நெருங்கும் புயல், மழை; அமைச்சர்கள் களத்துக்குச் செல்ல முதல்வர் உத்தரவு!

வடகிழக்கு பருவமழை தொடங்கியுள்ள நிலையில், வங்கக் கடலில் ‘டித்வா’ புயல் உருவாகியுள்ளது. இந்த புயல், தென்மேற்கு வங்கக்கடல் மற்றும் அதனை ஒட்டி இருக்கக்கூடிய இலங்கை கடற்கரை வழியாக வடக்கு வடமேற்கு திசையை நோக்கி நகர்ந்து, வரும் 30ஆம் தேதி அதிகாலையில், வட தமிழ்நாடு, புதுச்சேரி மற்றும் அதனை ஒட்டி இருக்கக்கூடிய தெற்கு ஆந்திர பிரதேச கடற்கரையை நோக்கி நகரக்கூடும் என்று தெரிவிக்கப்பட்டுள்ளது.

இதன் காரணமாக, கடலோர மாவட்டங்கள், காவிரிப்படுகை மாவட்டங்கள், வட கடலோர மாவட்டங்களுக்கு கனமழைக்கான எச்சரிக்கை விடுக்கப்பட்டுள்ளது. குறிப்பாக தமிழகத்திற்கு இரு நாட்களுக்கு ரெட் அலர்ட் எச்சரிக்கையும் விடுக்கப்பட்டுள்ளது.

இந்த நிலையில் வடகிழக்கு பருவமழை தொடர்பாக இன்று (27-11-25) அதிகாரிகளுடன் முதல்வர் மு.க.ஸ்டாலின் ஆலோசனை நடத்தினார். இந்த ஆலோசனைக் கூட்டத்தில், அமைச்சர் கே.கே.எஸ்.எஸ்.ஆர் ராமச்சந்திரன், பொறுப்பு டிஜிபி, ஏடிஜிபி, தலைமைச் செயலாளர், வருவாய்த்துறை செயலாளர், பொதுப்பணித்துறை செயலாளர், உள்துறை செயலாளர் உள்ளிட்ட அதிகாரிகள் கலந்து கொண்டனர்.

இந்த ஆலோசனைக் கூட்டத்தில் அதிகாரிகளுக்கு முதல்வர் பல அறிவுறுத்தல்களை வழங்கியுள்ளார். குறிப்பாக முகாம்களை தயார் நிலையில் வைத்திருக்க வேண்டும், தாழ்வான பகுதிகளில் வசிக்கும் மக்களை உடனடியாக அப்புறப்படுத்தி மேடான பகுதிகளுக்கு அழைத்து வருவதற்கான ஏற்பாடுகளைச் செய்ய வேண்டும், பேரிடர் மேலாண்மையில் தனி கவனம் செலுத்த வேண்டும், அனைத்து மாவட்ட ஆட்சியர்களும் தயார் நிலையில் இருக்க வேண்டும் உள்ளிட்ட அறிவுறுத்தல்களை முதல்வர் வழங்கினார்.

மேலும் மக்களுக்கு தேவையான மருத்துவ வசதிகள், அடிப்படை வசதிகள் தயார் நிலையில் வைத்திருக்க வேண்டும், மீட்பு மற்றும் நிவாரண மையங்கள் தயார் நிலையில் இருக்க வேண்டும், அமைச்சர்கள் அதிகாரிகள் களத்துக்கு செல்ல வேண்டும் உள்ளிட்ட அறிவுறுத்தல்களை முதல்வர் வழங்கியுள்ளார்.