக்கான குழு அமைப்பது தொடர்பான ஆலோசனைக்காக, தமிழக பாஜக மாநில தலைவர் நைனார் நாகேந்திரன் இன்று (25.11.2025) அவசர அழைப்பாக டெல்லி செல்ல திட்டமிட்டுள்ளதாகத் தகவல்கள் வெளியாகியுள்ளன. அதாவது அதிமுக பாஜக மற்றும் தேசிய ஜனநாயக கூட்டணியில் இடம்பெற உள்ள கூட்டணிக் கட்சிகளுடன் தொகுதிப் பங்கீடு தொடர்பாகப் பேச்சுவார்த்தை நடத்துவதற்கான குழு அமைப்பதற்கு பாஜக தேசிய தலைமை முடிவு செய்திருப்பதாகக் கூறப்படுகிறது.

அதன் காரணமாக இது தொடர்பாக முதற்கட்ட ஆலோசனைக் கூட்டம் டெல்லியில் நடைபெற உள்ளதாகக் கூறப்படுகிறது. பாஜக தேசிய தலைவர் ஜேபி நட்டா, கட்சியின் அமைப்பு பொதுச் செயலாளர் பி.எல். சந்தோஷ் உள்ளிட்டோரை நயினார் நாகேந்திரன் நேரில் சந்திக்க உள்ளதாகவும் தகவல் வெளியாகியுள்ளது. அதன்படி கூட்டணி பேச்சுவார்த்தைக்கான குழு அமைப்பது தொடர்பான இன்று மாலைக்குள் அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது. இதனையடுத்து அதிமுகவுடன் தொகுதிப் பங்கீடு தொடர்பான  கூட்டணி பேச்சுவார்த்தை அதிகாரப்பூர்வமாகத் தொடங்கப்படும் எனவும் கூறப்படுகிறது.