என்னைப் பொறுத்தவரை, அமிதாப்பச்சன் ஒருவர் மட்டும்தான் சூப்பர் ஸ்டார்: ரஜினி
லண்டனில் உள்ள ஓட்டல் ஒன்றில் அவர் நிருபர்களுக்கு பேட்டி அளித்தார். "சூப்பர் ஸ்டார் என்ற முறையில் நீங்கள் எப்படி உணருகிறீர்கள்?'' என்ற கேள்விக்குப் பதில் அளித்த ரஜினிகாந்த், "என்னைப் பொறுத்தவரை, அமிதாப்பச்சன் ஒருவர் மட்டும்தான் சூப்பர் ஸ்டார்'' என்று கூறினார்.
"ஒவ்வொரு படத்தையுமே எனது முதல் படமாக கருதி நடிப்பதாகவும்'' அவர் தெரிவித்தார். உடல் நலக்குறைவு காரணமாக மருத்துவமனையில் சிகிச்சை பெற்று வந்ததை குறிப்பிட்ட ரஜினிகாந்த், தற்போது 90 சதவீதம் குணம் அடைந்துவிட்டதாகவும், தனக்காக பிரார்த்தனை செய்த ரசிகர்களுக்கு நன்றி என்றும் கூறினார்.
"கோச்சடையான் படம் குழந்தைகளை மட்டுமின்றி, அனைத்து தரப்பினரையும் கவரும் படமாக அமையும். வருகிற நவம்பர் மாதம் 13ந் தேதி தீபாவளிக்கு இந்த படம் வெளிவரும்'' என்று ரஜினி கூறினார்.
21 வருடங்களுக்குப்பின் ரஜினிகாந்த் தனது சொந்தக்குரலில் இந்த படத்தில் ஒரு பாடலை பாடுகிறார். அதுபற்றி குறிப்பிட்ட அவர், இந்த படத்தில் பாடியது புதிய அனுபவமாக இருந்ததாகவும், இந்த பாடல் வித்தியாசமாக இருக்கும் என்றும் தெரிவித்தார்.
லண்டன் நகரம் தனக்கு மிகவும் பிடிக்கும் என்ற ரஜினி, "பழமையான வரலாற்றுச் சிறப்பு மிக்க லண்டன் நகரை நான் மிகவும் நேசிக்கிறேன். 25 ஆண்டுகளுக்கு முன்பு ஒரு படத்தில் நடிப்பதற்காக இங்கு வந்திருக்கிறேன். அப்போதே இங்கு ஒரு வீட்டை வாங்க தவறிவிட்டேன். இனி நிச்சயம் இங்கு வீடு வாங்குவேன்'' என்றும் தெரிவித்தார்.
பேட்டியின்போது ரஜினியுடன் இருந்த இசையமைப்பாளர் ஏ.ஆர்.ரகுமான், "இந்த படத்தில் இசைக்கு முக்கிய பங்கு உள்ளது. இரண்டு பாடல்களுக்கு இசையமைத்துவிட்டோம். மேலும் இரண்டு பாடல்களுக்கு இசையமைத்து வருகிறோம்'' என்று தெரிவித்தார்.