“போலியான ஆவணத்தைக் கொடுத்து கட்சியை திருடிவிட்டனர்” - ஜி.கே.மணி பரபரப்பு குற்றச்சாட்டு

பாமகவில் கட்சியின் நிறுவனர் ராமதாஸூக்கும் அவருடைய மகன் அன்புமணிக்கும் இடையே மோதல் ஏற்பட்டிருக்கும் நிலையில் தற்போது வரை தீர்வு ஏற்படாத சூழல் நிறுவி வருகிறது. இதனிடையே, அன்புமணியை பாமக செயல் தலைவர் பதவி மற்றும் அடிப்படை உறுப்பினர் பொறுப்பில் இருந்து ராமதாஸ் நீக்கினார்.

அதனை தொடர்ந்து, அன்புமணி தரப்பு பா.ம.க தான் உண்மையான தரப்பு என அன்புமணி சார்பில் தேர்தல் ஆணையத்துக்கு சில மாதங்களுக்கு கடிதம் எழுதியிருந்தது. அதற்கு தேர்தல் ஆணையம், அன்புமணியின் சென்னை தி-நகரில் உள்ள அலுவலகத்திற்கு பதில் கடிதம் எழுதியது. இதன் மூலம், பா.ம.கவும், பா.ம.கவின் மாம்பழம் சின்னமும் அன்புமணிக்கு தான் என அன்புமணி தரப்பினர் கூறி வருகின்றனர்.

இந்த சூழ்நிலையில், தான் தலைவராக உள்ள பா.ம.வுக்கு மாம்பழம் சின்னத்தை ஒதுக்க வேண்டும் என ராமதாஸ் தேர்தல் ஆணையத்துக்கு சில தினங்களுக்கு முன்பு கடிதம் எழுதியிருந்தார். அதில், 1989இல் இருந்து தற்போது வரை நான் தான் கட்சியை நடத்தி வருவதாகவும், என்னுடைய கட்சி வேட்பாளர்களுக்கான ஏ மற்றும் பி பாஃர்மில் நானே கையெழுத்திடுவதால் நான் தலைவராக உள்ள பா.ம.கவுக்கு தான் மாம்பழம் சின்னத்தை ஒதுக்க வேண்டும் எனத் தெரிவித்திருந்தார்.

இந்த நிலையில், ராமதாஸின் மனுவை நிராகரித்து அன்புமணி தரப்பு பா.ம.க தான் உண்மையான பா.ம.க என்றும், அவர் தான் பா.ம.க தலைவர் என்றும் தேர்தல் ஆணையம் தெரிவித்துள்ளது. இதனை தொடர்ந்து, ராமதாஸ் தலைமையிலான கட்சியே உண்மையான பா.ம.க என்றும் தேர்தல் ஆணையம் மோசடி செய்துள்ளது என்றும் பா.ம.க கெளரவத் தலைவர் ஜி.கே.மணி தெரிவித்துள்ளார். டெல்லியில் செய்தியாளர்களைச் சந்தித்துப் பேசிய அவர், “தேர்தல் ஆணையத்தின் விதிமுறைப்படி தேர்தல் நடக்கும். அந்த அடிப்படையில், பொதுக்குழுவால் 28.05.2022 பா.ம.க சார்பில் அன்புமணி தலைவராக தேர்ந்தெடுக்கப்பட்டார். அந்த பதவியின் கால அவகாசம் 28.05.2025யுடன் முடிவு பெற்றது. அந்த முடிவுக்குப் பிறகு போலியான ஒரு ஆவணத்தை தயாரித்து தேர்தல் ஆணையத்திடம் கொடுத்து, 2023இல் பொதுக்குழு நடந்ததாகவும், 2026 ஆகஸ்ட் வரைக்கும் பதவி இருப்பதாகவும் ஒரு போலியான ஆவணத்தை அவர் கொடுத்திருக்கிறார்.

ஆனால், ஜனநாயகத்தை கட்டி காக்கிற தேர்தல் ஆணையம் ஒரு மோசடியான படுகொலையான ஒரு உத்தரவை இன்று வெளியிட்டுள்ளது. இது மிகப்பெரிய வேதனை அளிப்பதோடு கண்டனத்துக்குரியதாகவே நாங்கள் பார்க்கிறோம். இது ஒரு கட்சியை திருடுகிற மாதிரி தான். 2022ல் தான் அவர் தலைவராக தேர்ந்தெடுக்கப்பட்டார் என்பது உண்மை. எல்லா ஆதாரமும் இருக்கு. தேர்தல் கமிஷனுக்கு கொடுத்த கடிதம், அவர் கொடுத்த பேட்டி, பொதுக்குழு ஆதாரங்கள் எல்லாமே இருக்கிறது. ஆனால், அதையும் தாண்டி 2023ஆம் ஆண்டு பொதுக்குழு நடந்ததாகவும் அதில் அவர் தலைவராக தேர்ந்தெடுக்கப்பட்டதாகவும் ஒரு போலி ஆவணத்தை கொடுத்திருக்கிறது. அதை ஏற்றுக்கொண்டு தேர்தல் ஆணையம் மோசடி செய்திருக்கிறது. இதை கண்டு டெல்லியில் உள்ள தலைமைத் தேர்தல் ஆணையம் முன்பு போராட்டம் நடத்துவோம். தேர்தல் ஆணையம் அன்புமணிக்கு துணை போயிருக்கிறது, மோசடிக்கு துணை போயிருக்கிறது. தேர்தல் ஆணையத்தினுடைய நடவடிக்கை, இந்த ஆணை என்பது கண்டிக்கத்தக்கது. இது ஜனநாயக படுகொலையாக பார்க்கிறோம்” என்று தெரிவித்துள்ளார்.