‘14 மருத்துவமனைகளில் ஐசியூ வசதி இல்லை’ - ஆம் ஆத்மிக்கு எதிராக சிஏஜி அறிக்கை!

சமீபத்தில் நடைபெற்ற டெல்லி சட்டமன்றத் தேர்தலில், ஆம் ஆத்மி கட்சியை வீழ்த்தி பா.ஜ.க வெற்றி பெற்று ஆட்சி அமைத்துள்ளது. இதற்கு முன்னதாக, கடந்த 10 ஆண்டுகளாக அரவிந்த் கெஜ்ரிவாலின் ஆம் ஆத்மி ஆட்சி நடைபெற்று வந்தது. இந்த நிலையில், கடந்த கால ஆட்சியின் போது டெல்லியின் சுகாதாரப் பராமரிப்புத் துறையில் முறைகேடு நடந்திருப்பதாக, இந்தியாவின் கன்ட்ரோலர் மற்றும் ஆடிட்டர் ஜெனரல்(சிஏஜி) அறிக்கை வெளியிட்டுள்ளது.

சிஏஜி அறிக்கையில் கூறப்பட்டிருப்பதாவது, ‘டெல்லியில் உள்ள பல மருத்துவமனைகள் முக்கியமான மருத்துவ சேவைகளின் கடுமையான பற்றாக்குறையை எதிர்கொள்கிறது . நகரத்தில் உள்ள, 14 மருத்துவமனைகளில் ஐசியு வசதிகள் இல்லை, 16 மருத்துவமனைகளில் இரத்த வங்கிகள் இல்லை, 8 மருத்துவமனைகளில் ஆக்ஸிஜன் விநியோகம் இல்லை, 15 மருத்துவமனைகளில் பிணவறை இல்லை. 12 மருத்துவமனைகள் ஆம்புலன்ஸ் சேவைகள் இல்லாமல் இயங்குகிறது.

பல மொஹல்லா மருத்துவமனைகளில் கழிப்பறைகள், மின்சார காப்புப்பிரதி மற்றும் பரிசோதனை மேசைகள் போன்ற அத்தியாவசிய வசதிகள் இல்லை. ஆயுஷ் மருந்தகங்களிலும் இதே போன்ற குறைபாடுகள் பதிவாகியுள்ளன. டெல்லி மருத்துவமனைகள் ஆபத்தான பணியாளர் பற்றாக்குறையை எதிர்கொள்கின்றன. 21 சதவீத செவிலியர்கள் பற்றாக்குறை, 38 சதவீத துணை மருத்துவர்களின் பற்றாக்குறை மற்றும் சில மருத்துவமனைகளில் 50-96 சதவீத மருத்துவர்கள் மற்றும் செவிலியர்களின் பற்றாக்குறை உள்ளது.

வாக்குறுதியளிக்கப்பட்ட 32,000 புதிய மருத்துவமனை படுக்கைகளில், 1,357 (4.24 %) மட்டுமே சேர்க்கப்பட்டன. சில மருத்துவமனைகள் 101 சதவீதம் முதல் 189 சதவீதம் வரை ஆக்கிரமிப்பு விகிதங்களைப் பதிவு செய்தன. இதனால் நோயாளிகள் தரையில் படுக்க வேண்டிய கட்டாயம் ஏற்பட்டது. லோக் நாயக் மருத்துவமனையில் நோயாளிகள் பொது அறுவை சிகிச்சைகளுக்கு 2-3 மாதங்களும், தீக்காயங்கள் மற்றும் பிளாஸ்டிக் அறுவை சிகிச்சைகளுக்கு 6-8 மாதங்களும் காத்திருக்கிறார்கள்’ என்று தெரிவிக்கப்பட்டுள்ளது.

இந்த அறிக்கை இன்று டெல்லி சட்டமன்றத்தில் தாக்கல் செய்யப்படும் என்று எதிர்பார்க்கப்படுகிறது. ஏற்கெனவே, டெல்லி மதுபானக் கொள்கை தொடர்பான பணமோசடி காரணமாக ஆம் ஆத்மி கட்சி 2021-2022 காலக்கட்டத்தில் ரூ.2,000 கோடி அளவுக்கு டெல்லி அரசுக்கு வருவாய் இழப்பை ஏற்படுத்தியுள்ளது என்ற அறிக்கையை சிஏஜி வெளியிட்டது. அந்த அறிக்கையை, டெல்லி முதல்வர் ரேகா குப்தா சட்டப்பேரவையில் தாக்கல் செய்தார் என்பது குறிப்பிடத்தக்கது.