“நாளை மக்கள் வெளியே வர வேண்டாம்” - அமைச்சர் வேண்டுகோள்

வங்கக் கடலில் ‘டிட்வா’ புயல் உருவாகியுள்ள நிலையில், தென்மேற்கு வங்கக்கடல் மற்றும் அதனை ஒட்டி இருக்கக்கூடிய இலங்கை கடற்கரை வழியாக வடக்கு வடமேற்கு திசையை நோக்கி நகர்ந்து, வரும் 30ஆம் தேதி அதிகாலையில் வட தமிழ்நாடு, புதுச்சேரி மற்றும் அதனை ஒட்டி இருக்கக்கூடிய தெற்கு ஆந்திர பிரதேச கடற்கரையை நோக்கி நகரக்கூடும் என்று தெரிவிக்கப்பட்டுள்ளது.

இதன் காரணமாக, கடலோர மாவட்டங்கள், காவிரிப்படுகை மாவட்டங்கள், வட கடலோர மாவட்டங்களுக்கு மிக கனமழைக்கான எச்சரிக்கை விடுக்கப்பட்டுள்ளது. குறிப்பாக ஒரு சில இடங்களில் அதிக கனமழை பெய்ய வாய்ப்பு உள்ளதால் தமிழகத்திற்கு இரு நாட்களுக்கு ரெட் அலர்ட் எச்சரிக்கையும் விடுக்கப்பட்டுள்ளது. டிட்வா புயல் வலுவடைய உள்ள நிலையில், தமிழகத்தில் உள்ள பல்வேறு இடங்களில் கனமழை, மற்றும் மிக கனமழை பெய்து வருகிறது.  

இந்த நிலையில், டிட்வா புயலால் சென்னைக்கு பெரிய பாதிப்பு இருக்காது என பேரிடர் மேலாண்மைத் துறை அமைச்சர் கே.கே.எஸ்.எஸ்.ஆர்.ராமச்சந்திரன் தெரிவித்துள்ளார். இது குறித்து அவர் கூறியதாவது, “டிட்வா புயலால் சென்னைக்கு பெரிய பாதிப்பு இருக்காது. மழை பெய்து கொண்டிருக்கிறது.  அது கொஞ்சம் கொஞ்சமாக  சென்னையினுடைய  கடற்கரை பகுதியை நோக்கி  இந்த புயல் நகர்ந்து வரும்.  வானிலை ஆய்வு மையம் தற்பொழுது நமக்கு  அறிவித்ததன்படி இந்த புயல் கரையை கடப்பதாக இல்லை. சென்னையை ஒட்டி  வந்துவிட்டு  ஆந்திரா மாநிலத்துக்கு செல்லும் சொல்லி  இருக்கிறார்கள்.  இருந்தாலும் இந்த புயல் சென்னைக்கு அருகில் வருகிற  நேரத்தில் சென்னையை சுற்றி இருக்கிற மாவட்டங்களுக்கு இன்று இரவில் இருந்து தொடர்ந்து மழை விட்டு விட்டு பெய்யும். நாளைக்கு கொஞ்சம் கனமழையாக கூட இருக்கலாம்.

ஆகவே பொதுமக்கள் முதலமைச்சர்  நாளைய தினம் அவசியம் இல்லாமல் வெளியே வர வேண்டாம் என்று வேண்டுகோள் விடுத்திருக்கிறார். அந்த வேண்டுகோளின் அடிப்படையில் நாளைக்கு  பொதுமக்கள் வெளியில் வருவதை கொஞ்சம் தவிர்ப்போம். இதனால் நமக்கு வருகிற  இடர்பாடுகளை நாம் கலைந்து கொள்ள முடியும்.  நம்முடைய முதலமைச்சரை பொறுத்த அளவிற்கு , இந்த டிட்வா புயல் வரும் என்று சொன்ன  உடனேயே  முன்னெச்சரிக்கை நடவடிக்கைகளை   தொடங்கி விட்டார். அதனால், இதுவரை எந்த உயிர் சேதமும் இல்லை. மொத்தம் தமிழ்நாட்டில்  இதுவரை 13 நிவாரண மையங்கள் நாம் உண்டாக்கி வைத்திருக்கிறோம். ராமநாராபுரத்தில் 3,  திருவாரூரில் 4,  நாகப்பட்டினத்தில் 5, விழுப்புரத்தில் 1 என மொத்தமாக 1058 நபர்கள் அங்கே தங்க வைக்கப்பட்டிருக்கிறார்கள்” என்று கூறினார்.