“இன்று 13 மாவட்டங்களுக்கு ஆரஞ்ச் அலர்ட்” - வானிலை ஆய்வு மையத் தலைவர் அமுதா!

வங்கக் கடலில் ‘டிட்வா’ புயல் உருவாகியுள்ள நிலையில், தென்மேற்கு வங்கக்கடல் மற்றும் அதனை ஒட்டி இருக்கக்கூடிய இலங்கை கடற்கரை வழியாக வடக்கு வடமேற்கு திசையை நோக்கி நகர்ந்து, வரும் 30ஆம் தேதி அதிகாலையில் வட தமிழ்நாடு, புதுச்சேரி மற்றும் அதனை ஒட்டி இருக்கக்கூடிய தெற்கு ஆந்திர பிரதேச கடற்கரையை நோக்கி நகரக்கூடும் என்று தெரிவிக்கப்பட்டுள்ளது.

இதன் காரணமாக, கடலோர மாவட்டங்கள், காவிரிப்படுகை மாவட்டங்கள், வட கடலோர மாவட்டங்களுக்கு மிக கனமழைக்கான எச்சரிக்கை விடுக்கப்பட்டுள்ளது. குறிப்பாக ஒரு சில இடங்களில் அதிக கனமழை பெய்ய வாய்ப்பு உள்ளதால் தமிழகத்திற்கு இரு நாட்களுக்கு ரெட் அலர்ட் எச்சரிக்கையும் விடுக்கப்பட்டுள்ளது. டிட்வா புயல் வலுவடைய உள்ள நிலையில், தமிழகத்தில் உள்ள பல்வேறு இடங்களில் கனமழை, மற்றும் மிக கனமழை பெய்து வருகிறது.  

இந்த நிலையில், வானிலை ஆய்வு மைய தென்மண்டல தலைவர் அமுதா இன்று (29-11-25) செய்தியாளர்களைச் சந்தித்துப் பேசினார். அப்போது அவர், “தென்மேற்கு வங்கக்கடல் பகுதிகளில் வட தமிழகம், புதுவை மற்றும் அதனை ஒட்டிய  தெற்கு ஆந்திர கடல் பகுதிகளுக்கு அருகே நிலவக்கூடும் டிட்வா புயல், வடக்கு வடமேற்கு திசையில்  நகரும் பொழுது வடதமிழகம் புதுவை கடலோர பகுதிகளில் இருந்து  இன்று நள்ளிரவில்  60 கிலோமீட்டர் தொலைவிலும், நாளை  30ஆம் தேதி 50 கிலோமீட்டர் தொலைவிலும் மாலை 25 கிலோமீட்டர்  தொலைவிலும் மையப்பகுதியில்  நிலவும் வாய்ப்பு உள்ளது.  

இந்த புயலின் காரணமாக இன்று (29-11-25) நாகப்பட்டினம், மயிலாடுதுறை,  கடலூர், விழுப்புரம், செங்கல்பட்டு,  காரைக்கால், புதுச்சேரி ஆகிய இடங்களுக்கு அதிகனமழை எச்சரிக்கை விடுவிக்கப்பட்டுள்ளது. சென்னை, திருவள்ளூர்,  காஞ்சிபுரம், ராணிப்பேட்டை, திருவண்ணாமலை, கள்ளக்குறிச்சி, சேலம், பெரம்பலூர்,  அரியலூர், திருச்சிராப்பள்ளி, தஞ்சாவூர்,  திருவாரூர் மற்றும் புதுக்கோட்டை ஆகிய 13 மாவட்டங்களுக்கு ஆரஞ்ச் அலர்ட்  விடுக்கப்பட்டுள்ளது. கடலோர மாவட்டங்களில் மழை தொடரும். தமிழகத்தின் அனேக இடங்களில் மிதமான மழை முதல் கனமழை வரை பெய்யும்.  

நாளை (30-11-25) திருவள்ளூர் மற்றும் ராணிப்பேட்டைக்கு  அதிகனமழையில் இருந்து மிக கனமழையும், ஓரிரு இடங்களில் அதிகன மழை பெய்யும் வாய்ப்பு இந்த இரண்டு மாவட்டங்களில்  இருக்கிறது. அதனால் இந்த இரண்டு மாவட்டங்களுக்கு ரெட் அலர்ட் கொடுக்கப்பட்டுள்ளது. அதே போல் நாளை சென்னை, காஞ்சிபுரம், செங்கல்பட்டு, வேலூர், கிருஷ்ணகிரி, திருப்பத்தூர், திருவண்ணாமலை, விழுப்புரம் மற்றும் தர்மபுரி ஆகிய 9 மாவட்டங்களுக்கு ஆரஞ்ச் அலர்ட் விடுக்கப்பட்டுள்ளது. 1ஆம் தேதி படிப்படியாக மழை குறைந்துவிடும். அதனால் திருவள்ளூர் மாவட்டத்திற்கு கனமழை எச்சரிக்கை விடுக்கப்பட்டுள்ளது. ஏனைய மாவட்டங்களில் லேசானது முதல் மிதமான மழை பெய்யும் வாய்ப்பு இருக்கிறது.  1ஆம் தேதி படிப்படியாக காற்றின் வேகம் குறைந்து  45 முதல் 55 கி.மீ வேகத்திலும் இடையிடையே  65 கிலோமீட்டர் வேகத்திலும் வீசக்கூடும்” என்று தெரிவித்துள்ளார்.