Skip to main content

கழுத்தறுத்து சிறுமி படுகொலை; ஃபேக் ஐடியால் நிகழ்ந்த விபரீதம்

Published on 29/12/2022 | Edited on 29/12/2022

 

Girl' incident; A disaster caused by fake ID

 

முகநூலில் ஏற்பட்ட காதல் தொடர்பான பிரச்சனையில் சிறுமி ஒருவர் கழுத்து அறுக்கப்பட்டு கொலை செய்யப்பட்ட சம்பவம் கேரளாவில் பரபரப்பை ஏற்படுத்தியிருக்கிறது. ஏற்கனவே கேரளாவில் வரதட்சணை கொடுமை தொடர்பாக கொலை, குளிர்பானத்தில் விஷம் கொடுத்து காதலனை காதலி கொலை செய்த சம்பவம் என பல பரபரப்புகளை ஏற்படுத்தியிருந்தது. இந்த நிலையில் கேரள மாநிலம் வர்க்கலா அருகே வடசேரி கரையைச் சேர்ந்த சிறுமி ஒருவருக்கு நேர்ந்த சம்பவம் கேரளாவில் மீண்டும் பரபரப்பை ஏற்படுத்தி இருக்கிறது.

 

வடசேரி கரையைச் சேர்ந்த அந்த 17 வயது சிறுமி சம்பவத்தன்று நள்ளிரவில் கழுத்தறுபட்ட நிலையில் வீட்டின் கதவைத் தட்டியுள்ளார். பதறியடித்த பெற்றோர்கள் சிறுமியை உடனடியாக மருத்துவமனைக்கு அழைத்துச் சென்றனர். தன்னுடைய இந்த நிலைக்கு காரணம் குறித்து சிறுமி பெற்றோர்களிடம் தெரிவிக்கையில், முகநூலில் மூழ்கி இருந்த சிறுமி அதன் வாயிலாக வந்த நட்பு அழைப்புகளை ஏற்றுக்கொண்டு 'சாட்டிங்' செய்ததாகக் கூறப்படுகிறது.

 

இந்நிலையில் பள்ளிக்கல்  பகுதியைச் சேர்ந்த கோபு என்ற இளைஞர் முகநூல் மூலம் நட்பு ஏற்படுத்திக் கொண்டு பின்பு காதலிப்பதாகக் கூறியுள்ளார். சிறுமியும் அந்த இளைஞரைக் காதலிப்பதாக தெரிவித்துள்ளார். இந்த நிலையில் சிறுமி மற்ற சில நபர்களுடன் முகநூல் பக்கத்தில் பேசியதாக சந்தேகப்பட்ட இளைஞர் கோபு 'அகில்' என்ற வேறொரு போலியான முகநூல் பக்கத்திலிருந்து அச்சிறுமியை தொடர்பு கொண்டுள்ளார். அந்த போலி முகநூல் பக்கத்திலிருந்து சிறுமியிடம் பேசி அவரைக் காதலிப்பதாகவும் தெரிவித்துள்ளார். அதனையும் அந்த சிறுமி ஏற்றுக் கொண்டதால் ஆத்திரமடைந்த கோபு, அச்சிறுமியைக் காண நேரில் வருகிறேன் எனத் தனது விருப்பத்தைத் தெரிவித்துள்ளார்.

 

Girl' incident; A disaster caused by fake ID

 

சிறுமியும் அதற்கு ஒப்புதல் அளித்த நிலையில் நள்ளிரவில் வீட்டிற்கு அருகே வருமாறு அழைப்பு விடுத்துள்ளார். அதனைத் தொடர்ந்து நள்ளிரவு ஒன்றரை மணி அளவில் அச்சிறுமியின் வீட்டிற்கு வந்த கோபு வெளியே தலையில் ஹெல்மெட் அணிந்தபடி காத்துக் கொண்டிருந்தார். அந்த நேரத்தில் வீட்டை விட்டு வெளியே வந்த சிறுமி அகில் என நினைத்துக் கொண்டு இளைஞரின் ஹெல்மெட்டை கழற்றச் சொல்லியுள்ளார். ஹெல்மெட்டை கழற்றிய உடன் அது கோபு என்பதை அந்த சிறுமி தெரிந்துகொண்டார். 'காதலன் தான் இருக்க மற்றவர்களைச் சந்திப்பதற்காக நள்ளிரவில் வீட்டை விட்டு வரும் அளவிற்கு உனக்கு தைரியமா?' என ஆத்திரம் கொண்ட கோபு கத்தியால் அவரது கழுத்தை அறுத்து விட்டு தப்பிச் சென்று விட்டான். இறுதியில் பெற்றோர்களால் மீட்கப்பட்ட சிறுமி சிகிச்சை பலனின்றி பரிதாபமாக உயிரிழந்துள்ளார். இந்த சம்பவம் கேரளாவில் பெரும் பரபரப்பை ஏற்படுத்திய நிலையில், போலீசார் இது தொடர்பாக விசாரணை மேற்கொண்டு வருகின்றனர்.

 

 

சார்ந்த செய்திகள்

 

Next Story

‘மேலும் ஒரு வழக்கில் எம்.ஆர். விஜயபாஸ்கர் கைது’ - போலீசார் அதிரடி!

Published on 18/07/2024 | Edited on 18/07/2024
In another case MR. Vijayabaskar Arrested Police Action

கரூர் மாவட்டம் வாங்கல் குப்பிச்சிபாளையத்தைச் சேர்ந்த பிரகாஷ் என்பவர் கரூர் காவல் நிலையம் மற்றும் எஸ்.பி. அலுவலகத்தில் புகார் ஒன்றை அளித்திருந்தார். அதில், தோரணக்கல்பட்டி மற்றும் குன்னம்பட்டியில் தனக்குச் சொந்தமான ரூ.100 கோடி மதிப்புள்ள 22 ஏக்கர் நிலத்தை அதிமுக முன்னாள் அமைச்சர் எம்.ஆர். விஜயபாஸ்கர் மற்றும் அவரது ஆதரவாளர்கள் தனது மனைவி மற்றும் மகளை மிரட்டி மோசடியாகப் பத்திரப்பதிவு செய்து உள்ளனர் என்று கூறியிருந்தார்.  மேலும் இது தொடர்பாக மேலக்கரூர் பொறுப்பு சார்பதிவாளரும் கரூர் நகர காவல் நிலையத்தில் புகார் அளித்திருந்தார். அதனைத் தொடர்ந்து இந்த வழக்கு சிபிசிஐடிக்கு மாற்றப்பட்டது.

அதே சமயம் இந்த வழக்கில் தனது பெயர் சேர்க்கப்படலாம் என்று கருதி முன்னாள் அமைச்சர் எம்.ஆர். விஜயபாஸ்கர் முன்ஜாமீன் கேட்டு கரூர் மாவட்ட முதன்மை அமர்வு நீதிமன்றத்தில் மனுத்தாக்கல் செய்திருந்தார். இதனையடுத்து நில அபகரிப்பு வழக்கில் எம்.ஆர். விஜயபாஸ்கரின் முன் ஜாமீன் மனுக்களை நீதிபதி தள்ளுபடி செய்து உத்தரவிட்டிருந்தார். அதனைத் தொடர்ந்து முன்ஜாமீன் கோரி எம்.ஆர். விஜயபாஸ்கர் சென்னை உயர்நீதிமன்றத்தின் மதுரைக் கிளையில் மனுத்தாக்கல் செய்திருந்தார். இத்தகைய சூழலில் தலைமறைவாக கேரளாவில் பதுங்கி இருந்த எம்.ஆர். விஜயபாஸ்கர் தனிப்படை போலீசாரால் கைது செய்யப்பட்டார்.

இதனையடுத்து எம்.ஆர். விஜயபாஸ்கருக்கு வரும் 31ஆம் தேதி வரை என 15 நாட்கள் நீதிமன்ற காவல் விதிக்கப்பட்டு திருச்சி மத்தியச் சிறையில் அடைக்கப்பட்டுள்ளார். இதற்கிடையே பிரகாஷ் வாங்கல் காவல் நிலையத்தில் ஏற்கனவே  எம்.ஆர். விஜயபாஸ்கர் உள்ளிட்ட 13 பேர்  மீது அளித்த புகாரின் பேரில் கொலை முயற்சி, ஆள் கடத்தல் உள்ளிட்ட 7 சட்டப்பிரிவின் கீழ் வழக்குப் பதிவு செய்யப்பட்டிருந்தது. இந்நிலையில் இந்தப் புகாரின் பேரில் எம்.ஆர். விஜயபாஸ்கர் மீண்டும் கைது செய்யப்பட்டுள்ளார். இதையடுத்து எம்.ஆர். விஜயபாஸ்கரிடம் இத்தகவலை தெரிவிப்பதற்காக நீதிமன்றத்தில் வாங்கல் காவல் துறையினர் பெற உள்ளனர். 

Next Story

சொத்து தகராறு; அண்ணனின் வீட்டைச் சூறையாடிய தாய், தம்பி!

Published on 18/07/2024 | Edited on 18/07/2024
Mother and brother robbed brother  house due to property dispute

திருப்பத்தூர் மாவட்டம் வாணியம்பாடி அருகே உள்ளது புருஷோத்தம குப்பம். இந்தப் பகுதியைச் சேர்ந்தவர் வழக்கறிஞர் சம்பத். இவர் அதே பகுதியில் தாய் வனிதா பெயரில் இடம் ஒன்றைப் பணம் கொடுத்து வாங்கி வீடு கட்டி வாழ்ந்து வருகிறார். இந்த நிலையில் சம்பத்தின் தம்பி நேரு, புதிதாகக் கட்டிய வீட்டில் தனக்கும் பங்கு வேண்டும் என்று அடிக்கடி தகராறு செய்து வந்துள்ளார். அதனால் சம்பத்  ரூ.10 லட்சம் மதிப்புள்ள லாரி ஒன்றை வாங்கி தனது தம்பி நேருவுக்குக் கொடுத்துள்ளார். இருப்பினும் லாரி வாங்கிக் கொடுத்தது போதாது, வீட்டிலும் பங்கு வேண்டும் என்று சம்பத்திடம் மீண்டும் தகராறு செய்திருக்கிறார்.

இதனிடையே இந்தச் சம்பவம் குறித்து ஏற்கெனவே காவல்நிலையத்தில் புகார் அளிக்கப்பட்ட நிலையில் இருவரையும் அழைத்து சமாதானம் செய்து அனுப்பி வைத்தனர். இந்த நிலையில் வழக்கறிஞர் சம்பத்தின் வீட்டைத் தாய் வனிதா மற்றும் சகோதரர் நேரு இருவரும் சேர்ந்து உடைத்து உள்ளே இருந்த பொருட்களைச் சேதப்படுத்தியுள்ளனர். இதனைத் தொடர்ந்து நடந்த சம்பவம் குறித்து வாணியம்பாடி கிராமிய காவல்நிலையத்தில் புகார் அளித்துள்ளார்.

புகாரின் பேரில் வழக்குப் பதிவு செய்த போலீசார் சம்பத்தின் வீட்டில் இருந்த சிசிடிவி காட்சிகளை வைத்து விசாரணையைத் தீவிரப்படுத்தியுள்ளனர். சொத்து தகராறில், தம்பி மற்றும் தாய் ஒன்று சேர்ந்து அண்ணன் வீட்டை அடித்து உடைத்த சம்பவத்தில் சிசிடிவி காட்சிகளை வைத்து விசாரணை மேற்கொண்டு வருகின்றனர்.