டிட்வா புயல்; முன்னெச்சரிக்கை நடவடிக்கையை ஆய்வு மேற்கொண்ட வேளாண் துறை அமைச்சர்!

டிட்வா புயல் கரையை கடக்க உள்ள நிலையில் சிதம்பரம் உள்ளிட்ட சுற்று வட்டார பகுதிகளில் தொடர்ந்து 36 மணி நேரத்திற்கு மேலாக மழை லேசான காற்றுடன் பெய்து வருகிறது.  இந்த நிலையில் நாளை (30-11-25) புயல் கரையை கடந்து செல்லும் என வானிலை மையம் தெரிவித்துள்ளது.

இந்த நிலையில் இன்று (29-11-25) தமிழக வேளாண் மற்றும் உழவு நலத்துறை அமைச்சர் எம்.ஆர்.கே பன்னீர்செல்வம், சர்க்கரை துறை மேலாண் இயக்குநரும் மாவட்ட கண்காணிப்பு அலுவலருமான அன்பழகன், மாவட்ட ஆட்சியர் சி.பி ஆதித்யா செந்தில்குமார் உள்ளிட்ட பொதுப்பணித்துறையினர் அரசு அதிகாரிகள் கடலூர் மாநகராட்சி பகுதிகள், சிதம்பரம் அருகே உள்ள சி முட்லூர், மண்டபம் பகுதியில் உள்ள மழைநீர் வடிகால் வாய்க்கால் மற்றும் சிவகாமசுந்தரி ஓடை உள்ளிட்ட பகுதிகளில் ஆய்வு மேற்கொண்டனர்.

இதனை தொடர்ந்து அமைச்சர் எம்.ஆர்.கே பன்னீர்செல்வம் செய்தியாளர்களிடம் கூறுகையில், “கடலூர் மாவட்டத்தில் புயல் மற்றும் மழை முன்னெச்சரிக்கை நடவடிக்கையாக அனைத்து துறை அதிகாரிகள் தயார் நிலையில் உள்ளனர். புயல் பாதுகாப்பு மையங்களில் தாழ்வான பகுதிகளில் உள்ள பொதுமக்கள் தங்க வைப்பதற்கு நடவடிக்கை மேற்கொள்ளப்பட்டுள்ளது. மேலும் அவர்களுக்கு உணவு வழங்கவும் ஏற்பாடு செய்யப்பட்டுள்ளது. கடலூரில் பேரிடர் மீட்பு படையினர் தங்கவைக்கப்பட்டுள்ளனர். அவர்களை, பாதிக்கப்படும் இடங்களுக்கு உடனடியாக வரவழைத்து பணிகளை மேற்கொள்ளபடும். பொதுமக்கள் யாரும் அச்சப்பட வேண்டாம், பொதுப்பணித் துறைக்கு உட்பட்ட ஏரி மற்றும் வாய்க்கால்களை பொதுப்பணித்துறையினர் கண்காணித்து வருகின்றனர்” என்றார்.

ஆய்வின்போது சிதம்பரம் உட்கோட்ட நீர்வளத்துறை செயற்பொறியாளர் காந்தரூபன், உதவி செயற்பொறியாளர் ரமேஷ், நகராட்சி ஆணையர் மல்லிகா, பொறியாளர் சுரேஷ், திமுக மாவட்ட நிர்வாகி ஜேம்ஸ் விஜயராகவன், கடலூர மாநகராட்சி செயலார் ராஜா, மூத்த நகர்மன்ற உறுப்பினர் மணிகண்டன், நகர துணைச் செயலாளர் பாலசுப்ரமணியன், ஒன்றியச் செயலாளர் சங்கர், மனோகர் அண்ணாமலைநகர் பேரூராட்சி தலைவர் பழனி உள்ளிட்ட கட்சியின் முக்கிய நிர்வாகிகள் உடன் இருந்தனர்.