உருவானது ‘டித்வா’ புயல்; தமிழகத்தை நோக்கி நகர்வதால் எச்சரிக்கை!

வடகிழக்கு பருவமழை தொடங்கியுள்ள நிலையில், வங்கக் கடலில் புயல் உருவாகி உள்ளதாக வானிலை ஆய்வு மையம் தெரிவித்துள்ளது. இந்த புயலுக்கு ஏமன் நாடு பரிந்துரைத்த ‘டித்வா புயல்’ என்று பெயர் வைக்கப்பட்டுள்ளது.

அதாவது, தென்மேற்கு வங்கக்கடல் மற்றும் அதனை ஒட்டிய இலங்கை பகுதிகளில் நிலவி வந்த ஆழ்ந்த காற்றழுத்த தாழ்வு மண்டலம் புயலாக தீவிரம் அடைந்துள்ளதாக வானிலை ஆய்வு மையம் அதிகாரப்பூர்வமாக தெரிவித்துள்ளது. இந்த ஆழ்ந்த காற்றழுத்த தாழ்வு மண்டலம், மணிக்கு 15கி.மீ வேகத்தில் வடமேற்கு திசையை நோக்கி நகர்ந்து ‘டித்வா’ புயலாக தீவிரமடைந்துள்ளது.

இந்த டித்வா புயல் இலங்கையின் மட்டக்கலப்பிற்கு தென்கிழக்கே மையம் கொண்டிருக்கிறது. இது குறிப்பாக, திரிகோணமலைக்கு தென்கிழக்கே 200 கி.மீ தொலைவிலும், புதுச்சேரிக்கு தென்கிழக்கே 610 கி.மீ தொலைவிலும் சென்னைக்கு தென்கிழக்கே 700 கி.மீ தொலைவிலும் மையம் கொண்டிருப்பதாகத் தெரிவிக்கப்பட்டுள்ளது. இந்த புயலானது, தென்மேற்கு வங்கக்கடல் மற்றும் அதனை ஒட்டி இருக்கக்கூடிய இலங்கை கடற்கரை வழியாக வடக்கு வடமேற்கு திசையை நோக்கி நகர்ந்து வரும் நவம்பர் 30ஆம் தேதி அதிகாலையில், வட தமிழ்நாடு, புதுச்சேரி மற்றும் அதனை ஒட்டி இருக்கக்கூடிய தெற்கு ஆந்திர பிரதேச கடற்கரையை நோக்கி நகரக்கூடும் என்று தெரிவிக்கப்பட்டுள்ளது.

ஏற்கெனவே கடந்த மாத இறுதியில் மோன்தா புயல் உருவாகி ஆந்திரப் பிரதேச கடற்கரையை கடந்திருக்கும் சூழ்நிலையில், இந்த மாத இறுதியில் டித்வா புயல் தென்மேற்கு வங்கக்கடல் பகுதியில் உருவாகி இருக்கிறது. இதனையொட்டி, கடலோர மாவட்டங்கள், காவிரிப்படுகை மாவட்டங்கள், வட கடலோர மாவட்டங்களுக்கு கனமழைக்கான எச்சரிக்கை விடுக்கப்பட்டுள்ளது. குறிப்பாக தமிழகத்திற்கு இரு நாட்களுக்கு ரெட் அலர்ட் எச்சரிக்கையும் விடுக்கப்பட்டுள்ளது.