Skip to main content

உத்தரகாண்ட் முதலமைச்சராக புஷ்கர் சிங் தாமி பதவியேற்றார்!

Published on 04/07/2021 | Edited on 04/07/2021

 

 

Pushkar Singh Dhami sworn-in as the next Chief Minister of Uttarakhand

உத்தரகாண்ட் மாநில முதலமைச்சராக இருந்த தீரத்சிங் ராவத் பதவியேற்று ஆறு மாதத்தில் சட்டமன்ற உறுப்பினராக தேர்வாக முடியாத சூழல் ஏற்பட்டதால், அவர் தனது பதவியை ராஜினாமா செய்தார். இதையடுத்து, டேராடூனில் நேற்று (03/07/2021) நடந்த பா.ஜ.க. சட்டமன்ற உறுப்பினர்கள் கூட்டத்தில் பா.ஜ.க. சட்டமன்றக் கட்சித் தலைவராகவும், புதிய முதலமைச்சராகவும் புஷ்கர் சிங் தாமி ஒருமனதாக தேர்வு செய்யப்பட்டார். 

 

அதைத் தொடர்ந்து, உத்தரகாண்ட் மாநில ஆளுநரைச் சந்தித்த புஷ்கர் சிங் தாமி சட்டமன்ற உறுப்பினர்களின் ஆதரவு கடிதத்தை அளித்து ஆட்சி அமைக்க உரிமை கோரினார். பின்னர், சட்டமன்ற உறுப்பினர்களின் கடிதத்தைப் பரிசீலித்த ஆளுநர், பதவியேற்க வருமாறு புஷ்கர் சிங் தாமிக்கு அழைப்பு விடுத்தார். 

 

இந்த நிலையில், உத்தரகாண்ட் மாநிலத்தின் தலைநகர் டேராடூனில் உள்ள ஆளுநர் மாளிகையில் இன்று (04/07/2021) நடைபெற்ற பதவியேற்பு விழாவில், முதலமைச்சராக புஷ்கர் சிங் தாமி பதவியேற்றுக் கொண்டார். அவருக்கு உத்தரகாண்ட் மாநில ஆளுநர் பேபி ராணி மௌரியா பதவிப் பிரமாணமும், ரகசியக் காப்பு பிரமாணமும் செய்து வைத்தார். முதலமைச்சரைத் தொடர்ந்து, புதிய அமைச்சரவையும் பதவியேற்றுக் கொண்டது.

 

இந்த விழாவில் பா.ஜ.க. கட்சியின் மூத்த தலைவர்கள், சட்டமன்ற உறுப்பினர்கள், நாடாளுமன்ற உறுப்பினர்கள் உள்ளிட்டோர் கலந்துக் கொண்டனர்.

 

 

சார்ந்த செய்திகள்

 

Next Story

அருணாச்சல பிரதேச முதல்வராக பெமா காண்டு பதவியேற்பு!

Published on 13/06/2024 | Edited on 13/06/2024
Pema Khandu sworn in as Chief Minister of Arunachal Pradesh

நாடாளுமன்ற மக்களவைத் தேர்தலோடு ஒடிசா, ஆந்திரப் பிரதேசம், சிக்கிம், அருணாச்சலப் பிரதேசம் போன்ற மாநிலங்களில் சட்டமன்றத் தேர்தலும் நடைபெற்றது. இதில் 60 சட்டமன்றத் தொகுதிகளைக் கொண்ட அருணாச்சலப் பிரதேசத்தில் பாஜக ஆளும் கட்சியாக இருந்து வந்தது. தேர்தல் களத்தில் பாஜக, காங்கிரஸ், தேசிய மக்கள் கட்சி, தேசியவாத காங்கிரஸ் உள்ளிட்ட முக்கிய கட்சிகள் களத்தில் இருந்தன. 60 சட்டமன்றத் தொகுதிகளில் பெரும்பான்மைக்கு 31 தொகுதிகளில் வெற்றி பெற வேண்டும்.

இத்தகைய சூழலில் தான் முதல்வர் பெமா காண்டு உட்பட 10 பாஜக வேட்பாளர்கள் போட்டியின்றி தேர்வு செய்யப்பட்டனர். இதனால் மீதமுள்ள 50 தொகுதிகளில் வாக்குப்பதிவு நடைபெற்றது. இதனையடுத்து அருணாச்சலப் பிரதேசத்தில் ஏற்கனவே வெற்றிபெற்ற 10 தொகுதிகளையும் சேர்த்து 46 தொகுதிகளில் பாஜக வெற்றி பெற்றது. தேசிய மக்கள் கட்சி 5 தொகுதிகளிலும், தேசியவாத காங்கிரஸ் (என்.சி.பி.) 3 தொகுதிகளிலும், அருணாச்சல மக்கள் கட்சி 2 தொகுதிகளிலும், காங்கிரஸ் 1 தொகுதிகளிலும், சுயேட்சைகள் 3 இடங்களிலும் வெற்றி பெற்றனர்.

இந்நிலையில் அருணாச்சல பிரதேசத்தின் முதலமைச்சராக பாஜகவைச் சேர்ந்த பெமா காண்டு 3 வது முறையாக இன்று (13.06.2024) பதவியேற்றார். அதன்படி பெமா காண்டுவுக்கு அம்மாநில ஆளுநர் பர்நாயக் பதவிப் பிரமாணம் செய்து வைத்தார். பெமா காண்டுவுடன் 11 பேர் அமைச்சர்களாக பதவியேற்றுக் கொண்டனர். இதில் அருணாச்சல பிரதேசத்தின் துணை முதல்வராக சௌனா மெய்ன் பதவியேற்றுக்கொண்டதும் குறிப்பிடத்தக்கது. 
 

Next Story

ஒடிசா முதல்வராக மோகன் சரண் மாஜி பதவியேற்பு!

Published on 12/06/2024 | Edited on 12/06/2024
Mohan Charan Majhi Chief Minister of Odisha sworn in

மக்களவைத் தேர்தலோடு ஒடிசா, ஆந்திரப் பிரதேசம், சிக்கிம், அருணாச்சலப் பிரதேசம் போன்ற மாநிலங்களில் சட்டமன்றத் தேர்தலும் நடைபெற்றது. இதில் ஒடிசா மாநிலத்தில் ஆட்சியிலிருந்த பிஜூ ஜனதா தளம் கட்சியை வீழ்த்தி முதல் முறையாக பா.ஜ.க ஆட்சியைப் பிடித்தது. காங்கிரஸ் கோட்டையாக இருந்த ஒடிசா மாநிலத்தில் 1990 ஆம் ஆண்டு வரை காங்கிரஸ் ஆட்சியே நடைபெற்றது. காங்கிரஸ் கட்சியில் முக்கிய பொறுப்பிலிருந்த பிஜு பட்நாயக், அம்மாநிலத்தில் முதல்வராக பணியாற்றி வந்தார்.

இதனையடுத்து பிஜு பட்நாயக், ஜனதா தளம் கட்சியில் இணைந்து, 1995 ஆம் ஆண்டில் முதல்வராக பொறுப்பு வகித்து வந்தார். பிஜு பட்நாயக் மறைவுக்குப் பிறகு, அவருடைய மகன் நவீன் பட்நாயக், பிஜு ஜனதா தளம் என்ற கட்சியை தொடங்கினார். அதன் பின்பு கடந்த 2000 ஆம் ஆண்டில் நடைபெற்ற சட்டசபை தேர்தலில் நவீன் பட்நாயக் அமோக வெற்றி பெற்று அம்மாநில முதல்வரானார். இத்தகைய சூழலில் தான் 147 சட்டமன்றத் தொகுதிகள் கொண்ட ஒடிசாவில் பிஜு ஜனதா தளம் 51 இடங்களை மட்டுமே கைப்பற்றி தோல்வியடைந்தது. பா.ஜ.க 78 இடங்களிலும், காங்கிரஸ் 14 இடங்களிலும், மார்க்சிஸ்ட் கம்யூனிஸ்ட் 1 இடங்களிலும், சுயேட்சை 1 இடங்களிலும் வென்றது. 

Mohan Charan Majhi Chief Minister of Odisha sworn in

இதனையடுத்து பாஜக சார்பாக ஒடிசாவின் சட்டப்பேரவைக் கட்சித் தலைவரை தேர்ந்தெடுப்பதற்கான கூட்டம் புவனேஸ்வரில் நேற்று (11.06.2024) நடைபெற்றது. இந்தக் கூட்டத்தில் மத்திய அமைச்சர்களும், பாஜக மேலிட பார்வையாளர்களுமான ராஜ்நாத் சிங் மற்றும் பூபேந்தர் யாதவ் ஆகியோர் கலந்து கொண்டனர். இந்தக் கூட்டத்தின் முடிவில் ஒடிசாவில் பாஜக சட்டமன்றக் கட்சியின் தலைவராக மோகன் சரண் மாஜி தேர்ந்தெடுக்கப்பட்டார். பழங்குடியினர் இனத்தைச் சேர்ந்த மோகன் மாஜி கியோஞ்சர் சட்டமன்றத் தொகுதியில் இருந்து வெற்றி பெற்றவர் ஆவார்.

இந்நிலையில் ஒடிசா மாநில முதலமைச்சராக மோகன் சரண் மாஜி இன்று (12.06.2024) பதவியேற்றார். இவ்விழாவில் பிரதமர் நரேந்திர மோடி, ஒடிசா முன்னாள் முதலமைச்சர் நவீன் பட்நாயக் உள்ளிட்டோர் பங்கேற்றனர். முதன்முறையாக ஒடிசாவில் பாஜக தலைமையிலான அரசு பதவியேற்றுள்ளது குறிப்பிடத்தக்கது. மோகன் சரண் மாஜிக்கு ஒடிசா ஆளுநர் ரகுபர் தாஸ் பதவிப்பிரமாணம் செய்துவைத்தார். அதனைத் தொடர்ந்து பிரவதி பரிதா, கனக் வர்தன் சிங் தியோ ஆகியோர் ஒடிசா மாநில துணை முதலமைச்சர்களாக பதவியேற்றனர். 

Mohan Charan Majhi Chief Minister of Odisha sworn in

மேலும் முதல்வர் மோகன் சரண் மஜி தலைமையிலான அமைச்சரவையில் சுரேஷ் பூஜாரி, ரபிநாராயண் நாயக், நித்யானந்தா கோண்ட், க்ருஷ்ண சந்திர பத்ரா, கோகுல நந்தா மல்லிக், சம்பத் குமார் ஸ்வீன், கணேஷ் ராம் சிங் குந்தியா, சூர்யபன்ஷி சூரஜ் மற்றும் பிரதீப் பாலசமந்தா ஆகியோர் அமைச்சர்களாக பதவியேற்றனர். முதல்வர் மோகன் சரண் மஜியின் பதவியேற்பு விழா முடிந்ததும், ஒடிசா மாநில முன்னாள் முதல்வரும், பிஜேடி தலைவருமான நவீன் பட்நாயக்குடன் பிரதமர் மோடி சிறிது நேரம் உரையாடினார்.