“ஒன்றிய பா.ஜ.க. அரசு பதில் சொல்லியே ஆகவேண்டும்” - முதல்வர் மு.க. ஸ்டாலின் காட்டம்!

நாடாளுமன்ற குளிர்கால கூட்டத்தொடர் நாளை மறுநாள் (01.12.2025) தொடங்க உள்ளது. அதன்படி வரும் டிசம்பர் மாதம் 19ஆம் தேதி வரை நடைபெறும் என நாடாளுமன்ற விவகாரங்கள் துறை அமைச்சர் கிரண் ரிஜிஜூ அதிகாரப்பூர்வமாக அறிவித்திருந்தார். இந்த கூட்டத் தொடரில் முக்கிய மசோதாக்கள் தாக்கல் செய்யப்படும் என தகவல் வெளியாகியுள்ளன. 

இந்த கூட்டத் தொடரில் எதிர்க்கட்சிகள் சார்பில் தேர்தல் ஆணையத்தால் மேற்கொள்ளப்பட்டு வரும் வாக்காளர் தீவிர திருத்த முறை, பணவீக்கம், விலைவாசி உயர்வு, வருமான வரித்துறை, அமலாக்கத்துறை, சிபிஐ போன்ற விசாரணை அமைப்புகளை கொண்டு எதிர்க்கட்சிகளை முடக்குவது போன்ற பிரச்சனைகளை எழுப்பக்கூடும் எதிர்பார்க்கப்படுகிறது. இந்நிலையில் திமுக தலைவரும், தமிழக முதல்வருமான மு.க. ஸ்டாலின் தலைமையில் அக்கட்சியின் நாடாளுமன்ற மக்களவை மாநிலங்களவை உறுப்பினர்கள் கூட்டம், இன்று (29.11.2025) காலை 10.00 மணியளவில் சென்னை, அண்ணா அறிவாலயத்தில் உள்ள, 'முரசொலி மாறன் வளாகத்தில் உள்ள கூட்ட அரங்கில் நடைபெற்றது. .

இந்த கூட்டத்தில், “மாநில உரிமைகளை மதிக்காமல் தமிழ்நாட்டை வஞ்சிப்பதற்கும் - ரயில் திட்டங்களிலும் நிதி ஒதுக்கீட்டிலும் தமிழ்நாட்டைப் புறக்கணிப்பதற்கும் ஒன்றிய பா.ஜ.க. அரசுக்குக் கண்டனம் தெரிவிக்கப்படுகிறது. கோவை, மதுரை மெட்ரோ ரயில் திட்டங்கள் - விமான நிலைய விரிவாக்கம், மதுரை பன்னாட்டு விமான நிலையத்துக்கு அனுமதிக்க வேண்டும். கலைஞர் பல்கலைக்கழகச் சட்டமுன்வடிவுக்காக நாடாளுமன்றத்தில் குரல் கொடுக்க வேண்டும். செறிவூட்டப்பட்ட அரிசி வழங்கும் திட்டத்தில் விவசாயிகளைப் பாதுகாத்திட வேண்டும். நெல் கொள்முதல் ஈரப்பதத்தை 22 விழுக்காடாக உயர்த்திட வேண்டும். 

கல்வியில் காவிக் கொள்கையைத் திணிக்காமல், 3548.22 சமக்ர சிக்ஷா நிதியை விடுவித்திட வேண்டும். நான்கு தொழிலாளர் சட்டத் தொகுப்புகளால் தொழிலாளர்களின் உரிமை பாதிக்கப்படக்கூடாது. இந்திய மீனவர்களின் பாரம்பரிய மீன்பிடி உரிமைகளைப் பாதுகாப்பதற்கும், கைது செய்யப்பட்ட மீனவர்கள் மற்றும் படகுகளை விரைவாக விடுவிப்பதற்கும் நிரந்தரத் தீர்வு அவசியம் ஆகும். ஆசிரியர் தகுதித் தேர்வில் 23.8.2010க்கு முன்பு பணி நியமனம் பெற்று தற்போது ஆசிரியர்களாகப் பணிபுரிபவர்களின் பணி மற்றும் பதவி உயர்வைப் பாதுகாக்க வேண்டும்.

மகாத்மா காந்தி ஊரக வேலைவாய்ப்புத் திட்டத்தை முடக்காமல், தமிழ்நாட்டுக்கான ரூ.1290 கோடியை உடனடியாக வழங்குவதோடு, இந்தாண்டும் 30 கோடி மனித நாட்களுக்கான பணி அனுமதியை வழங்க வேண்டும்” என தீர்மானம் நிறைவேற்றப்பட்டது. மேலும் இது தொடர்பாக முதலமைச்சர் மு.க. ஸ்டாலின் எக்ஸ் சமூக வலைத்தளத்தில் வெளியிட்டுள்ள பதிவில், “மிகப்பெரிய ஜனநாயக நாடு என்று பெருமையாகச் சொல்லிக்கொண்டே, தமிழ்நாட்டு மக்களின் குரலை ஒன்றிய பா.ஜ.க. அரசு புறக்கணிப்பது சரியா?. 

தமிழ்நாட்டின் கோரிக்கைகளை - தேவைகளைக் கடிதங்களாக, நேரில் மனுக்களாக, சட்டமன்றத் தீர்மானங்களாக எடுத்துச் சொல்லியும் காதில் வாங்காமல் இருப்பது நியாயமல்ல. அதிகமான வரி வருவாயைத் தரும் மாநிலமான தமிழ்நாட்டுக்கு வஞ்சனை செய்வதை மனச்சாட்சியுள்ள யாரும் ஏற்றுக்கொள்ள மாட்டார்கள். உங்கள் வஞ்சனைகளைக் கடந்துதான் நாட்டிலேயே அதிகமான 11.19% பொருளாதார வளர்ச்சியை அடைந்திருக்கிறோம். குட்ட குட்ட குனிய மாட்டோம்; நிமிர்ந்து நடைபோடுவோம். வருகின்ற நாடாளுமன்றக் கூட்டத்தொடரில், தமிழ்நாட்டு மக்களின் பிரதிநிதிகளிடம் ஒன்றிய பா.ஜ.க. அரசு பதில் சொல்லியே ஆகவேண்டும்” எனத் தெரிவித்துள்ளார்.