செங்கோட்டையன் துரோகங்களை அம்பலப்படுத்த இபிஎஸ் திட்டம் - கோபியில் அதிரடி!

த.வெ.க.வில் இணைந்துவிட்டார் செங்கோட்டையன். நடிகர் விஜய் கட்சிக்கு அவர் சென்றதும் எடப்பாடியை விமர்சித்திருக்கிறார். அவரது விமர்சனங்களுக்கு 30-ந்தேதி பதிலடி கொடுக்க திட்டமிட்டுள்ளார் இ.பி.எஸ்.மேலும் செங்கோட்டையன் குறித்து அதிமுகவில் விவாதங்களும் நடந்துகொண்டிருக்கின்றன.

இந்த நிலையில், எடப்பாடியின் திட்டம் குறித்து அதிமுக சீனியர்களிடம் விசாரித்தபோது, "அதிமுகவில் இருந்தவரை பதவி சுகங்களை அனுபவித்துவிட்டு, வேறு கட்சிக்குச் சென்றதும் தாய்க் கழகத்தைக் காட்டிக்கொடுப்பதில் செங்கோட்டையன் மட்டும் விதிவிலக்கா என்ன? அரை நூற்றாண்டு அனுபவம் கொண்டவர் என்று பெருமை பேசிக்கொள்ளும் ஒருவருக்கு திமுகவை எதிர்த்துதான் எம்ஜிஆர் அதிமுகவை துவக்கினார் என்பது கூட தெரியாமல் போனது துரதிர்ஷ்டவசமானது. 1977ம் ஆண்டு அப்போதிருந்த சத்தியமங்கலம் தொகுதியில் முதல்முறை வெற்றி பெற்று எம்.எல்.ஏவானார் செங்கோட்டையன். அதன்பின்னர், 1980, 1984, 1989, 1991 ஆகிய தேர்தல்களிலும், 2006, 2011, 2016 மற்றும் 2021 ஆகிய தேர்தல்களிலும் கோபிச்செட்டிப்பாளையம் தொகுதியில் இருந்து வெற்றி பெற்று எம்.எல்.ஏ ஆனார்.

10 முறை போட்டியிட்டு, அதில் 9 முறை வெற்றி பெற்று, அதில் 8 முறை ஒரே தொகுதியில் போட்டியிட்டு எம்.எல்.ஏவாகி, அத்தொகுதியில் வேறு எந்த நிர்வாகியையும் உயரத்திற்கு வரவிடாமல் தடுத்துக்கொண்டிருந்தவர் செங்கோட்டையன். அவரைக் கட்சியிலிருந்து நீக்கியதுமே கோபி தொகுதி மட்டுமின்றி, ஈரோடு மாவட்ட அதிமுக தொண்டர்கள் அனைவரும் பட்டாசு வெடித்துக் கொண்டாடினார்கள் என்றால் எந்தளவுக்கு அவரை தொண்டர்கள் வெறுத்திருப்பார்கள் என்பதைத் தெரிந்துகொள்ளலாம்.

அதிமுக தூய்மையான ஆட்சி நடத்தவில்லை என்பதாகச் சொல்லிவிட்டு, பிறகு எம்ஜிஆர், ஜெயலலிதாவை நான் சொல்லவில்லை என்று மழுப்பினார். அப்படியெனில் எடப்பாடியார் தூய்மையான ஆட்சி நடத்தவில்லையா? என்ற கேள்விக்கு அப்போதைய எதிர்க்கட்சியைக் கேளுங்கள் என்கிறார். தூய்மையான ஆட்சி இல்லையென்றால் ஏன் அமைச்சர் பதவியில் நீடித்தார்? விலகிவிட்டுச் சென்றிருக்கலாமே! இருக்கும் வரை பதவி சுகங்களை அனுபவிக்க வேண்டும், வெளியேறினால் கட்சியைப் பழிசொல்ல வேண்டும் என்பதுதான் செங்கோட்டையனின் எண்ணம்.

ஜெயலலிதா ஒருகட்டத்தில் கட்சியை விட்டு நீக்கி பின்னர் சேர்த்துக்கொண்டாலும், எம்.எல்.ஏ சீட் கொடுத்தாலும், சுய ஒழுக்கம் இல்லாத காரணத்தினால் அமைச்சர் பதவி கொடுக்கவே இல்லை. ஆனால், சீனியர் என்பதை மதித்து அவருக்கு அமைச்சர் பதவி கொடுத்து அழகுபார்த்த எடப்பாடியாரையே இன்று விமர்சிக்கிறார். எப்போதோ தவெக செல்ல பிளான் போட்டுவிட்டு, தானே விலகிச்சென்றதாக இருக்கக் கூடாது கட்சியே தன்னை நீக்க வேண்டும் என்று ஒரு நாடகத்தை நடத்தி, இப்போது தான் நினைத்த இடத்துக்குச் சென்று சேர்ந்துவிட்டார் செங்கோட்டையன். இவரை நம்பி உடன் வந்த ஓபிஎஸ், தினகரன், சசிகலா போன்றோர் தான் இப்போது செய்வதறியாது திகைத்து நிற்கின்றனர்.

கட்சிக்கும், கட்சித் தலைமைக்கும் துரோகத்தை செய்துவிட்டு, தான் என்னவோ உத்தமபுத்திரன் போல பேசிவரும் செங்கோட்டையனின் அத்தனை தகிடுதத்தங்களையும் நவம்பர் 30ம் தேதி கோபியில் சுற்றுப்பயணம் செய்யும் பொதுச்செயலாளர் இபிஎஸ் புட்டுப்புட்டு வைக்கப்போகிறார். ஆரம்பம் முதல் இப்போது வரை செங்கோட்டையன் செய்த அத்தனை துரோகங்களையும் பட்டியலிட்டுப் பேசப்போகிறார் எடப்பாடியார். இதற்காக ஈரோடு மாவட்ட அதிமுகவினர் கிடுகிடு பணிகளைச் செய்துவருகிறார்கள். செங்கோட்டையன் குறித்த அனைத்து விதமான கேள்விகளுக்கும் கோபியில் வைத்தே பதிலளிக்க இருக்கிறார் இபிஎஸ்!" என்று விவரிக்கிறார்கள்.

செங்ஸ்சின் கோபி தொகுதியில் வருகிற 30-ந்தேதி பெரிய சரவெடி வெடிக்கப் போகிறது.