“ஒவ்வொரு நகர்வையும் முதல்வர் நேரடியாகக் கவனித்து வருகிறார்” - அமைச்சர் பேட்டி!

வடகிழக்கு பருவமழை தொடங்கியுள்ள நிலையில், வங்கக் கடலில் ‘டிட்வா’ புயல் உருவாகியது. இந்த புயல், தென்மேற்கு வங்கக்கடல் மற்றும் அதனை ஒட்டி இருக்கக்கூடிய இலங்கை கடற்கரை வழியாக வடக்கு வடமேற்கு திசையை நோக்கி நகர்ந்து, நாளை (30.11.2025) அதிகாலையில், வட தமிழ்நாடு, புதுச்சேரி மற்றும் அதனை ஒட்டியுள்ள தெற்கு ஆந்திரப் பிரதேச கடற்கரையை நோக்கி நகரக்கூடும் என்று தெரிவிக்கப்பட்டது. இதன் காரணமாக, தமிழக கடலோர மாவட்டங்கள், காவிரிப்படுகை மாவட்டங்கள், வட கடலோர மாவட்டங்களுக்கு மிகக் கனமழைக்கான எச்சரிக்கை விடுக்கப்பட்டது.

அதிலும் குறிப்பாக, ஒரு சில இடங்களில் அதிக கனமழை பெய்ய வாய்ப்பு உள்ளதால் தமிழகத்திற்கு இரு நாட்களுக்கு ரெட் அலர்ட் எச்சரிக்கையும் விடுக்கப்பட்டது. இந்த புயல் வலுவடைய உள்ள நிலையில், தமிழகத்தில் உள்ள பல்வேறு இடங்களில் கனமழை மற்றும் மிகக் கனமழை பெய்து வருகிறது. இந்நிலையில் சென்னை சேப்பாக்கத்தில் அமைந்துள்ள எழிலகத்தில் உள்ள பேரிடர் கட்டுப்பாட்டு அறையில் அமைச்சர் கே.கே.எஸ்.எஸ்.ஆர் ராமச்சந்திரன் ஆய்வு செய்தார். அதன் பின்னர் அவர் செய்தியாளர்களைச் சந்தித்துப் பேசினார். அப்போது அவர் பேசுகையில், “இதுவரை மிகப்பெரிய பாதிப்போ, போக்குவரத்து பாதிப்போ, குறிப்பாக உயிரிழப்பு எதுவும் ஏற்படவில்லை. 16 கால்நடைகள் இறந்துள்ளனர். 24 குடிசைகள் இடிந்து விழுந்துள்ளன. உயிரிழப்பு எதுவும் இல்லை.

போக்குவரத்து எங்கேயும் தடைப்படவில்லை. அவ்வாறு தடைப்படாமல் இருக்கக்கூடிய முன்னெச்சரிக்கை வேலைகளை அரசாங்கம் செய்து கொண்டிருக்கிறது. பேரிடர் மீட்புக்குழுவில் உள்ள 5 குழுக்கள் விழுப்புரத்திற்கு, 5 குழுக்கள் சென்னைக்கும் அனுப்பப்பட்டுள்ளது. இன்னும் கூடுதலாக எங்குத் தேவை இருக்கிறதோ அந்த பகுதிக்கு அனுப்புவோம். கடற்படையிடமும் தகவல் சொல்லி வைத்துள்ளோம். அதே மாதிரி ஹெலிகாப்டர் தேவை இருந்தால் அதற்கும் முன்னெச்சரிக்கையாகச் சொல்லி வைத்திருக்கிறோம். கடற்கரை ஓரமாக யாரும் போக வேண்டாம். இன்றைக்கும் நாளைக்கும் என 2 நாளைக்கும் கடற்கரை ஓரமாக யாரும் போக வேண்டாம். மழை இருக்கிறதோ இல்லையோ காற்றினுடைய வேகம் இருக்கும் என்று வானிலை மையம் சொல்லி இருக்கிறார்கள். 

ஆகவே காற்று அதிகமாக இருக்கிற நேரத்தில் மழையும் சேர்ந்து கொண்டு சேர்ந்து கொண்டால் அது நமக்கு ஒரு பாதிப்பாகும். குறிப்பாக இந்த செல்பி எடுக்கிறவர்கள் கடற்கரை ஓரமாகப் போகாமல் இருப்பது நல்லது. அதாவது படகு சேதமடைந்து இருந்தால் கணக்கு எடுப்பார்கள். நெற்பயிர்கள் மற்றும் பல்வேறு விதமான விவசாய செடிகளோ, பயிர் சேதமோ இருக்கும் என்று சொன்னால் அதையும் கணக்கெடுக்கும் பணிகளை 30ஆம் தேதிக்கு (ஞாயிற்றுக்கிழமைக்கு) மேல் திங்கட்கிழமை இந்த பணிகளை அதிகாரிகளோடு சேர்ந்து செய்ய முடியும். 

அதற்கு வேண்டிய நஷ்ட ஈடுகளை உடனடியாக முதலமைச்சர் மு.க. ஸ்டாலின் வழங்கச் சொல்லியுள்ளார். முதலமைச்சர் மு.க. ஸ்டாலின் ஒவ்வொரு நகர்வையும் அவர் நேரடியாகக் கவனிக்கிறார். அதிகாரிகளும், அமைச்சர்களும் மட்டுமல்ல எங்களுடைய நகர்வுகளையும், அதிகாரிகளுடைய நகர்வுகளையும், மாவட்ட ஆட்சியர்களின் நகர்வுகளை எல்லாம் நேரடியாக முதலமைச்சர் கவனிக்கும் காரணத்தால் இந்த புயலை மிகச் சாமர்த்தியமாக இந்த அரசாங்கம் சமாளிக்கும்” எனத் தெரிவித்தார்.