Skip to main content

“எங்களுக்கு எதிராக நான்கு வேட்பாளர்களை பா.ஜ.க நிறுத்தியுள்ளது” - மல்லிகார்ஜுன கார்கே

Published on 23/09/2023 | Edited on 23/09/2023

 

Mallikarjuna Kharge says BJP has fielded four candidates against us

 

ராஜஸ்தான் உட்பட ஐந்து மாநிலத்திற்கு இந்த வருட இறுதியில் சட்டமன்றத் தேர்தல் நடைபெறவிருக்கிறது. இதற்காக அனைத்து கட்சிகளும் தீவிரமாகக் களப்பணி செய்து வருகின்றன. இந்நிலையில் ராஜஸ்தான் மாநிலம், ஜெய்ப்பூரில் இன்று காங்கிரஸ் கட்சியின் பொதுக்கூட்டம் நடைபெற்றது. இதில் அக்கட்சியின் முன்னாள் தலைவரும், எம்.பி.யுமான ராகுல் காந்தி, காங்கிரஸ் தலைவர் மல்லிகார்ஜுன கார்கே ஆகியோர் கலந்துகொண்டு பேசினர். 

 

இந்தப் பொதுக்கூட்டத்தில் பேசிய மல்லிகார்ஜுன கார்கே, “நாங்கள் பா.ஜ.க.வுடன் மட்டும் போராடவில்லை. இந்த தேர்தலில் எங்களுக்கு எதிராக பா.ஜ.க.வினர் நான்கு வேட்பாளர்களை முன்னிறுத்தியுள்ளனர். ஒன்று அவர்கள், அடுத்து அமலாக்கத்துறை, மற்றொன்று சி.பி.ஐ, அடுத்தது வருமான வரித்துறையினர். நாங்கள் இவர்களுக்கு எதிராக நின்று வெற்றி பெற வேண்டும். பா.ஜ.க.வினருக்கு தோன்றும் போதெல்லாம் அமலாக்கத்துறையினரையோ அல்லது சி.பி.ஐ.யோ வெளியே விடுகிறார்கள். குறிப்பாக, எங்களுடைய கூட்டம் நடக்கும் போதோ அல்லது கட்சிகளை சார்ந்த நிகழ்ச்சி நடக்கும்போதோ எங்கள் மீது சோதனை நடத்துகிறார்கள். 

 

காங்கிரஸ் கட்சியில் அனைத்து சமூகத்தினரும் இருக்கிறார்கள். ஆனால் பா.ஜ.க யாரையும் அருகில் வரவிடுவதில்லை. புதிய நாடாளுமன்ற திறப்பு விழாவிற்கு ஜனாதிபதி திரெளபதி முர்முவை கூட அழைக்கவில்லை. சினிமா துறையை சார்ந்தவர்கள் அழைத்தார்கள். ஆனால், குடியரசுத் தலைவரை ஏன் அழைக்கவில்லை? அவர் இந்த நாட்டினுடைய ஜனாதிபதி. நீங்கள் ஜனாதிபதியை அவமதித்து விட்டீர்கள். புதிய நாடாளுமன்ற கட்டடத்திற்கு அஸ்திவாரம் போட்டபோது கூட அப்போதைய குடியரசுத் தலைவர் ராம்நாத் கோவிந்த் அழைக்கப்படவில்லை. ஏனென்றால், அவர் உங்கள் பார்வையில் தீண்டத்தகாதவர். ஒரு தீண்டத்தகாதவர் அடித்தளம் அமைத்திருந்தால், அவர்கள் அதை கங்கை நீரின் மூலம் கழுவ வேண்டியிருக்கும்” என்று பேசினார். 

 

 

சார்ந்த செய்திகள்

Next Story

வெளியேறிய விஜயதாரணி; வீடியோ வெளியிட்ட தமிழ்நாடு காங்கிரஸ்

Published on 24/02/2024 | Edited on 24/02/2024
The video was released by the Tamil Nadu Congress for Vijayadharani who left from party

கடந்த மூன்று முறையாகத் தொடர்ந்து விளவங்கோடு தொகுதியில் போட்டியிட்டு எம்.எல்.ஏ.வான காங்கிரஸைச் சேர்ந்த விஜயதாரணி, நாடாளுமன்றத் தேர்தல் நெருங்கும் வேளையில் பா.ஜ.க.வில் இணையப் போவதாக தகவல்கள் வெளியாகியிருந்தன. இது, காங்கிரஸ் ஆதரவாளர்களிடையே அதிர்ச்சியை ஏற்படுத்தியிருந்தது.

விஜயதாரணி 2021ல் சட்டமன்றத் தேர்தலில் வெற்றி பெற்றபோது, சட்டமன்ற காங்கிரஸ் குழுத் தலைவர் பதவி கிடைக்கும் என எதிர்பார்த்தாகவும் அது கிடைக்காமல் போக பிறகு தமிழ்நாடு காங்கிரஸ் கமிட்டி தலைவர் பதவி கிடைக்கும் என நினைத்ததாகவும், ஆனால் சமீபத்தில் சட்டமன்ற காங்கிரஸ் குழுத் தலைவர் பதவி செல்வப்பெருந்தகைக்கு வழங்கப்பட்டது. இதனையடுத்து வரும் நாடாளுமன்றத் தேர்தலில் கன்னியாகுமரி தொகுதியில் போட்டியிட வாய்ப்பு கேட்டும் கிடைக்காததால் விஜயதாரணி அதிருப்தியில் இருப்பதாகத் தகவல்கள் வெளியாகி இருந்தன.

முன்னதாகவே அவர் டெல்லியில் முகாமிட்டிருப்பதாகத் தகவல்கள் வெளியாகி இருந்த நிலையில், தற்போது இன்று (24-02-24) பிற்பகல் 2 மணிக்கு டெல்லியில் பாஜகவில் இணைய உள்ளதாகத் தகவல்கள் வெளியாகி இருந்தது. இந்நிலையில் சுதாகர் ரெட்டி, மத்திய அமைச்சர் ராஜீவ் சந்திரசேகர், மத்திய இணை அமைச்சர் எல். முருகன் ஆகியோர் முன்னிலையில் தற்போது விஜயதாரணி பாஜகவில் இணைந்துள்ளார்.

இது தொடர்பாக, தமிழ்நாடு காங்கிரஸ் கமிட்டி தனது அதிகாரப்பூர்வ எக்ஸ் (பக்கத்தில்) காங்கிரஸ் கட்சியின் மூத்த தலைவர் ராகுல் காந்தி, முன்பு பேசிய ஒரு பழைய வீடியோவை பகிர்ந்து விமர்சனம் செய்துள்ளது. அதில் ராகுல் காந்தி, ‘எதற்கும் பயப்படாத அச்சமற்ற உண்மையான போராளிகளை மட்டுமே காங்கிரஸ் விரும்புகிறது. பயப்படுபவர்கள் கட்சியை விட்டு வெளியேறுங்கள், உங்களுக்கு RSS தான் சரியான இடம்’ என்று கூறியுள்ளார். 

Next Story

“ராகுல்காந்தியை சந்திக்க 10 கிலோ எடையை குறைக்க வேண்டும் என்றார்கள்” - காங்கிரஸ் எம்.எல்.ஏ பரபரப்பு புகார்

Published on 23/02/2024 | Edited on 23/02/2024
Congress MLA sensational complaint They told me to lose 10 kg to meet Rahul Gandhi

மகாராஷ்டிராவைச் சேர்ந்த பாபா சித்திக் எம்.எல்.ஏவாக பொறுப்பு வகித்து வருகிறார். காங்கிரஸ் கட்சியின் சிறுபான்மை தலைவராக பொறுப்பு வகித்து வந்த இவர் சமீபத்தில் அஜித் பவார் தலைமையிலான தேசியவாத காங்கிரஸ் கட்சியில் இணைந்தார். பாபா சித்திக்கின் மகன் ஜீஷன் சித்திக், காங்கிரஸ் சார்பாக எம்.எல்.ஏவாக பதவி வகித்து வருகிறார். அதுமட்டுமல்லாமல், இவர் தேர்தல் மூலம் தேர்ந்தெடுக்கப்பட்டு மும்பை காங்கிரஸ் இளைஞரணித் தலைவராகவும் பதவி வகித்து வந்தார்.

இந்த நிலையில், அவரை, கட்சித் தலைமை, மும்பை காங்கிரஸ் இளைஞரணித் தலைவர் பொறுப்பில் இருந்து நீக்கி உத்தரவிட்டுள்ளது. இதையடுத்து, ஜீஷன் சித்தன் செய்தியாளர்களைச் சந்தித்து பேசினார்.

அப்போது அவர், “ராகுல் காந்தி ஒரு நல்ல தலைவர். அவர் வேலையை சரியாக செய்கிறார். மல்லிகார்ஜுன கார்கே எனக்கு தந்தை போன்றவர். கார்கே கட்சியின் மூத்த தலைவர். ஆனால், சில நேரங்களில் மல்லிகார்ஜுன கார்கேவின் கைகள் கட்டப்பட்டு இருக்கின்றன. ராகுல் காந்தியை சுற்றியுள்ள நபர்கள் கட்சியை அழிக்கின்றனர். ராகுல் காந்தியை சந்திக்க பல்வேறு இடையூறுகளைச் சந்தித்தேன். 

ராகுல் காந்தியின், இந்திய ஒற்றுமை யாத்திரை மகாராஷ்டிரா மாநிலம் வந்த போது அவரை சந்திக்க விரும்பினேன். ஆனால், ராகுல் காந்திக்கு மிகவும் நெருக்கமானவர்கள், நான் 10 கிலோ எடையைக் குறைத்தால்தான் ராகுல் காந்தியைச் சந்திக்க முடியும் என்று கூறிவிட்டார்கள். ராகுல் காந்தி தனது வேலையை நன்றாக செய்கிறார். ஆனாலும் அவரது அணி மிகவும் முரட்டுத்தனமாக இருப்பதை அவரால் புரிந்துகொள்ள முடியவில்லை. கடந்த வாரம் வரை காங்கிரஸுடனேயே இருப்பேன் என்று கூறினேன். ஆனால், காங்கிரஸ் நடந்துகொள்ளும் விதமும், நடந்துகொண்டிருக்கும் விதமும் தெளிவாகத் தெரிகிறது. 

சிறுபான்மையினருடன் இருப்பதாக காங்கிரஸ் கூறுகிறது. ஆனால் மும்பை காங்கிரஸின் தலைவராக, இதுவரை எந்த இஸ்லாமிய தலைவரும் இருந்ததில்லை. முஸ்லிம்களை பாதுகாப்பதாக காங்கிரஸ் கூறுகிறது. ஆனால், காங்கிரஸிலும், இளைஞர் காங்கிரஸிலும் தலைதூக்கும் வகுப்புவாதம் வேறு எங்கும் காணப்படவில்லை. காங்கிரஸுக்கு சிறுபான்மையினர் தேவையில்லை,  நாங்கள் தேவையில்லை என்று தெரிகிறது.  நான் இப்போது எனது விருப்பங்களைச் சரிபார்க்க வேண்டும். இது மிகவும் துரதிர்ஷ்டவசமானது