Skip to main content

போட்டியிட்டால் தலைவரை வெற்றி பெறவைப்போம் –ரஜினி மக்கள் மன்ற மா.செ. பேட்டி

Published on 17/02/2020 | Edited on 17/02/2020

 


சினிமாத்துறையினரை விமர்சித்து வந்த பாமக நிறுவனர் மருத்துவர் ராமதாஸ், தற்போது அதே ரஜினியுடன் கூட்டணி வைக்க முயல்கிறார். இது அரசியல் தளத்தில் பெரும் விவாதத்தை ஏற்படுத்தியுள்ள அதே நேரத்தில், ரஜினி அரசியல் கட்சி தொடங்கினால், அவர் கிருஷ்ணகிரி மாவட்டத்தில் உள்ள வேப்பனஹல்லி தொகுதியில் போட்டியிடுவார். அந்த தொகுதியில் கன்னடம் பேசும் மக்கள் அதிகமாகவுள்ளதால் அங்கு போட்டியிடுவார்கள் என்கிறார்கள். அந்த தொகுதி வேண்டாம் என்றால் வேலூர் மாவட்டத்தில் போட்டியிடுவார் என்கிற தகவல்கள் வெளிவருகின்றன.

 

rajini




வேலூர் மாவட்டத்தை எதனால் தேர்வு செய்வார் என விசாரித்தபோது, இரண்டு ஆண்டுக்கு முன்பு ரஜினி மக்கள் மன்றத்தில் உறுப்பினர்களை சேர்க்கச்சொல்லி ரஜினி உத்தரவிட்டார். அப்போது தமிழகத்தில் ஒருங்கிணைந்த வேலூர் மாவட்டத்தில் 1.60 லட்சம் உறுப்பினர்களை சேர்த்து முதலிடத்தில் இருக்கிறது வேலூர் மாவட்டம். இந்த மாவட்டத்தில் ரஜினி ரசிகர்கள் மட்டும்மல்ல, மன்ற உறுப்பினர்களும் அதிகம். அதோடு ரஜினி பிறந்தநாளில் லட்சங்களை செலவு செய்து பல நலத்திட்ட உதவிகளை வழங்குவது இந்த மாவட்டத்தில் தான். அதோடு, பூத் கமிட்டி வரை இந்த மாவட்டத்தில் ரஜினி மக்கள் மன்றம் அமைத்துள்ளது அதனால் தான் என்கிறார்கள்.
 


ஒருங்கிணைந்த வேலூர் மாவட்டத்தில் 13 தொகுதிகள் இருந்தன. தற்போது வேலூர், இராணிப்பேட்டை, திருப்பத்தூர் மாவட்டமாக பிரிக்கப்பட்டுவிட்டது. இதில் இராணிப்பேட்டை மாவட்டத்தில் 4 தொகுதிகள், வேலூர் மாவட்டத்தில் 5 தொகுதிகள், திருப்பத்தூர் மாவட்டத்தில் 4 தொகுதிகள் என உள்ளன.
 




இதில் எந்த தொகுதி ரஜினிக்கு சாதகமாக இருக்கும் என அரசியல் கணிப்பாளர்களிடம் கேட்டபோது, திருப்பத்தூர் மாவட்டத்தில் வாணியம்பாடி, ஆம்பூர் போன்றவை சிறுபான்மையின மக்கள் வெற்றியை தீர்மானிக்கும் இடத்தில் உள்ளனர். ரஜினி தன் மீது காவிச்சாயம் பூசிக்கொள்ளும் வகையில் சிறுபான்மையின மக்கள் எதிர்க்கும் குடியரிமை திருத்த சட்டத்துக்கு ஆதரவு, ஆன்மீக அரசியல் போன்ற கருத்துக்களால் அவருக்கு சிறுபான்மையின வாக்குள் கிடைக்குமா என்பது பெரும் கேள்விக்குறியாகவுள்ளது. அதனால் அங்கு நிற்க வாய்ப்பு குறைவு. மீதியிருப்பது திருப்பத்தூர், ஜோலார்பேட்டை தொகுதிகள்.
 


வேலூர் மாவட்டத்தில் குடியாத்தம், கே.வி.குப்பம் இரண்டும் தனித்தொகுதிகள். அதனால் அங்கு நிற்க முடியாது. மீதி வேலூர், அணைக்காட்டு, காட்பாடி எனவுள்ளன. இராணிப்பேட்டை மாவட்டத்தில் அரக்கோணம் தனி தொகுதி என்பதால் போட்டியிட முடியாது. மீதியிருப்பது சோளிங்கர், ஆற்காடு, இராணிப்பேட்டை ஆகியவை தான். இதில் இராணிப்பேட்டையில் இஸ்லாமியர்கள் கணிசமாக உள்ளார்கள். அதனால் அங்கு ரஜினி நிற்க சாத்தியம்மில்லை. மீதியிருப்பது சோளிங்கர், ஆற்காடு மட்டுமே.


 


ரஜினி தேர்தலில் நிற்பதாக இருந்தால், திருப்பத்தூர், ஜோலார்பேட்டை, வேலூர், காட்பாடி, அணைக்கட்டு, சோளிங்கர், ஆற்காடு மட்டுமே உள்ளன. ரஜினி நகரங்கள் நிறைந்த பகுதியில் நின்றால் டெபாசிட் வாங்கலாம், அவ்வளவு தான், வெற்றி பெற முடியாது. கிராமங்கள் நிறைந்த தொகுதி என்றால் தான் வெற்றி பெற முடியும். அதன்படி சோளிங்கர், ஆற்காடு, அணைக்கட்டு, ஜோலார்பேட்டை, திருப்பத்தூர் போன்றவை தான் அவர் நிற்க சாதகமாகவுள்ள தொகுதிகள் என்கிறார்கள்.
 


ரஜினி வேலூர் மாவட்டத்தில் தேர்தலில் நிற்பது தொடர்பாக உலாவரும் கருத்துக்கள் குறித்து ஒருங்கிணைந்த வேலூர் மாவட்ட ரஜினி மக்கள் மன்ற மா.செ சோளிங்கர் ரவியிடம் கேட்டபோது, தலைவர் இன்னும் கட்சி தொடங்கவில்லை. அவர் தொடங்கிய பின் தான் அதுப்பற்றி பேச முடியும். பத்திரிக்கைகள் சொல்வது போல, எங்கள் தலைவர் வேலூர் மாவட்டத்தில் போட்டியிட நினைத்தால் எந்த தொகுதியில் நின்றாலும் வெற்றி பெற வைப்போம் அதை சபதமாகவே சொல்கிறேன் என்றார்.

 


 

சார்ந்த செய்திகள்

 

Next Story

‘போர்க்கால அடிப்படையில் அரசு நடவடிக்கை எடுக்க வேண்டும்’ - இ.பி.எஸ். வலியுறுத்தல்!

Published on 19/07/2024 | Edited on 19/07/2024
Government should take action on time basis EPS Emphasis

கொலை பாதகர்களிடமிருந்து மக்களை எப்படி காப்பாற்ற வேண்டும் என்று சிந்தித்து போர்க்கால அடிப்படையில் அரசு நடவடிக்கைகளை மேற்கொள்ள வேண்டும் என்று எடப்பாடி பழனிசாமி தெரிவித்துள்ளார்.  இது தொடர்பாக அதிமுக பொதுச் செயலாளர் எடப்பாடி பழனிசாமி விடுத்துள்ள அறிக்கையில், “திமுக அரசின் முதலமைச்சர் மு.க. ஸ்டாலின், தன்னை நம்பி வாக்களித்த மக்களுக்கு சட்டம்-ஒழுங்கை நிலைநாட்டி, பாதுகாப்பான சூழலை ஏற்படுத்தித் தராமல், அவர்களை சிரமத்திற்குள்ளாக்கி தனது நிர்வாகத் திறமையின்மையை நாள்தோறும் வெளிக்காட்டி வருகிறார். கடந்த மூன்றாண்டுகளாக திமுக ஆட்சியில் நடைபெறக்கூடிய சமூக விரோதச் செயல்களை சுட்டிக்காட்டினால், தமிழகம் அமைதிப் பூங்காவாக இருக்கிறது என்று கூறும் முதல்வர் மு.க. ஸ்டாலின்,  நான் எத்தனையோ முறை வேண்டுகோள் விடுத்த பின்னரும் காவல் துறையினரை சுதந்திரமாக செயல்பட விடாமல் வைத்திருப்பது, நாள்தோறும் நடைபெற்று வரும் கொலைச் சம்பவங்களின் மூலம் நிரூபணமாகிறது.

யார் ஆட்சியில் இருந்தாலும் அங்கொன்றும், இங்கொன்றும் தனிப்பட்ட காரணங்களுக்காகவும், வக்கிர புத்தி படைத்தவர்களாலும், ஒருசில கொலைகள் நடப்பது இயல்பு. குற்றவாளிகளை காவல் துறையினர் கண்டுபிடித்து கைது செய்வது நடைமுறை. ஆனால், திமுக ஆட்சியில் கொலைகள் செய்வதையே தொழிலாகக் கொண்டு பலர் தமிழகம் முழுவதும் சுற்றிச் சுற்றி வந்து வெறியாட்டம் ஆடுவதும், பல கொலைகளில் ஈடுபட்ட கொலையாளிகளை கண்டுபிடிக்க முடியாமல் காவல் துறையினர் திணறுவதும் கண்கூடாகும். பகுஜன் சமாஜ் கட்சித் தலைவரும், வழக்கறிஞருமான ஆம்ஸ்ட்ராங் கொலை சம்பவத்தில்கூட 'நாங்கள்தான் செய்தோம்' என்று தானாகவே முன்வந்து சிலர் சரணடைந்துள்ளதும், அதில் ஒருவரைச் சென்னை மாநகர் காவல் துறையினர் என்கவுண்டர் செய்ததும் விந்தையான சம்பவமாகும். 

Government should take action on time basis EPS Emphasis

காங்கிரஸ் கட்சியின் நெல்லை மாவட்டத் தலைவர் ஜெயக்குமார் படுகொலை, சேலம் மாநகர் மாவட்டத்தைச் சேர்ந்த அதிமுக பகுதிக் கழகச் செயலாளர் சண்முகம் படுகொலை, மதுரையில் நாம் தமிழர் கட்சி நிர்வாகி பாலசுப்பிரமணியன் படுகொலை என்று கட்சி பேதமின்றி பல படுகொலைகள் அரங்கேறிய வண்ணம் உள்ளன. இவற்றில் ஒருசில கொலை நிகழ்வுகளைத் தவிர, ஏனைய குற்றங்களில் உண்மைக் குற்றவாளிகள் கண்டுபிடிக்கப்படவில்லை. உண்மைக் குற்றவாளிகள் இதுவரை பிடிபடாமல் இருப்பது பல்வேறு சந்தேகங்களை எழுப்புகிறது. 2021இல் திமுக ஆட்சிக்கு வந்தபிறகு தமிழகத்தின் தலைநகராம் சென்னை கொலை நகரமாக மாறியுள்ளது என்ற நிலையில், கடந்த 200 நாட்களாக தமிழகமே கொலைக்களமாக மாறியுள்ளது. மக்கள் தங்களது உயிருக்கு பாதுகாப்பில்லாத சூழ்நிலையில் வாழ்வது அபாயகரமான ஒன்றாகும்.

திமுக ஆட்சியில் தமிழகம் முழுவதும் இந்த ஆண்டு ஜனவரி மாதம் 80 கொலைகளும்; பிப்ரவரி மாதம் 64 கொலைகளும்; மார்ச் மாதம் 53 கொலைகளும்; ஏப்ரல் மாதம் 76 கொலைகளும்; மே மாதம் 130 கொலைகளும்; ஜூன் மாதம் 104 கொலைகளும்; ஜூலை 17-ஆம் தேதி வரை 88 கொலைகளும் என, மொத்தம் சுமார் 200 நாட்களில் 595 கொலைச் சம்பவங்கள் அரங்கேறி உள்ளதாகச் செய்திகள் தெரிவிக்கின்றன. தமிழகத்தில் சென்னை மாநகரில் மட்டும் 86 கொலைச் சம்பவங்கள் அரங்கேறி முதலாவது இடத்தைப் பிடித்துள்ளது, இரண்டாவது மதுரையில் 40 கொலைச் சம்பவங்கள் நடைபெற்றுள்ளது. தூத்துக்குடி மாவட்டத்தில் 35யும், விருதுநகரில் 31 கொலைகளும் நடைபெற்று முறையே மூன்றாவது, நான்காவது இடங்களைப் பிடித்துள்ளன என்று செய்திகள் தெரிவிக்கின்றன. 

Government should take action on time basis EPS Emphasis

'அடுத்தவர்கள் சொல்வதை நாம் ஏன் கேட்க வேண்டும்' என்ற இருமாப்போடு இனியும் செயல்படாமல், சுய சிந்தனையோடு கொலை பாதகர்களிடமிருந்து மக்களை எப்படி காப்பாற்ற வேண்டும் என்று சிந்தித்து, போர்க்கால அடிப்படையில் இந்த அரசு நடவடிக்கைகளை மேற்கொள்ள வேண்டும் என்று அதிமுக சார்பில் வலியுறுத்துகிறேன். கையில் அதிகாரம் இருக்கிறது என்ற மமதையில் தொடர்ந்து காவல் துறையை தங்களின் சுயநலத்திற்காக இந்த ஆட்சியாளர்கள் ஏவல் துறையாக பயன்படுத்துவார்களேயானால், 'அரசியல் பிழைத்தோர்க்கு, அறம் கூற்றாகும்' என்பதை நினைவூட்டுகிறேன்” எனத் தெரிவித்துள்ளார். 

Next Story

‘தமிழ்நாடு நாள்’ கொண்டாட்டம் -  முதல்வர் வீடியோ வெளியிட்டு வாழ்த்து! 

Published on 18/07/2024 | Edited on 18/07/2024
Celebrating 'Tamil Nadu Day' - Chief Minister released a video and congratulated him!

மெட்ராஸ் மாகாணத்திற்கு 'தமிழ்நாடு' என முன்னாள் முதல்வர் பேரறிஞர் அண்ணா பெயர் சூட்டிய ஜூலை 18 ஆம் தேதி, தமிழ்நாடு தினமாக கொண்டாடப்படுகிறது. அதன்படி தமிழ்நாடு நாள் விழா ஒவ்வொரு ஆண்டும் ஜூலை 18 அன்று கொண்டாடப்பட வேண்டும் என்ற தமிழ்நாடு முதலமைச்சர் மு.க. ஸ்டாலின் ஆணைக்கிணங்க இந்த ஆண்டு ஜூலை 18 தமிழ்நாடு நாள் விழா பேரறிஞர் அண்ணா பிறந்த மண்ணான காஞ்சிபுரத்தில் உள்ள தனியார் திருமண மாளிகையில் இன்று (18.07.2024) நடைபெறவுள்ளது.

இவ்விழாவில் தமிழ் வளர்ச்சித் துறை இயக்குநர் ஒளவை அருள் வரவேற்புரையும், திருப்பெரும்புதூர் நாடாளுமன்ற உறுப்பினர் டி.ஆர். பாலு, காஞ்சிபுரம் நாடாளுமன்ற உறுப்பினர் க.செல்வம், உத்திரமேரூர் சட்டமன்ற உறுப்பினர் க.சுந்தர். காஞ்சிபுரம் சட்டமன்ற உறுப்பினர், சி.வி.எம்.பி. எழிலரசன் மற்றும் திருப்பெரும்புதூர் சட்டமன்ற உறுப்பினர்  கு.செல்வப்பெருந்தகை ஆகியோர் முன்னிலை வகிக்க உள்ளனர். காஞ்சிபுரம் மாவட்ட ஆட்சியர் கலைச்செல்வி மோகன் அவர்கள் தலைமையுரையும்,  தமிழக குறு, சிறு மற்றும் நடுத்தரத் தொழில் நிறுவனங்கள் துறை அமைச்சர் தா.மோ.அன்பரசன் விழாச் சிறப்புரையும் ஆற்ற உள்ளனர். 

Celebrating 'Tamil Nadu Day' - Chief Minister released a video and congratulated him!

மேலும் ஆழி. செந்தில்நாதன் தலைமையில் கருத்தரங்கம் நடைபெறவுள்ளது. அதில் "தமிழ்நாடு வாழ்வும் வரலாறும்" என்ற தலைப்பில் பர்வீன் சுல்தானாவும், "சென்னை மாகாணமும் செயற்கரிய போராட்டங்களும்" என்ற தலைப்பில் சிவ.சதீஸும், "சென்னை மீட்பும் வரலாறும்" என்ற தலைப்பில் அனு கிரகாவும், ."திராவிட இயக்கத் தலைவர்களும் நவீன தமிழ்நாடும்" என்ற தலைப்பில் சூர்யா கிருஷ்ணமூர்த்தியும், "தமிழ்நாடு பெயர்மாற்றப் போராட்ட வரலாறு" என்ற தலைப்பில் மா.மதன் குமாரும் கருத்துரையாற்ற உள்ளனர்.

இந்நிலையில் தமிழக முதல்வர் மு.க.ஸ்டாலின் தமிழ்நாடு  நாள் குறித்த தனது வாழ்த்து செய்தியை எக்ஸ் சமூக வலைத்தளத்தில் வீடியோ வடிவில் வெளியிட்டுள்ளார். அதில் முன்னாள் முதல்வர் பேரறிஞர் அண்ணா தமிழக சட்டப்பேரவையில் தமிழ் நாடு பெயர் சூட்டி பேசிய வீடியோ காட்சியை பகிர்ந்துள்ளார். அதனைத் தொடர்ந்து முதல்வர் மு.க. ஸ்டாலின் பேசுகையில், “கடல் கண்டு, மலை கண்டு பயன்கொண்ட தமிழ்நாடு வாழ்க. களங்கண்டு, கலை கண்டு, கவின் கொண்ட தமிழ்நாடு வாழ்க. உடல் கொண்டு, உரங்கொண்டு, உயிர் கொண்ட தமிழ்நாடு வாழ்க. ஜூலை 18, தமிழ்நாடு நாள், தமிழ்நாடு திருநாள் என்று சொல்லும்போதே நம் உள்ளத்தில் ஒரு மகிழ்ச்சி ஏற்படுகிறது. ஒரு ஆற்றல் பிறக்கிறது. தமிழ்நாடு வாழ்க. தமிழ்நாடு வாழ்க. தமிழ்நாடு வாழ்க” எனப் பேசியுள்ளார்.