“ஆளுநர் ரவி தனது நாவை அடக்க வேண்டும், இல்லையென்றால்...” - பெ.சண்முகம் எச்சரிக்கை

கடந்த சில தினங்களுக்கு முன்பு நிகழ்ச்சி ஒன்றில் பங்கேற்று பேசிய தமிழக ஆளுநர் ஆர்.என்.ரவி, கார்ல் மார்க்ஸை கடுமையாக விமர்சித்துப் பேசியிருந்தார். குறிப்பாக அவர், “கார்ல் மார்க்ஸ் இந்தியாவின் சமூக கோட்பாடுகளை சிதைக்க வேண்டும் என்று கட்டுரை எழுதியுள்ளார். அவரின் சிந்தனை, இந்தியாவை சிதைத்துள்ளது. இதனால், இன்று கார்ல் மார்க்ஸின் சிந்தாந்தம் புறம் தள்ளப்பட்டுள்ளது” என்று கூறியிருந்தார்.

ஆளுநர் ஆர்.என்.ரவியின் விமர்சனத்துக்கு இந்திய கம்யூனிஸ்ட், மார்க்சிஸ்ட் கம்யூனிஸ்ட் உள்ளிட்ட கம்யூனிஸ்ட் இயக்கங்கள் கடும் கண்டனம் தெரிவித்தன. இந்த நிலையில், ஆளுநருக்கு எதிராக மார்க்சிஸ்ட் கம்யூனிஸ்ட் கட்சியினர் இன்று (28-11-25) போராட்டம் நடத்தினர். மார்க்சிஸ்ட் கம்யூனிஸ்ட் கட்சியின் தலைவர் பெ. சண்முகம் தலைமையில் நடைபெற்ற இந்த போராட்டத்தில், தமிழ்நாட்டுக்கும் தமிழக மக்களுக்கும் ஆளுநர் ஆர்.என்.ரவி எதிராக செயல்படுவதாகக் கூறி முழக்கமிடப்பட்டது.

இந்த போராட்டத்தின் போது செய்தியாளர்களைச் சந்தித்துப் பேசிய பெ.சண்முகம், “அறிவியலுக்கு எதிராக பேசுவதையே ஆளுநர் வாடிக்கையாக வைத்திருக்கிறார். தமிழ்நாடு ஆளுநர் என்கிற முறையில், தமிழ்நாட்டுக்காக ஒரு கறிவேப்பிலை அளவுக்கு கூட எந்த நன்மையும் செய்யாதவர் தான் ஆர்.என்.ரவி. அவர் என்ன சேவை செய்தார் என்பதை அவர் மக்கள் மத்தியில் வெளிப்படுத்த வேண்டும். எதையாவது ஒரு நன்மையை சொல்லிவிட்டால் கூட அவரை நான் பாராட்ட விரும்புகிறேன். பா.ஜ.க, ஆர்.எஸ்.எஸ்ஸின் நன்மையை மட்டுமே கருத்தில் கொண்டு செயல்படக்கூடிய நபராக அவர் இருக்கிறார். கார்ல் மார்க்ஸ் குறித்தும் அவரின் சிந்தாந்ததையும் அவதூறாக பேசியிருக்கிறார். அவரின் அந்த ஆணவப் போக்கை கண்டித்து தான் இன்று கண்டன ஆர்ப்பாட்டம் நடத்துகிறோம்.

ஆர்.என்.ரவி தன்னுடைய நாவை அடக்க வேண்டும். இல்லையென்றால், சென்னையில் நடைபெறும் இந்த போராட்டம் தமிழ்நாடு முழுவதும் நடைபெறும். மக்களுக்கு எதிராக எடுக்கக்கூடிய நடவடிக்கைகளுக்கு எதிராக ஏராளமான போராட்டங்களை இன்றைக்கும் தமிழ்நாட்டில் மார்க்சிஸ்ட் கம்யூனிஸ்ட் கட்சியும், அதனுடைய அமைப்புகளும் நடத்தி வருகின்றது. இப்போது கூட அவர்கள், அபாயகரமான தொழில்களில் பெண்களை ஈடுபடுத்துவது என்கிற அறிவிப்பாணையை வெளியிட்டு ஆலோசனையைக் கேட்கிறார்கள். அதி மிக மிக ஆபத்தானது. பொதுவாக தொழிலாளர்களை பாதிக்கக்கூடிய முக்கியமான திருத்தங்களை தமிழ்நாடு அரசு கொண்டு வருகிற போது அனைத்து தொழிற் சங்கங்களுடன் கலந்து பேசி ஒரு ஜனநாயக அணுகுமுறையை தமிழ்நாடு அரசு கொண்டு வர வேண்டுமே தவிர தான் எடுத்த மூப்பாக இத்தகைய சட்டத்திருத்தங்களை கொண்டு வருவதை மார்க்சிஸ்ட் கம்யூனிஸ்ட் கட்சி எதிர்க்கிறது. உடனடியாக அந்த அறிவிப்பாணையை திரும்ப பெற வேண்டும் என்று நாங்கள் வற்புறுத்தினோம்.

அதனால் ஒவ்வொரு பிரச்சனையிலும் எங்களது அணுகுமுறை தனித்தது. மக்களுக்கு சாதகமான நலத்திட்டங்களை நிறைவேற்றினால் வரவேற்போம். மக்களுக்கு எதிரானது என்றால், அதை எதிர்த்து வலிமையான போராட்டங்களை மார்க்சிஸ்ட் கம்யூனிஸ்ட் கட்சி நடத்திக் கொண்டிருக்கிறது. மார்க்சிஸ்ட் கம்யூனிஸ்ட் கட்சி மீது வேண்டுமென்றே அத்தகைய அவதூறுகளை அவர் மேற்கொண்டிருக்கிறார்” என்று கூறினார்.