மத்திய அமைச்சராகிறார் எல். முருகன் - பதவியேற்பவர்களின் பட்டியல் வெளியீடு!

பிரதமர் மோடி தலைமையிலான மத்திய அமைச்சரவை இன்று (07.07.2021) விரிவாக்கம் செய்யப்படுகிறது. இன்று மாலை ஆறு மணிக்கு இந்த புதிய அமைச்சர்கள் பதவியேற்கவுள்ளனர். இதனையொட்டி, ஏற்கனவே பதவிவகித்து வந்த பல்வேறு மத்திய அமைச்சர்கள் தங்களது பதவியில் இருந்து விலகியுள்ளனர்.

இந்நிலையில் இன்று மாலை பதவியேற்கவுள்ள புதிய அமைச்சர்களின் பட்டியல் தற்போது வெளியாகியுள்ளது. அதில் அனைவரும் எதிர்பார்த்தபடியே ஜோதிராதித்ய சிந்தியாவின் பெயர் இடம்பெற்றுள்ளது. அதேபோல் தமிழக பாஜக தலைவர் எல். முருகன் பெயரும் இடம்பெற்றுள்ளது.

எல். முருகனுக்கு மத்திய இணை அமைச்சர் பதவி வழங்கப்படும் என எதிர்பார்க்கப்படுகிறது. இன்றைய மத்திய அமைச்சரவை விரிவாக்கத்தில் மொத்தம் 43 பேர் பதவியேற்கவுள்ளனர் என்பது குறிப்பிடத்தக்கது.