Skip to main content

உயிரிழந்த தமிழக மீனவர்களின் உடல்களுக்கு இலங்கையில் பிரேதப் பரிசோதனை!

Published on 22/01/2021 | Edited on 22/01/2021

 

Tamil Nadu fishermen in Sri Lanka

 

கடந்த 18-ஆம் தேதி ஜெகதாபட்டினத்தில் இருந்து மீன்பிடிக்கச் சென்ற ராமநாதபுரம் பகுதி மீனவர்களில் 4 மீனவர்கள் இலங்கை கடற்படையினர் தாக்குதலில் உயிரிழந்ததாக தகவல் வெளியாகி அதிர்ச்சியை ஏற்படுத்தியிருந்தது. இதையடுத்து ராமேஸ்வரம் பகுதி மீனவர்கள், "இதுகுறித்து உடனடியாக நடவடிக்கை எடுக்க வேண்டும். இலங்கை கடற்படையின் மீது கொலை வழக்குப் பதிவு செய்ய வேண்டும்" என போராட்டத்தில் ஈடுபட்டனர்.

 

அதேபோல், உயிரிழந்தவர்களின் பிரேதப் பரிசோதனை இந்தியாவில் நடத்தப்பட வேண்டும். அப்பொழுதுதான் உண்மை தெரியவரும் என்றும் தொடர்ந்து கோரிக்கை வைத்து வருகின்றனர். இதனை வலியுறுத்தி வரும் 24ஆம் தேதி தமிழகத்தில் உள்ள அனைத்து மாவட்ட மீனவர்களும் ஒருங்கிணைந்து சாகும்வரை உண்ணாவிரதப் போராட்டம் நடத்த இருப்பதாக அறிவிக்கப்பட்டிருந்தது.

 

இந்த அறிவிப்புக்குப் பிறகு நேற்று, இலங்கை மீன்வளத்துறை அமைச்சர் டக்ளஸ் தேவானந்தா, தமிழக மீனவர்களின் உடல் இந்தியாவிற்குக் கொண்டு செல்லப்பட்டு அங்கு தான் பிரேதப் பரிசோதனை நடைபெறும் எனத் தெரிவித்திருந்தார். அதேபோல் இலங்கை அதிபர் கோத்தபய ராஜபக்சே ஒரு விசாரணைக் குழுவும், கடற்படை வாழ்வியல் குழு தலைமையில் விசாரணைக் குழு என இரண்டு விசாரணைக் குழு அமைக்கப்பட்டுள்ளதாகவும் இலங்கை அரசு தெரிவித்திருந்தது.

 

இந்நிலையில் தற்பொழுது  யாழ்ப்பாணம் அரசு மருத்துவமனையில் 4 தமிழக மீனவர்களின் உடல் பிரேதப் பரிசோதனை செய்யப்பட்டுள்ளது. இந்த நால்வரின் உடல்களும் இன்று இரவு 8 மணிக்கு காங்கேசன் கடற்படை முகாமில் ஒப்படைக்கப்படும். மேலும், நாளை உடல்கள் தமிழகம் கொண்டு வரப்படும் எனத் தகவல்கள் வெளியாகியுள்ளது.

 

 

சார்ந்த செய்திகள்

 

Next Story

மத்திய அமைச்சருக்குத் தமிழக முதல்வர் மு.க.ஸ்டாலின் கடிதம்!

Published on 11/07/2024 | Edited on 11/07/2024
TN CM MK Stalin letter To the Union Minister

புதுக்கோட்டை மாவட்ட மீன்பிடி துறைமுகத்திலிருந்து மீனவர்கள் மீன் பிடிக்கச் சென்றுள்ளனர். இவர்களில் 13 பேரை எல்லை தாண்டி மீன் பிடித்ததாகக் கூறி நெடுந்தீவு அருகே இலங்கை கடற்படையினர் இன்று (11.07.2024) சிறை பிடித்துச் சென்றனர். இந்த சம்பவம் மீண்டும் பரபரப்பயும் அதிர்ச்சியையும் ஏற்படுத்தி இருக்கிறது. இதனையடுத்து கைது செய்யப்பட்ட 13 மீனவர்களையும் யாழ்ப்பாணம் மீன்வளத்துறை அதிகாரிகள் ஊர்க்காவல்துறை நீதிமன்றத்தில் ஆஜர்ப்படுத்தினர். அப்போது மீனவர்கள் 13 பேருக்கும் ஜூலை 25ஆம் தேதி வரை நீதிமன்றக் காவல் விதித்து உத்தரவிடப்பட்டது.

இந்நிலையில் இலங்கைக் கடற்படையினரால் சிறைபிடிக்கப்பட்டுள்ள மீனவர்களையும், அவர்களது மீன்பிடிப் படகுகளையும் உடனடியாக விடுவித்திட வலியுறுத்தி மத்திய வெளியுறவுத் துறை அமைச்சர் ஜெய்சங்கருக்கு தமிழக முதலமைச்சர் மு.க. ஸ்டாலின் இன்று (11-7-2024) கடிதம் எழுதியுள்ளார். அந்த கடிதத்தில், “தமிழ்நாட்டைச் சேர்ந்த 13 மீனவர்கள், IND-TN-08-MM-364, IND-TN-16-MM-2043 மற்றும் IND-TN-08-MM-1478 ஆகிய பதிவெண்கள் கொண்ட மீன்பிடிப் படகுகளில் மீன்பிடிக்கச் சென்றிருந்தனர். அப்போது இலங்கைக் கடற்படையினரால் இன்று (11-7-2024) கைது செய்யப்பட்டுள்ளனர். மீன்பிடித் தொழிலையே தங்களது வாழ்வாதாரமாகக் கொண்டுள்ள நம் நாட்டு மீனவர்கள். வரலாறு காணாத நெருக்கடியை எதிர்கொள்கின்றனர். தற்போது 173 மீன்பிடிப் படகுகளும், 80 மீனவர்களும் இலங்கை அதிகாரிகளின் கட்டுப்பாட்டில் உள்ளது.

மீனவர்கள் இதுபோன்று சிறை பிடிக்கப்படுவது மீனவர்களின் வாழ்வாதாரத்தைக் கடுமையாக பாதித்துள்ளதோடு, அவர்களது குடும்பத்தினரை பெரும் சோகத்திற்கு உள்ளாக்கியுள்ளது. எனவே, இந்த விவகாரத்தில் மத்திய வெளியுறவுத் துறை வலுவான மற்றும் ஒருங்கிணைந்த முயற்சிகளை உடனடியாக மேற்கொண்டு, இலங்கை வசமுள்ள அனைத்து மீனவர்களையும், மீன்பிடிப் படகுகளையும் உடனடியாக விடுவிப்பதை உறுதி செய்திட வேண்டும். இதுதொடர்பாக உரிய தூதரக நடவடிக்கைகளை முடுக்கி விட வேண்டும்” எனத் தெரிவித்துள்ளார். 

Next Story

13 மீனவர்கள் கைது; இலங்கை கடற்படை மீண்டும் அட்டூழியம்

Published on 11/07/2024 | Edited on 11/07/2024
 13 fishermen arrested; Sri Lankan Navy again atrocity

தொடர்ச்சியாக தமிழக மீனவர்கள் சிறைபிடிக்கப்பட்டு வரும் நிலையில், நெடுந்தீவு அருகே மீன்பிடித்துக் கொண்டிருந்த 13 தமிழக மீனவர்கள் மீண்டும் இலங்கை கடற்படையால் சிறைபிடிக்கப்பட்டுள்ளது பரபரப்பை ஏற்படுத்தியுள்ளது.

புதுக்கோட்டை மாவட்ட மீன்பிடி துறைமுகத்திலிருந்து மீன் பிடிக்கச் சென்ற தமிழக மீனவர்கள் 13 பேரை எல்லை தாண்டி மீன் பிடித்ததாகக் கூறி நெடுந்தீவு அருகே இலங்கை கடற்படை சிறை பிடித்துச் சென்ற சம்பவம் மீண்டும் பரபரப்பை ஏற்படுத்தி இருக்கிறது. அண்மையில் ராமேஸ்வரம் மீனவர்கள் இலங்கை கடற்படையால் கைது செய்யப்பட்டுள்ள நிலையில் அவர்களை விடுவிக்க வேண்டும் எனவும் மீனவர் பிரச்சினையில் தீர்வு காண வேண்டும் என தமிழக அரசு சார்பில் மத்திய அரசுக்கு பலமுறை தமிழக முதல்வர் கடிதம் எழுதி இருந்த நிலையில், தொடர்ச்சி சம்பவமாக இன்றும் தமிழக மீனவர்கள் இலங்கை கடற்படையால் கைது செய்யப்பட்டுள்ளது குறிப்பிடத்தகுந்தது.