Skip to main content

“பிரதமர் எந்த அடிப்படையில் அப்படிச் சொன்னார் என்று புரியவில்லை” - கார்கே

Published on 24/05/2024 | Edited on 24/05/2024
Kharge said I don't understand on what basis the Prime Minister said that

மக்களவைத் தேர்தல் ஒவ்வொரு கட்டங்களாக வாக்குப்பதிவு நடைபெற்று வருகிறது. அதன்படி, ஐந்து கட்டங்களாக 430 தொகுதிகளில் நடைபெற்று முடிந்துள்ளது. அதனைத் தொடர்ந்து, நாளை (25-05-24) ஆறாம் கட்டமாக 57 தொகுதிகளில் நடைபெறவுள்ளது. மேலும், ஜூன் 1ஆம் தேதி நடைபெறும் கடைசி கட்ட வாக்குப்பதிவை எதிர்கொண்டு அரசியல் கட்சியினர் தீவிர பிரச்சாரம் மேற்கொண்டு வருகின்றனர். 

இந்த நிலையில், கர்நாடகா மாநிலத்தில் காங்கிரஸ் கட்சித் தலைவர் மல்லிகார்ஜுன கார்கே இன்று (24-05-24) செய்தியாளர்களைச் சந்தித்து பேசினார். அப்போது அவர், “இந்த மக்களவைத் தேர்தல் மக்களுக்கும், பிரதமர் மோடிக்கும் இடையிலான தேர்தல். ஏனென்றால், விலைவாசி உயர்வு, அதிக வேலையின்மை காரணமாக மக்கள் இன்று விரக்தியில் இருக்கிறார்கள். மேலும், ஜனநாயகம் மற்றும் இந்திய அரசியல் சாசனத்தின் மீது மிகப்பெரிய தாக்குதல் நடக்கிறது. 

பா.ஜ.க தன்னாட்சி அமைப்புகளை தவறாகப் பயன்படுத்தி நிர்வாகத்தை நடத்துகிறது. இதன் காரணமாக, மக்கள் அவர்கள் மீது கோபமடைந்து இந்தியா கூட்டணியை ஆதரிக்கின்றனர். அதனால் கூட்டணிக்கு நல்ல வாய்ப்பு கிடைத்துள்ளது. இந்தியா கூட்டணி, பெரும்பான்மையைப் பெறுவதற்கான எல்லா வாய்ப்புகளும் உள்ளன. பா.ஜ.கவை ஆட்சிக்கு வரவிடாமல் தடுக்கும் திறன் இந்தியா கூட்டணிக்கு உள்ளது. அனைத்து தொகுதிகளிலும், தோற்கும் பா.ஜ.க, 400 இடங்களுக்கு மேல் பெறுவது பிரதமர் நரேந்திர மோடிக்கு எப்படி தெரியும்? உதாரணமாக, கடந்த 2019 தேர்தலில், கர்நாடகாவில் எங்களுக்கு ஒரு இடம் கிடைத்தது. இந்தத் தேர்தலில், காங்கிரஸ் நான்கு இடங்களில் வெற்றி பெறும் என்று பிரகலாத் ஜோஷி கூறினார். இது அதிகமா? அல்லது குறைவா?

சமீபத்தில் காங்கிரஸ் ஆட்சிக்கு வந்த தெலுங்கானாவில், 2019இல் இரண்டு இடங்கள் கிடைத்தன. அங்கு காங்கிரஸின் தொகுதி எண்ணிக்கை அதிகரிக்கும். எங்கள் கூட்டணிக் கட்சியான தி.மு.கவின் வெற்றி வாய்ப்பு அதிகமாக உள்ளது. கேரளாவில் அதிக இடங்களைப் பெறுவோம். மகாராஷ்டிராவில் எங்கள் ‘அகாதி’ கூட்டணி 50 சதவீதத்துக்கு மேல் வெற்றிப்பெறும். எல்லா இடங்களிலும் பாஜகவின் இடங்கள் குறைந்து வரும்போது அவர்கள் எப்படி அதிகமாகப் பெறுவார்கள் என்பதை என்னால் கண்டுபிடிக்க முடியவில்லை. 

ராஜஸ்தானில் நாங்கள் பூஜ்ஜியமாக இருந்தோம். இந்த முறை ஏழு முதல் எட்டு இடங்களைப் பெறப் போகிறோம். பாராளுமன்றத்தில் நாங்கள் இரண்டு இடங்களை வெற்றி பெற்றுள்ளோம். அங்கேயும் நம் எண்ணிக்கை கூடும். சத்தீஸ்கரில் நாங்கள் வெற்றி பெறும் வாய்ப்பு அதிகமாக இருக்கிறது. அவர்கள் 100 சதவீதம் இருந்த இடங்களிலெல்லாம் அவர்களின் எண்ணிக்கை குறைந்துள்ளது. அவர்கள் எந்த அடிப்படையில் 400 இடங்கள் சொல்கிறார்கள் என்று எனக்குத் தெரியவில்லை. இந்தியா கூட்டணி, அதிக இடங்களைப் பெறுவதற்கான போதுமான அறிகுறிகள் உள்ளன” எனக் கூறினார். 

சார்ந்த செய்திகள்

 

Next Story

மக்களவைத் தேர்தல் தோல்வி; எடப்பாடி பழனிச்சாமி ஆலோசனை!

Published on 10/07/2024 | Edited on 10/07/2024
Lok Sabha election failure Edappadi Palaniswami advice

ஏழு கட்டங்களாக நடைபெற்ற மக்களவைத் தேர்தல் முடிவுகள் கடந்த ஜூன் 4ஆம் தேதி வெளியானது. அதில் 543 மக்களவைத் தொகுதிகளில் தேசிய ஜனநாயகக் கூட்டணி 292 இடங்களிலும், இந்தியா கூட்டணி 234 இடங்களிலும் வென்றது. இதில் தேசிய ஜனநாயகக் கூட்டணியில் உள்ள பாஜக தனித்து 240 தொகுதிகளை மட்டுமே கைப்பற்றியிருந்தது.

அதே சமயம் தமிழகத்தில் திமுக தலைமையிலான இந்தியா கூட்டணி மொத்தம் உள்ள 39 இடங்களையும் வென்றது. புதுச்சேரியில் உள்ள ஒரு தொகுதியில் இந்தியா கூட்டணியில் உள்ள காங்கிரஸ் கட்சி வென்றது. இந்த மக்களவைத் தேர்தலில் தமிழகத்தில் அதிமுக மற்றும் அதன் கூட்டணிக் கட்சிகள் போட்டியிட்ட அனைத்து தொகுதிகளிலும் தோல்வியடைந்தது. இந்நிலையில் மக்களவைத் தேர்தல் தோல்வி தொடர்பாகக் கட்சி நிர்வாகிகளுடன் அதிமுக பொதுச்செயலாளர் எடப்பாடி பழனிசாமி ஆலோசனை மேற்கொண்டு வருகிறார்.

அந்த வகையில் சென்னை ராயப்பேட்டையில் உள்ள அதிமுக தலைமை அலுவலகத்தில் ஆலோசனை மேற்கொண்டுள்ளார். இது தொடர்பாக இன்று (10.07.2024) முதல் வரும் 19 ஆம் தேதி வரை தொகுதி வாரியாக மாவட்ட நிர்வாகிகளுடன் எடப்பாடி பழனிசாமி ஆலோசனை நடத்த உள்ளார். அதன்படி இன்று காஞ்சிபுரம், ஸ்ரீபெரும்புதூர் நாடாளுமன்ற மக்களவைத் தொகுதிக்குட்பட்ட தலா 6 சட்டமன்றத் தொகுதிகளின் நிர்வாகிகளிடம் தேர்தல் தோல்விக்கான காரணம் குறித்து ஆய்வு மேற்கொண்டு வருகிறார். இந்த ஆய்வுக் கூட்டத்தில் பங்கேற்கக் கூடிய நிர்வாகிகள் செல்போன் கொண்டு வரவும் தடை விதிக்கப்பட்டுள்ளது குறிப்பிடத்தக்கது. 

Next Story

41 ஆண்டுகளுக்குப் பிறகு பிரதமர் மோடிக்கு கிடைத்த பெருமை!

Published on 08/07/2024 | Edited on 08/07/2024
After 41 years, Prime Minister Modi go to austria

ரஷ்யாவில் இந்தியா - ரஷ்யா இடையிலான 22வது உச்சி மாநாடு இன்று (08-07-24) நடைபெறுகிறது. இந்த மாநாட்டில் கலந்துகொள்வதற்காக இந்தியப் பிரதமர் மோடி இன்று ரஷ்யாவிற்குச் செல்கிறார். 

அங்குச் சென்ற பிறகு, இரு நாட்டு உறவுகள், உலகளாவிய முக்கிய பிரச்சனைகள் குறித்து ரஷ்ய அதிபர் விளாடிமர் புடினுடன் பிரதமர் மோடி பேச்சுவார்த்தை நடத்தவுள்ளார். அதனைத் தொடர்ந்து மோடி, இந்திய வம்சாவளியினர் மத்தியில் உரையாற்ற உள்ளார். கடந்த 2019ஆம் ஆண்டிற்குப் பிறகு சுமார் 5 ஆண்டுகள் கழித்து பிரதமர் மோடி, ரஷ்யா பயணிக்கிறார். 2019ஆம் ஆண்டில் ரஷ்யாவில் நடைபெற்ற பொருளாதார மாநாட்டில் பிரதமர் மோடி நேரில் பங்கேற்றார் என்பது குறிப்பிடத்தக்கது. 

இதனையடுத்து, பிரதமர் மோடி ரஷ்யாவில் இருந்து நாளை (09-07-24) ஆஸ்திரியா செல்கிறார். அங்குச் சென்ற அவர், அந்நாட்டு அதிபர் அலெக்ஸாண்டர் வான்டெர் பெல்லனை சந்தித்துப் பேசுகிறார். அதனைத் தொடர்ந்து, அந்நாட்டுப் பிரதமர் கார்ல் நெகமருடன் மோடி பேச்சுவார்த்தை நடத்தவுள்ளார். 41 ஆண்டுகளுக்குப் பிறகு ஆஸ்திரியாவிற்குச் செல்லும் முதல் இந்தியப் பிரதமர் என்ற பெருமையை மோடி பெற்றுள்ளார்.