வைத்திலிங்கத்தோடு திமுகவில் ஐக்கியமாகும் மற்றொரு பிரபலம்?

முன்னாள் முதல்வர் ஓ.பன்னீர்செல்வம் தலைமையில் அதிமுக தொண்டர்கள் உரிமை மீட்புக் குழு கூட்டம், சென்னை வேப்பேரியில் கடந்த நவம்பர் மாதம் 24ஆம் தேதி (24.11.2025) நடைபெற்றது. இந்த கூட்டத்தில், அதிமுக தொண்டர்கள் உரிமை மீட்பு குழுவானது அதிமுக தொண்டர்கள் உரிமை மீட்பு கழகமாக மாறி இருப்பதாக ஓ. பன்னீர்செல்வம் முன்னிலையில் தீர்மானம் நிறைவேற்றப்பட்டது. இந்த கூட்டத்தில் முன்னாள் அமைச்சரும், அதிமுக தொண்டர்கள் உரிமை மீட்பு குழுவின் இணை ஒருங்கிணைப்பாளருமான வைத்திலிங்கம் பேசுகையில், “மூன்றரை வருடம் இந்த (அதிமுக) கட்சி ஒன்றிணைய வேண்டும் என்று அமைதியாக அமைதி புரட்சி நடத்திக் கொண்டிருந்தார் ஓபிஎஸ்.  

இன்னும் ஒரு மாதத்தில்  கட்சி ஒன்றிணையவில்லை என்றால் ஒரு வியூகத்தை அமைத்து, ஓ.பி.எஸ். தலைமையிலான உரிமை மீட்புக் குழு, கட்சியாக மாறி மாபெரும் வெற்றியை பெறும். நமக்கு அதிமுக தொண்டர்கள் நமது உடன்பிறப்புகள். அதற்கு இடையூறாக எந்த சக்தி இருக்கிறதோ அந்த தீய சக்தியை விரட்டி அடிப்பதுதான் நமது ஒரே நோக்கமாக இருக்கும் என்பதைக் கூறி ஒற்றுமையாக இருங்கள். இன்னும் ஒரு மாதத்தில் நாம் வெற்றியை நோக்கி செல்வோம்” எனப் பேசியிருந்தார்.

இத்தகைய பரபரப்பான அரசியல் சூழலில் வைத்திலிங்கம் இன்று  (21.01.2026) காலை திமுகவில் இணைய உள்ளதாக தகவல் வெளியாகியுள்ளது. அதாவது அடுத்தக்கட்டமாக தனது அரசியல் நகர்வாக வைத்திலிங்கம் திமுகவில் இணைய உள்ளதாக கூறப்படுகிறது. முன்னதாக அதிமுகவில் இருந்து நீக்கப்பட்ட முன்னாள் அமைச்சர் செங்கோட்டையன் த.வெ.க.விற்கு சென்றது போன்றே, வைத்திலிங்கமும் தனது சட்டமன்ற உறுப்பினர் பதவியை ராஜினாமா செய்து விட்டு திமுக தலைவரும், தமிழக முதல்வருமான மு.க. ஸ்டாலின் முன்னிலையில் திமுகவில் இணைய உள்ளதாக தகவல் வெளியாகியுள்ளது.

தஞ்சாவூர் மாவட்டம் ஒரத்தநாடு சட்டமன்றத் தொகுதியின் உறுப்பினராக பதவி வகித்து வரும் வைத்திலிங்கம் அதிமுகவின் முக்கிய பிரபல பிரமுகராகவும், முன்னாள் முதல்வர் ஜெயலலிதாவின் நம்பிக்கைக்குரிய நபராக வலம் வந்தவர். கடந்த 2022 இல் அதிமுக ஒற்றைத் தலைமை தொடர்பான பிரச்சனை எழுந்த போது ஓ.பி.எஸ். ஆதரவாளராக இருந்தார். அதன்பின்னர் அதிமுக தொண்டர்கள் உரிமை மீட்புக் குழு இணை ஓருங்கிணைப்பாளராக செயல்பட்டு வந்தது குறிப்பிடத்தக்கது. இதேபோல் வைத்திலிங்கத்துடன் மற்றொரு அரசியல் பிரபலமான வெல்லமண்டி நடராஜனும் திமுகவில் ஐக்கியம் ஆக இருப்பதாக தகவல்கள் வெளியாகியுள்ளது.