“அதற்கு எல்லாம் பதில் சொல்ல வேண்டிய அவசியம் கிடையாது” - இ.பி.எஸ்.ஸுக்கு முதல்வர் பதிலடி!

வடகிழக்கு பருவமழை காரணமாகத் தமிழகத்தில் உள்ள பல்வேறு மாவட்டங்களில் தொடர்ந்து மழை பெய்து வருகிறது. அந்த வகையில் டெல்டா மற்றும் தென் மாவட்டங்கள் உட்படத் தமிழ்நாட்டின் பல பகுதிகளில் கனமழை பெய்துள்ளது. அதே போன்று புதுச்சேரியிலும் தொடர்ந்து கனமழை பெய்து வருகிறது. அதே சமயம் தென்மேற்கு வங்கக்கடல் மற்றும் அதனை ஒட்டிய இலங்கை கடலோர பகுதிகளில் நிலை கொண்டிருந்த காற்றழுத்த தாழ்வு மண்டலம் நேற்று (27.11.2025) டித்வா புயலாக மாறியது. 

இதனையடுத்து தென் கடலோர மாவட்டங்களில் கனமழை பெய்யும் என வானிலை ஆய்வு மையத்தின் சார்பில் ஏற்கனவே எச்சரிக்கை விடுக்கப்பட்டது. இந்நிலையில் டித்வா புயலை எதிர்கொள்ள தமிழக அரசு சார்பில் எடுக்கப்பட்ட நடவடிக்கைகள் என்ன? என்பது குறித்து சென்னை எழிலகத்தில் உள்ள பேரிடர் கட்டுப்பாட்டு அறையில் தமிழக முதல்வர் மு.க.ஸ்டாலின் ஆய்வு செய்தார். அதன் பின்னர் அவர் செய்தியாளர்களைச் சந்தித்துப் பேசினார். அப்போது அவர் பேசுகையில், “ரெட் அலட் விடுக்கப்பட்டுள்ள மாவட்டத்தின் ஆட்சித் தலைர்களிடம் வீடியோ மூலமாக தொடர்பு கொண்டு அங்குள்ள நிலவரம் குறித்து கேட்டிருக்கிறோம். 

ஏற்கனவே நேற்றைய தினம் (27.11.2025) இது குறித்து என்னுடைய தலைமையில் தலைமை செயலாளர் முன்னிலையில் உயரதிகாரிகள் கூட்டத்தை கூட்டி எல்லா துறை அதிகாரிகளையும் கூட்டி எச்சரிக்கை எல்லாம் கொடுத்திருக்கிறோம். அறிவுரை கொடுத்திருக்கிறோம். எல்லா மாவட்டத்துக்கும் மீட்புக் குழு அனுப்பி வைத்திருக்கிறோம். அவர்கள் அங்கு எல்லாரும் சென்று  சேர்ந்துவிடார்கள். ஏற்கனவே எந்தெந்த இடம் பாதிக்கப்பட்டுள்ளதோ அந்தந்த இடத்தில் உஷாராக இருந்து கவனிக்க வேண்டும் என்று கூறியுள்ளோம். மின் கம்பிகள் எங்கு எல்லாம் அறுந்து விபத்து ஏற்பட்டதோ  அந்த இடத்தை உஷாரா கண்காணிக்க வேண்டும் என்று சொல்லி இருக்கிறோம்.

புயலால் சென்னையும் பாதிக்கப்படும் என்றும், சென்னையில அதிகம் மழை பெய்யும் என்றும் சொல்கிறார்கள். எல்லா இடங்களிலும் முகாமல்கள் ஏற்பாடு செய்யப்பட்டுள்ளது. தேவையான உணவு கொடுப்பதற்கு ஏற்பாடு செய்யப்பட்டுள்ளது. தாழ்வான பகுதியில் உள்ள மக்களையும் உடனடியாக தண்ணீர் திறந்து விடக்கூடிய நேரங்களில் அவர்களையும் அப்புறப்படுத்துவதற்கான ஏற்பாடு செய்யப்பட்டுள்ளது. ஏற்கனவே அந்தந்த மாவட்டத்தில் பொது அமைச்சர்கள் இருக்கிறார்கள். 

அதன்படி அவர்கள்  கவனித்து கொண்டு வருகிறார்கள்” எனத் தெரிவித்தார். இதனையடுத்து செய்தியாளர் ஒருவர், “எடப்பாடி பழனிசாமி டெல்டா மாவட்ட மக்களை தமிழகம் வஞ்சித்து வருகிறது என்று கூறியுள்ளார்?” எனக் கேள்வி எழுப்பினார். அதற்கு முதல்வர் மு.க. ஸ்டாலின், “அவர வஞ்சிக்காமல் இருந்தால் போதும். அதான் முக்கியம். அவர் சொல்லி கொண்டுதான் இருப்பார். அவர் சொல்வது மாதிரில்லாம் ஒன்றும் கிடையாது. அவர் எப்போதுமே சொல்லி கொண்டு தான் இருப்பார். அதற்கு எல்லாம் பதில் சொல்ல வேண்டிய அவசியம் கிடையாது. புயலை எதிர்கொள்ள எல்லா வகையிலும் தயாராக உள்ளோம்” எனப் பதிலளித்தார்.