கஸ்தூர்பா; மகாத்மா காந்தியின் உறுதியான துணைக் குரல்!

இன்று பிப்ரவரி 28, தினசரி காலண்டரில் கஸ்தூர்பா காந்தியின் படத்துடன் நினைவு நாள் என்று குறிப்பிடப்பட்டுள்ளது. வரலாற்று பதிவுகள் அவர் 22 பிப்ரவரி 1944 அன்று மறைந்ததாகச் சொல்கின்றன. தேதி குறித்த இந்த வேறுபாடு இருந்தாலும், அவர் இந்த மாதத்தில்தான் உயிர்நீத்தார் என்பதில் மாற்றமில்லை. ஆகவே, பிப்ரவரி மாதத்தின் இறுதியில் அவரை நினைவுகூர்வது பொருத்தமற்றதல்ல, மாறாக, அவரின் அமைதியான வாழ்வையும் உறுதியான போராட்டத்தையும் மீண்டும் சிந்திக்கச் செய்யும் ஒரு தருணமாக இதை எடுத்துக்கொள்ளலாம்.

வரலாறு பெரும்பாலும் முன்னிலையில் நின்றவர்களை மட்டுமே புகழ்ந்து போற்றும்.  ஆனால் சிலர் பின்னணியில் நின்றபடியே ஒரு காலத்தைக் கட்டியெழுப்பி விடுகிறார்கள், கஸ்தூர்பா அப்படிப்பட்டவர். அவர் மகாத்மா காந்தியின் மனைவி என்ற அடையாளத்தில் மட்டும் சுருங்கிப் போகவில்லை. அவர் வாழ்ந்த விதமே அவரது உறுதியைச் சொல்கிறது. 1869-ல் குஜராத்தில் பிறந்த கஸ்தூர்பா, இளம் வயதிலேயே மோகன்தாஸ் காந்தியை திருமணம் செய்துகொண்டார். அந்த திருமணம் ஒரு குடும்ப வாழ்க்கையின் தொடக்கம் மட்டுமல்ல, ஒரு சமூகப் பயணத்தின் தொடக்கமாகவும் மாறியது. தென் ஆப்பிரிக்காவில் இந்தியர்களின் உரிமைக்கான போராட்டங்களில் காந்தி ஈடுபட்டபோது, கஸ்தூர்பா அமைதியாகப் பின்தொடரவில்லை. அவர் நேரடியாகக் கலந்து கொண்டார். எதிர்ப்பை எதிர்கொண்டார். சிறைத் தண்டனையையும் அனுபவித்தார். அப்போது பெண்கள் அரசியல் போராட்டத்தில் கலந்து கொள்வது சாதாரணம் அல்ல. ஆனால் அவர் அதை இயல்பாக மாற்றினார்.

கஸ்தூர்பாவை சிலர், ‘காந்தியின் மௌனத் துணை’என்று குறிப்பிடுவார்கள். ஆனால் அந்த மௌனம் பல நேரங்களில் உறுதியான எதிர்ப்பாக இருந்தது. காந்தியின் சில கருத்துகளுக்கு அவர் உடன்படாத சூழல்களும் இருந்தன. குடும்பத்தில் தொடங்கிய விவாதங்கள், பின்னர் ஒரு தேசிய இயக்கத்தின் சிந்தனையாக விரிந்தன. சத்தியாகிரக இயக்கங்களிலும், சமூக சீர்திருத்தப் பணிகளிலும் அவர் முன்னிலையில் நின்றார். பெண்களின் கல்வி, சுத்தம், சமூக ஒழுக்கம் போன்ற விஷயங்களில் நேரடியாக மக்களுடன் பணியாற்றினார். 1942-ல் தொடங்கிய ‘வெள்ளையனே வெறியேறு’ இயக்கத்தின் போது கஸ்தூர்பா கைது செய்யப்பட்டார். புனேயில் உள்ள ஆகா கான் அரண்மனையில் சிறையில் வைக்கப்பட்டார். உடல்நலம் பாதிக்கப்பட்ட நிலையிலும் உறுதியை இழக்கவில்லை. 1944 பிப்ரவரி 22 அன்று சிறையிலேயே உயிர் நீத்தார். அவரின் மரணம் ஒரு தனி மனிதரின் இறப்பு மட்டுமல்ல, ஒரு காலத்தின் அமைதியான சக்தி மங்கிய தருணம்.

கஸ்தூர்பா காந்தியின் வாழ்க்கை ஒரு முக்கியமான உண்மையை நினைவூட்டுகிறது. சுதந்திரப் போராட்டம் என்பது சில தலைவர்களின் முயற்சி மட்டும் அல்ல; அமைதியாக உறுதியுடன் நின்ற பலரின் கூட்டு சக்தி. அவர் மேடைகளில் பேசியவர் அல்ல. ஆனால் வரலாற்றின் உள்ளடக்கத்தில் ஆழமாகப் பதிந்தவர். அதிகாரம் இல்லாமல் செல்வாக்கு செலுத்தியவர். புகழை நாடாமல் பணியாற்றியவர். இன்று அவரை நினைவுகூரும் போது, நாம் கேட்க வேண்டிய கேள்வி ஒன்று இருக்கிறது. ஒரு இயக்கத்தின் வெற்றி முன்னணியில் நின்றவர்களின் பலமா, அல்லது அமைதியாக பின்னால் நின்றவர்களின் உறுதியா? கஸ்தூர்பா காந்தி அந்தக் கேள்விக்கான பதிலாகவே நிற்கிறார்.