“பெயர் மாற்றத்தைவிடச் சிந்தனை மாற்றமே தேவை” - முதல்வர் மு.க.ஸ்டாலின் விமர்சனம்

இந்தியாவில் உள்ள அனைத்து மாநிலங்களிலும் அமைந்துள்ள  ஆளுநர் மாளிகை ராஜ்பவன் என்று அழைக்கப்பட்டு வருகிறது. அதே போன்று யூனியன் பிரதேசத்தின் துணை நிலை ஆளுநர் மாளிகைகள் ராஜ் நிவாஸ் என்றும் அழைக்கப்பட்டு வருகிறது.

இத்தகைய சூழலில் தான் கடந்த 2024ஆம் ஆண்டு ஆகஸ்ட் மாதம் குடியரசுத் தலைவர் திரவுபதி முர்மு தலைமையில் ஆளுநர்கள் மற்றும் துணை நிலை ஆளுநர்களுக்கான கூட்டம் நடைபெற்றது. இந்த கூட்டத்தில்  கலந்து கொண்ட தமிழ்நாடு ஆளுநர் ஆர்.என். ரவி, ராஜ்பவன் என்பது மக்கள் பவன் என மாற்றப்பட வேண்டும் எனக் கோரிக்கை வைத்திருந்தார். அந்த கோரிக்கையை தற்போது மத்திய உள்துறை அமைச்சகம் ஏற்று, ராஜ்பவன் என்பதை இனி ‘மக்கள் பவன்’ என அனைத்து மாநிலங்களும் மாற்றி அழைக்க உத்தரவிட்டுள்ளது.

மத்திய உள்துறை அமைச்சகம் இதனை ஏற்றுக்கொண்டுள்ளது. இதன் மூலம் இனி அதிகாரப்பூர்வமாக ராஜ்பவன் என்பதை இனி மக்கள் பவன் என அனைத்து மாநிலங்களும் மாற்றி அழைக்க உத்தரவிடப்பட்டுள்ளது. அதே போன்று அனைத்து மாநில ஆளுநர் மாளிகையையும், ராஜ் பவன் என்பது லோக் நிவாஸ் என அழைக்கப்பட வேண்டும் என்ற உத்தரவையும் மத்திய உள்துறை அமைச்சகம் அதிகாரப்பூர்வமாக வெளியிட்டுள்ளது.

இந்த நிலையில், முதல்வர் மு.க.ஸ்டாலின் விமர்சனம் செய்துள்ளார். இது குறித்து அவர் தனது எக்ஸ் பக்கத்தில், “பெயர் மாற்றத்தைவிடச் சிந்தனை மாற்றமே தேவை. சட்டமன்றம் மக்கள் மன்றம். சட்டமன்றத்தை மதிக்காதவர்கள், ‘மக்கள் மாளிகை’ எனப் பெயர் மாற்றுவது கண் துடைப்பா? மக்களாட்சித் தத்துவத்தின் கண்களில் மண்ணைத் தூவுவதற்கா? மக்களால் தேர்ந்தெடுக்கப்பட்ட அரசுகளையும், மக்களின் விருப்பத்தை நிறைவேற்ற இறையாண்மையுள்ள சட்டமன்றத்தையும் மதிப்பதுதான் இப்போதைய தேவை. சிந்தனையிலும் செயலிலும் மாற்றம் இல்லையெனில், இதுவும் தேவையற்றதே” என்று பதிவிட்டுள்ளார்.