செந்தில்பாலாஜிக்கு முதல்வர் மு.க. ஸ்டாலின் அதிரடி உத்தரவு!

தமிழ்நாட்டில் அடுத்த ஆண்டு (2026) சட்டமன்றத் தேர்தல் நடைபெறவுள்ளது. இந்த தேர்தலை எதிர்கொள்ளத் தமிழக அரசியல் கட்சித் தலைவர்கள் இந்த ஆண்டின் தொடக்கத்தில் இருந்தே ஆயத்தமாகி வருகின்றனர். அந்த வகையில் பல்வேறு அரசியல் கட்சிகளும் சுற்றுப்பயணம், தேர்தல் பரப்புரை என தீவிரம் காட்டி வருகின்றனர். மற்றொருபுறம் சட்டப்பேரவைத் தேர்தலுக்குத் தேர்தல் ஆணையம் முழு வீச்சில் தயாராகி வருகிறது. அதற்கான பணிகளும் தொடங்கியுள்ளன. 

இந்நிலையில் கோவை மாவட்டம் சூலூர், கிணத்துக்கடவு மற்றும் வால்பாறை ஆகிய 3 சட்டமன்றத் தொகுதிகளைச் சேர்ந்த நிர்வாகிகளை திமுக தலைவரும், தமிழக முதல்வருமான மு.க. ஸ்டாலின், திமுக தலைமை அலுவலகமான சென்னை தேனாம்பேட்டையில் உள்ள அண்ணா அறிவாலயத்தில், ‘உடன் பிறப்பே வா’ என்ற தலைப்பில் இன்று (18.11.2025) சந்தித்து ‘ஒன் டு ஒன்’ ஆலோசனை நடத்தினார். இந்த சந்திப்பின் போது ஒவ்வொரு தொகுதியிலும் திமுகவின் பலம், பலவீனம் குறித்தும் வேட்பாளர் தேர்வு தொடர்பாகவும், சட்டமன்ற தேர்தல் பணிகளை முடுக்கி விடும் வகையில் ஒன் டூ ஒன் ஆலோசனை நடைபெற்றது. 

அப்போது இந்த 3 தொகுதிகளில், கூடுதல் கவனம் செலுத்தி, உட்கட்சி மற்றும் கோஷ்டி பூசல்களைக் கலைந்து வரும் சட்டமன்ற தேர்தலில் திமுகவை வெற்றி பெற வேண்டும் என்று முதல்வர் மு.க. ஸ்டாலின் கட்சி நிர்வாகிகளிடம் தெரிவித்துள்ளதாகத் தகவல் வெளியாகியுள்ளது. அதோடு கட்சி நிர்வாகிகளின் கருத்துக்களை தனித்தனியாகக் கேட்டறிந்த முதல்வர் மு.க. ஸ்டாலின், தொகுதிகளில் கட்சியை மேலும் பலப்படுத்தி அங்கு வெற்றி பெறுவதற்கான அனைத்து வியூகங்களையும் வகுக்க வேண்டும் என அவர் கட்சி நிர்வாகிகளுக்கு ஆலோசனை வழங்கியுள்ளதாகத் தகவல் வெளியாகியுள்ளது. 

மேலும் முதல்வர் மு.க. ஸ்டாலின், “கடந்த சட்டமன்ற தேர்தலில் கோவை மாவட்டத்தில் திமுக ஒரு தொகுதியில் கூட வெற்றி பெற முடியவில்லை. அதிமுக கூட்டணி அனைத்து தொகுதியிலும் வெற்றி பெற்றது. எனவே வரும் சட்டமன்ற தேர்தலில் பெரும்பான்மையான தொகுதிகளில் திமுக அல்லது கூட்டணி கட்சிகள் கோவை மாவட்டத்தில் வெற்றி பெற வேண்டும்” எனத் தெரிவித்துள்ளார். அதோடு கோவை மாவட்டத்திற்கு மண்டல பொறுப்பாளராக உள்ள முன்னாள் அமைச்சர் செந்தில் பாலாஜிக்கும் இதற்கான  உத்தரவை முதல்வர் மு.க. ஸ்டாலின் பிறப்பித்துள்ளார். கொங்கு மண்டலத்தில் கடந்த முறை அதிமுக மற்றும் அதன் கூட்டணிகள் பெரும்பான்மையான சட்டமன்ற தொகுதியில் வெற்றி பெற்றது குறிப்பிடத்தக்கது.