கரூர் கூட்ட நெரிசல் வழக்கு : சி.பி.ஐ.யிடம் ஆதாரங்களைச் சமர்ப்பித்த தமிழக அரசு!

கரூர் மாவட்டம் வேலுச்சாமிபுரத்தில் கடந்த செப்டம்பர் 28ஆம் தேதி இரவு நடைபெற்ற தவெக தலைவர் விஜய்யின் பிரச்சார கூட்டத்தில் கூட்ட நெரிசல் ஏற்பட்டு பெண்கள், குழந்தைகள் உட்பட 41 பேர் உயிரிழந்தனர். இந்த சம்பவம் நாடு முழுவதும் பெரும் அதிர்ச்சியை ஏற்படுத்தியது. இந்த சம்பவம் தொடர்பாக சிபிஐ விசாரணை நடத்த உச்ச நீதிமன்றம் உத்தரவிட்டது. மேலும், மேலும் ஓய்வு பெற்ற நீதிபதி அஜய் ரஸ்தோகி தலைமையில் 3 பேர் கொண்ட ஆணையத்தை அமைத்து ஓய்வு பெற்ற நீதிபதி அஜய் ரஸ்தோகி மேற்பார்வையில் சி.பி.ஐ. விசாரணை நடத்த வேண்டும் என்றும் உத்தரவிட்டது.

அதன்படி, சிபிஐ வழக்குப்பதிவு செய்து விசாரணை நடத்தி வருகிறது. அந்த வகையில் வேலுச்சாமிபுரத்தில் ஆய்வு செய்து பல்வேறு தகவல்களைச் சேகரித்த சிபிஐ அதிகாரிகள், கூட்ட நெரிசலில் பாதிக்கப்பட்டோர், ஆம்புலன்ஸ் ஓட்டுநர், காவல் துறையினர் மற்றும் தவெக நிர்வாகிகள் உள்ளிட்ட 200க்கும் மேற்பட்டோரிடம் விசாரணை நடத்தினர். அதனைத் தொடர்ந்து, தவெக நிர்வாகிகளான ஆதவ் அர்ஜுனா, என். ஆனந்த், சி.டி.ஆர். நிர்மல்குமார், கரூர் ஆட்சியர், கரூர் எஸ்.பி ஆகியோர் டெல்லி சிபிஐ அலுவலகத்தில் நேற்று முன்தினம் (29.12. 2025) ஆஜராகி விளக்கமளித்தனர். அதனைத் தொடர்ந்து, 2வது நாளாக நேற்றும் (30.12.2025) அனைவரிடமும் சிபிஐ அதிகாரிகள் விசாரணை நடத்தினர். 

அதன் தொடர்ச்சியாக 3வது நாளாக இன்றும் (31.12.2025) விசாரணை நடைபெற்றது. இந்நிலையில் கரூர் கூட்ட நெரிசல் சம்பவம் தொடர்பாக டெல்லியில் நடைபெற்ற சிபிஐ விசாரணையில் வீடியோ ஆதாரங்களைத் தமிழ்நாடு அரசு தரப்பு சமர்ப்பித்துள்ளதாகத்  தகவல் வெளியாகியுள்ளது. அதில் த.வெ.க. தலைவர் விஜய் சம்பவ இடத்திற்கு வரும் முன்பே கூட்ட நெரிசல் தொடர்பாக எச்சரிக்கப்பட்டதாகவும், அந்த வீடியோ ஆதாரங்களைத் தமிழ்நாடு அரசு சமர்ப்பித்துள்ளதாகக் கூறப்படுகிறது. அதோடு பொதுக்கூட்டம் நடைபெற்ற இடத்தை விஜய்  நெருங்கும் முன்பாகவே கூட்ட நெரிசல்  தொடர்பாக வாக்கி டாக்கி மூலமாக எச்சரிக்கை விடுக்கப்பட்டது என்றும் சிபிஐ விசாரணையில் பதிவு செய்யப்பட்டுள்ளதாகவும் கூறப்படுகிறது.