மற்ற கட்சி தலைவர்களை சந்திக்கக்கூடாது என திமுக விதிகளில் இல்லை... -கு.க.செல்வம்

தி.மு.க. தலைமை மீது ஆயிரம் விளக்கு தி.மு.க. எம்.எல்.ஏ. கு.க.செல்வம் அதிருப்தியில் இருப்பதாகவும், அவர் பா.ஜ.க.வில் இணைய உள்ளதாகவும் தகவல் வந்த நிலையில் டெல்லியில் தமிழக பா.ஜ.க. தலைவர் எல்.முருகனுடன் பா.ஜ., தேசிய தலைவர் நட்டாவை அவரது வீட்டில் சந்தித்து பேசி பரபரப்பை ஏற்படுத்தினார் கு.க.செல்வம்.

இதன் பிறகு செய்தியாளர்களைச் சந்தித்த கு.க.செல்வம், ராமர் கோயிலுக்கு பூமி பூஜை நடத்தும் பிரதமர் மோடிக்கு பாராட்டுகளைத் தெரிவித்து கொள்கிறேன். ஆயிரம் விளக்கு தொகுதிக்கு உட்பட்ட நுங்கம்பாக்கம் ரயில் நிலையத்தில் இரண்டு லிஃப்ட் வேண்டும் என பியூஷ் கோயலிடம் கோரிக்கை வைத்திருந்தேன். அதற்காக டெல்லி வந்தேன்.

நான் பா.ஜ.க.வில் இணையவில்லை. தமிழ்க் கடவுள் முருகனை இழிவு படுத்தியவர்களை தி.மு.க. தலைவர் ஸ்டாலின் கண்டிக்க வேண்டும் தி.மு.க. உட்கட்சித் தேர்தலை மு.க.ஸ்டாலின் முறையாக நடத்த வேண்டும். பாரதத்தில் நல்லதொரு ஆட்சி நடத்திக்கொண்டிருக்கும் பிரதமர் நரேந்திர மோடி அவர்களைக் குறை சொல்லிக்கொண்டிருக்கும் ராகுல்காந்தியையும், அவர்கள் சார்ந்த தொடர்புகளையும் துண்டிக்க வேண்டும் என்று தெரிவித்தார்.

இதனிடையே திமுக தலைவர் மு.க.ஸ்டாலின், திமுக முன்னணி தலைவர்களுடன் ஆலோசனை மேற்கொண்ட பின்னர்கடந்த 5ஆம் தேதி, ''திமுக தலைமை நிலைய அலுவலக செயலாளர் மற்றும் தலைமை செயற்குழு உறுப்பினர் கு.க.செல்வம் அவர்கள், அவர் வகித்து வந்த பொறுப்புகளில் இருந்து இன்று முதல் (05.08.2020) விடுவிக்கப்படுகிறார்'' என அறிவிப்பு வெளியிட்டிருந்தார்.

மேலும் திமுக தலைமை கழகம் கு.க.செல்வத்திற்கு ஒரு நோட்டீஸ் அனுப்பியிருந்தது. அதில், திமுக தலைமை நிலைய அலுவலக செயலாளர் மற்றும் தலைமை செயற்குழு உறுப்பினர் பொறுப்புகளில் இருந்து விடுவிக்கப்பட்ட கு.க.செல்வம் அவர்கள், கழக கட்டுப்பாட்டை மீறியும் கழகத்திற்கு அவப்பெயர் ஏற்படும் வகையிலும் செயல்பட்டு வருவதையொட்டி, அவரை தற்காலிகமாக கழகத்தில் இருந்து நீக்கி வைப்பதுடன், கழகத்தின் அடிப்படை உறுப்பினர் பொறுப்பிலிருந்து ஏன் நீக்கக்கூடாது என அவருக்கு விளக்கம் கேட்டு கடிதம் அனுப்பப்பட்டுள்ளது” என குறிப்பிடப்பட்டிருந்தது.

இந்தநிலையில், இன்று கு.க.செல்வம் மு.க.ஸ்டாலினுக்கு ஒரு கடிதம் அனுப்பியுள்ளார்.

அதில், தங்களுடைய 05.08.2020 தேதியிட்ட நோட்டீஸ் கிடைக்கப் பெற்றது. கிடைத்த 7 நாட்களுக்குள் பதில் அளிக்க வேண்டும் என்றும் பதில் அளிக்கவில்லை என்றால் நடவடிக்கை எடுக்கப்படும் என்று கூறப்பட்டுள்ளது. ஆனால் நடவடிக்கை எடுத்து தன்னை தற்காலிகமாக நீக்கி வைத்துள்ளீர்கள்.

ஆகவே என் பதில் கிடைக்கும் முன்னரே நான் குற்றவாளி என்று ஒரு தலைப்பட்சமாக தீர்மானிக்கப்பட்டுள்ளது. ஆகவே தற்காலிகமாக நீக்கி வைத்து இயற்கை நீதிக்கு விரோதமானது. ஆகவே தங்களின் தற்காலிக நீக்கத்தை வாபஸ் பெறுமாறு கேட்டுக்கொள்கிறேன்.

மேலும் தங்கள் நோட்டீஸ்க்கு நான் விபரமாக விளக்கம் அளிப்பதற்கு சில விவரங்கள் தேவைப்படுகின்றன. தாங்கள் அனுப்பிய நோட்டீஸில், விவரங்கள் இல்லாமல் மேலோட்டமாக அனுப்பப்பட்டுள்ளது. தங்கள் நோட்டீஸில் நான் பொய்யான தகவல்களை சொன்னதாக நோட்டீஸில் முதலாவது குற்றச்சாட்டில் கூறப்பட்டுள்ளது.

ஆனால் நான் என்ன தகவல்கள் பொய்யாக சொன்னேன் என்ற குறிப்பிடப்படவில்லை. நான் கூறியவை அனைத்தும் பொய் என்று நானே அனுமானிக்கும் நிலையில் என்னை வைத்து குற்றம் சாட்டியுள்ளீர்கள்.

அதுபோன்று இரண்டாம் குற்றச்சாட்டில் நான் அவதூறாக கூறி உள்ளீர்கள். ஆனால் நான் பேசியதில் எதை அவதூறுகள் என்று குறிப்பிட்டு சாட்டப்படவில்லை. இரண்டு இணைப்புகளை அனுப்பி என்னை அனுமானிக்க சொல்லியிருக்கிறீர்கள். திராவிட முன்னேற்ற கழகத்தை சேர்ந்தவர்கள் மற்ற கட்சி தொண்டர்களையும் தலைவர்களையோ சந்திக்கக்கூடாது என்று எங்கும் குறிப்பிடவில்லை. 'மாற்றான் தோட்டத்து மல்லிகையும் மணக்கும்' என்பதுதான் பேரறிஞர் அண்ணா அவர்களது கோட்பாடு.

நம் தலைவர் கலைஞர் அவர்களை பிஜேபியை சேர்ந்த பாரத பிரதமர் நேரில் வந்து பார்த்தது அனைவருக்கும் தெரியும். ஆகவே கட்சியின் மாண்பை நான் மீறியதாக கூறிவது சரியல்ல. இயற்கை நீதிக்கு விரோதமானது.

ஆகவே தங்கள் நோட்டீஸை திரும்ப பெறுமாறு கேட்டுக்கொள்கிறேன். சட்டப்படி விசாரணை வைத்து மேற்படி பத்தியில் நான் கேட்ட விவரங்கள் அளித்தால் விசாரணைக்கு ஒத்துழைக்க தயராக உள்ளேன். இவ்வாறு அந்த கடிதத்தில் செல்வம் கூறியுள்ளார்.