பேரம் பேசுவது புரோக்கர்கள் வேலை: முலாயம்சிங்
ஜனாதிபதி பதவிக்கு பிரதமர் மன்மோகன்சிங், முன்னாள் ஜனாதிபதி அப்துல்கலாம், முன்னாள் சபாநாயகர் சோம்நாத் சட்டர்ஜி ஆகியோரில் ஒருவரை வேட்பாளராக நிறுத்த வேண்டும் என்று மம்தா பானர்ஜியுடன் சேர்ந்து முலாயம்சிங் கூறி இருந்தார்.
ஆனால், நேற்றுமுன்தினம் காங்கிரஸ் கூட்டணி வேட்பாளராக பிரணாப் முகர்ஜி பெயர் அறிவிக்கப்பட்டவுடன், அவரை ஆதரிப்பதாக முலாயம்சிங் அறிவித்தார்.
இந்நிலையில், இதுகுறித்து லக்னோவில் ஒரு செய்தி சேனலுக்கு முலாயம்சிங் நிருபர்களுக்கு பேட்டி அளித்தார். அப்போது அவர் கூறியதாவது:
பிரணாப் முகர்ஜியை ஆதரிக்க திரைமறைவில் நான் பேரத்தில் ஈடுபட்டதாக கூறுகிறார்கள். நான் எந்த பேரத்திலும் ஈடுபடவில்லை. பேரம் பேசுவது புரோக்கர்கள் வேலை. சமாஜ்வாடி கட்சி, தார்மீக அரசியலை பின்பற்றி வருகிறது. பேரத்தில் ஈடுபட்டதாக கூறுவது, சமாஜ்வாடி கட்சியை சிறுமைப்படுத்தும் செயல்.
பிரணாப் முகர்ஜிக்கான எங்கள் ஆதரவு, முற்றிலும் தகுதி அடிப்படையிலானது. ஏனென்றால், ஜனாதிபதி பதவிக்கு பிரணாப் முகர்ஜி பொருத்தமானவர் என்று நாங்கள் கருதுகிறோம். அவர் அனுபவம் வாய்ந்தவர், நேர்மையானவர், அறிவுஜீவி.
அதனால்தான், எங்கள் ஆதரவு பிரணாப் முகர்ஜிக்குத்தானே தவிர, காங்கிரசுக்கோ, ஐக்கிய முற்போக்கு கூட்டணிக்கோ அல்ல என்று நான் கூறினேன். நான் ஐக்கிய முற்போக்கு கூட்டணியில் சேருவது பற்றிய கேள்வியே இப்போது எழவில்லை.
நான் பிரணாப் முகர்ஜி பெயரை முதலில் எதிர்த்ததாக கூறுவது தவறு. நான் ஆரம்பத்திலேயே பிரணாப் முகர்ஜியை தான் ஆதரித்தேன். ஆனால், பிரணாப் முகர்ஜியை வேட்பாளராக அறிவிக்க முதலில் காங்கிரஸ் தயங்கியது. பிரணாப் முகர்ஜி, வேட்பாளர் கிடையாது என்ற தோற்றம் ஏற்பட்டது.
எனவே, அத்தகைய சூழ்நிலையில், ஜனாதிபதி பதவிக்கு மன்மோகன்சிங், அப்துல்கலாம், சோம்நாத் சட்டர்ஜி ஆகியோர் பொருத்தமானவர்கள் என்று கருதி, அவர்கள் பெயரை அறிவித்தோம். அது ஒரு யோசனைதான். மாறிவரும் அரசியல் சூழ்நிலையை கருதியும், அந்த 3 பேர் பெயரை அறிவித்தோம்.
ஆனால், நான் முதலில் ஆதரித்த பிரணாப் முகர்ஜியே வேட்பாளராக அறிவிக்கப்பட்டு இருப்பது எனக்கு மகிழ்ச்சி அளிக்கிறது.
ஜனாதிபதி தேர்தல் தொடர்பாக, நான் ஆரம்பத்தில் காங்கிரஸ் தலைவர் சோனியா காந்தியை சந்தித்தபோது கூட, ஜனாதிபதி பதவிக்கு காங்கிரசில் பிரணாபயூ முகர்ஜிதான் மிகவும் பொருத்தமானவர் என்று சோனியாவிடம் கூறினேன். நான் அப்துல் கலாம் உள்ளிட்ட 3 பேர் பெயரை அறிவித்த பிறகும், சோனியாவை சந்தித்தேன்.
அப்போது, இதை சோனியாவே என்னிடம் சுட்டிக்காட்டினார். பிரணாப் முகர்ஜியை ஆதரிப்பதன் மூலம் எனது வாக்குறுதியை நான் காப்பாற்றி விட்டேன். இவ்வாறு முலாயம்சிங் கூறினார்.