“காற்றழுத்த தாழ்வு மண்டலம் உருவானது” - வானிலை ஆய்வு மையம் தகவல்!

தமிழ்நாட்டில் வடகிழக்கு பருவமழை தொடங்கியுள்ள நிலையில், தமிழகத்தில் உள்ள பல்வேறு மாவட்டங்களில் தொடர்ந்து மழை பெய்து வருகிறது. அந்த வகையில் டெல்டா மாவட்டங்கள் உட்படத் தமிழ்நாட்டின் பல பகுதிகளில் கனமழை பெய்துள்ளது. அதே போன்று புதுச்சேரியிலும் தொடர்ந்து  கனமழை பெய்து வருகிறது. 

இந்நிலையில் சென்னை வானிலை ஆய்வு மையத்தின் சார்பில் இன்று (27.11.2025) அதிகாலை 03.00 மணியளவில் வெளியிடப்பட்டுள்ள வானிலை முன்னெச்சரிக்கை அறிவிப்பில், “தென்மேற்கு வங்கக்கடல் மற்றும் அதனையொட்டிய தென்கிழக்கு இலங்கை மற்றும் பூமத்திய ரேகை இந்தியப் பெருங்கடல் பகுதிகளில் நிலவிய வளிமண்டல மேலடுக்கு சுழற்சி வலுப்பெற்று காற்றழுத்த தாழ்வு மண்டலமாக மாறியது. இது நேற்று (26.11.2025) இரவு 11.30 மணிக்கு தென்மேற்கு வங்கக்கடல் மற்றும் இலங்கையின் அருகில் மையம் கொண்டிருந்தது. இது ஹம்பந்தோட்டாவிலிருந்து (இலங்கை) சுமார் 170 கி.மீ கிழக்கிலும், மட்டக்களப்பிலிருந்து (இலங்கை) சுமார் 210 கி.மீ தெற்கு - தென்கிழக்கிலும் நிலை கொண்டிருந்தது

அடுத்த 12 மணி நேரத்தில்: இது வடக்கு - வடமேற்கு திசையில் தென்மேற்கு வங்கக்கடல் மற்றும் இலங்கை பகுதிகளைக் கடந்து மேலும் வலுப்பெற்று ஆழ்ந்த காற்றழுத்த தாழ்வு மண்டலமாக மாற வாய்ப்புள்ளது. அதற்குப் பிறகு (அடுத்த 48 மணி நேரத்தில்): இது மேலும் வலுவடைந்து, தொடர்ந்து வடக்கு - வடமேற்கு திசையில் நகர்ந்து, தென்மேற்கு வங்கக்கடல் மற்றும் இலங்கை கடலோரப் பகுதிகளைக் கடந்து வடதமிழகம், புதுச்சேரி மற்றும் அதனையொட்டிய தெற்கு ஆந்திர கடலோரப் பகுதிகளை நோக்கிச் செல்ல வாய்ப்புள்ளது” எனத் தெரிவிக்கப்பட்டுள்ளது.