அறுந்து விழுந்த மின்கம்பி; மின்சாரம் தாக்கி இளைஞர் உயிரிழப்பு!

வடகிழக்கு பருவமழை பெய்துவரும் நிலையில், வங்கக் கடலில் ‘டிட்வா’ புயல் உருவாகியது. இதன் காரணமாக, தமிழக கடலோர மாவட்டங்கள், டெல்டா மாவட்டங்கள், வட கடலோர மாவட்டங்களுக்கு மிகக் கனமழைக்கான எச்சரிக்கை விடுக்கப்பட்டது. அந்த வகையில் டெல்டா மாவட்டங்கள் உட்படத் தமிழ்நாட்டின் பல பகுதிகளில் கனமழை பெய்துள்ளது. அதே போன்று புதுச்சேரியிலும் தொடர்ந்து கனமழை பெய்து வருகிறது. 

அந்த வகையில் மயிலாடுதுறை மாவட்டத்தில் டிட்வா புயல் காரணமாக நேற்று (29.11.2025) அதிகாலை முதல் கனமழையானது பெய்து வருகிறது. இத்தகைய சூழலில் தான் இன்று (30.11.2025) காலை 08:30 மணியுடன் கடந்த 24 மணியில் மயிலாடுதுறை மாவட்டம் முழுவதும் சராசரியாக 12 செ.மீ.மழைப் பதிவாகியுள்ளது. இதன் காரணமாகத் தாழ்வான பகுதிகளில் ஆங்காங்கே தண்ணீர் தேங்கியுள்ளன. இந்நிலையில் பாகசாலை காவல் நிலைய எல்லைக்கு உட்பட்ட செம்பதனிருப்பு கிராமத்தைச் சேர்ந்த ராஜா என்பவரது மகன் பிரதாப் (வயது 19) என்ற இளைஞர் நேற்று இரவு 10:30 மணி அளவில் கடை வீதிக்குச் சென்றுள்ளார். 

அதன் பின்னர் அவர் மீண்டும் இரு சக்கர வாகனத்தில் வீட்டிற்குத் திரும்பிச் சென்று கொண்டிருந்தார். அப்போது அவர் செல்லும் வழியில் பலத்த காற்று வீசியதன் காரணமாக அறுந்து கிடந்த மின்கம்பியைக் கவனிக்காமல் சென்றுள்ளார். அப்போது, இருசக்கர வாகனத்தில் மின்கம்பி சிக்கி, மின்சாரம் தாக்கியதில் அவர் சம்பவ இடத்திலேயே பரிதாபமாக உயிரிழந்தார். பலத்த காற்று காரணமாக மின்கம்பி அறுந்து விழுந்ததில் மின்சாரம் தாக்கி இளைஞர் ஒருவர் உயிரிழந்த சம்பவம் அப்பகுதி பொதுமக்கள் மத்தியில் பெரும் அதிர்ச்சியையும், சோகத்தையும் ஏற்படுத்தி உள்ளது.